2 CRÓNICAS 9 - Qullan Arunaka DC

Sabá markankir reinan Salomonan ukar saratapa(1 R 10.1-13)

1Sabá markankir reinax, Salomonan aytat kankañapat ist'atayna, ukat jupax Jerusalén markar saräna, ch'ama jiskt'anakampi jupar yant'añataki. Jupasti amuyt'ayirinakapamp chikaw purïna, camellonakapanxa q'apkir qullanaka, walja qurinaka, munkañ qalanak khumt'ata. Kunapachatix Salomonan nayraqatapar purkäna ukkhaxa, kunanaktix amtkäna ukanak jiskt'äna,

2Salomonasti taqi jiskt'anakaparuw arusxatäna. Jupatakix janiw mä jiskt'as ch'amäkänti.

3Sabá markankir reinasti Salomonan yatiñ kankañap uñjasa, jach'a utap luraykatayna uk uñjasa,

4manq'äwipan manq'añanak uñjasa, jilïri jaqinakapan lurañanakap uñjasa, uywatanakapana, umañ luqtirinakapan isinakap uñjasa, Tatitun utapan kunjämsa reyix uywa wilañchanak luqtkäna ukanak uñjasaxa, walipuniw muspharäna,

5ukatsti reyiruw säna: “Kuntix markaxan juman luratanakamata, yatiñ kankañamat ist'kta ukax chiqawa;

6ukampis nayax akar jutasina, nayraxamp uñjasaw chiqätap amuyta. Chiqpachansa juman yatiñ kankañamat janiw chikatapsa yatiyapkitütuti, nayax ist'käyät ukat sipan jumax jilanktawa.

7¡Warminakamax kunja kusisitakïpki, luqtirinakamas jumamp chikäsinxa yatiñan arunakam isch'ukipxarakpacha!

8¡Tatit Diosamax qullanäpan, jupax suma chuymampiw uñjtam, reyi qunuñaparuw qunt'aytam reyipäñamataki! ¡Diosamax Israelaru munatap layku, markapan wiñayatak utjañapatakiw jumarux reyit utt'aytam, jupanakar chiqa kankañampi, aski kankañampi apnaqañamataki!” sasa.

9Ukatsti jupax Salomón reyirux kimsa waranqa llätunka pataka suxta tunka kilo qurinaka, walja q'apkir qullanaka, munkañ qalanak churäna. Israel markarux janipuniw ukham walja q'apkir qullanakax purirïkänti, kunjämtix Sabá markankir reinax Salomón reyiru churkäna ukhamxa.

10Ukhamarus Hiram chachan luqtirinakapampi, Salomón reyin jaqinakapampix Ofir chiqat quri apanipkatayna ukanakax, sándalo sat lawanakampi, munkañ qalanakamp uka chiqat apanipxarakïna.

11Reyisti sándalo lawanakampix Tatitun utapataki, reyi utatakisa makhatañanakan katt'asiñanakap lurayäna, musiconakatakisti arpanaka, salterionaka lurayarakïna. Janipuniw kunapachas Judá uraqin ukhamax uñjañäkänti.

12Salomón reyisti chuymapatjam Sabá markankir reinarux, taqi kuntix jupax maykäna, munkarakïna ukanak churäna, taqi ukanakasti reinax apankatayna ukanakat sipan juk'ampïnwa. Uka qhipatsti reinax amuyt'ayir jaqinakapamp chikaw uraqipar kuttawayxäna.

Salomonan jach'a kankañapampi, qamir yänakapampi(1 R 10.14-29; 2 Cr 1.14-17)

13Salomonax sapa maraw quri katuqäna, ukasti taqpachax pä tunka payan waranqa kilo qurïnwa,

14ukarusti janiw alakip luririnakana, yaqha markar saririnakan qullqinak churatapax jakhutäkänti. Ukhamarus Arabiankir reyinakasa, marka apnaqir jilïrinakas Salomonatakix quri, qullqi apanipxäna.

15Salomón reyix pä pataka jach'a jark'aqasiñanak lurayäna, ukanakasti suma qurit luratänwa, sapa maya jark'aqasiñanakarux suxta kilo quriw mantäna.

16Ukatsti kimsa pataka jisk'a jark'aqasiñanak lurayarakïna, sapa mayni jark'aqasiñarux kimsa kilo jila quriw mantäna, ukanaksti “Bosque del Líbano” sat reyi utaruw uchayäna.

17Ukxarusti marfilat mä jach'a reyi qunuña lurayäna, uksti suma qurimpiw lip'ikipayäna.

18Reyi qunuñasti suxta makhatañ patillanïnwa, kayu takt'asiñapasa qurit luratänwa, qunuñan purap thiyapansti ampar ayxatasiñaw utjäna, uka jak'ansti pä sayaskir leonanakaw utjäna.

19Uka suxta makhatañ patillanak thiyansti tunka payan sayaskir leonanakaw utjarakïna. ¡Ukham luratasti janipuniw kawkha markansa utjkänti!

20Salomón reyin taqpach qirunakapax qurit luratkamakïnwa, ukhamarak “Bosque del Líbano” sat utankir qirunakapasa, apnaqañ yänakapasa. Janiw kuna yänakas qullqit luratax utjkänti, Salomonan urunakapansti qullqix janiw sinti yäqatäkänti.

21Reyin barconakapax Hiram chachan luqtirinakapampiw Tarsis markar sarirïna, jupanakasti sapa kimsa marata may kutiw purinipxirïna quri, qullqi, marfil, mononaka, pavo realanak apt'ata.

22Salomón reyix uka uraqinkir reyinakarusti qamirïñatsa, yatiñ kankañanïñatsa taqiniruw atipt'äna.

23Uka uraqinkir reyinakasti taqiniw juparux uñjañ munapxäna, Diosax jupar churkatayna uka yatiñ kankañapat ist'añ munapxarakïna,

24jupanakasti sapa maraw mä churäwi jupatakix apanipxirïna: qurita, qullqit lurat yänaka, isinaka, nuwasiñ yänaka, q'apkir qullanaka, caballonaka, ukhamarak mulanaksa.

Salomonax carronakampi, caballonakampi alakip luri(1 R 10.26-29; 2 Cr 1.14-17)

25Salomonax caballonakapataki, carronakapatakix pusi waranqa uyunakani, ukhamaraki caballot jaliri tunka payan waranqa jaqinakanïnwa, jupanakarusti nuwasiñ carronakan cuartelanakaru, Jerusalenankir reyin uñjiripatakiw uchäna.

26Salomón reyisti kawkïr reyinakatix, Éufrates jawirat qalltasa filisteonakan uraqipkama, Egipto qurpakamarak utjkäna uka reyinakaruw apnaqäna.

27Reyisti Jerusalén markanxa, qullqinak qalanakar uñtat waljpun utjayäna, cedro lawanaksti pampa higo alinakar uñtat utjayarakïna.

28Salomonatakix Musri chiqat caballonak apanirapipxäna, ukhamarak yaqha markanakata.Salomonan jiwxatapa(1 R 11.41-43)

29Salomonan yaqha luratanakapasti qalltat tukuykamax, Natán profetan crónicas sat qillqatapan qillqatawa, ukhamaraki Siló chiqankir Ahías chachan profecía qillqatapana, Iddo sat profetan jutir urunakat parlatap qillqatapanaraki, ukansti Nabat chachan Jeroboam yuqapxat qillqatawa.

30Salomonax pusi tunka marawa, Jerusalenan taqpach Israelar apnaqäna,

31kunapachatix jiwxäna ukkhasti, juparux David awkipan markaparuw imt'xapxäna. Ukatsti jupa lantix Roboam yuqapaw reyit utt'asxäna.