JEREMÍAS 15 - Qullan Arunaka DC

Mutuyäwit yatiyäwi

1Tatitux sarakituwa: “Moisesampi, Samuelumpis nayan nayraqataxar uñstanisipkpan, ukkhas janipuniw nayax aka jaqinakat khuyapayaskiristti. Nayan nayraqataxat mistupxpan, jayar sarapxpan.

2Ukattix jiskt'apxätam: ‘¿Kawkirus sarapxä?’ sasa, ukatsti nayan sutixar akham sarakim:

“ ‘Usumpi jiwarañatak wakichatanakaxa,

usumpi jiwarapxpan;

nuwasïwin jiwarañatak wakichatanakasti,

nuwasïwin jiwarapxpan;

manq'atjam jiwarañatak wakichatanakaxa,

manq'atjam jiwarapxpan;

jayar apatäñatak wakichatanakasti,

jayar apatäpxarakpan’ sasa.

3“Naya, Tatituw uk arsta: Jichhax pusi mutuyäwinak apayanipxäma: Nuwasïwin jiwarapxäta, anunakaw qatatnaqapxätam, siwiq'aranakaw manq'apxätam, ch'uminkir animalanakaw manq'apxarakïtam.

4Taqi kunanaktix jupanakar lurkä ukanakatsti yaqha markanakampix axtasiyäwa, Judá uraqinkir reyipa, Ezequiasan Manasés yuqapan Jerusalén markan jan wali luratanakap layku.

5“Jerusalén, ¿khitis jumat khuyapayasïtam?

¿Khitis jumat jachani?

¿Khitis k'umar jakasiñamat llakisini?

6Jumax nayar apanukuwayistawa,

maysa uñtxaraktaxa.

Naya, Tatituw arsta.

Ukatpï nayax, llamp'uchasiñan qaritäxatax laykuw

jumar mutuysma, q'al t'unjaraksma.

7Markat anqaruw jaqtansma,

wichhu t'unar uñtat willtansma;

markaxarux jan wawanakan antutarakta,

uka ñanqha jakañap

jan apanukuñ munatapat t'unjarakta.

8Jupanak taypinsti ijma warminakxa,

quta ch'allanakat sipansa

juk'ampi waljan jaytarakta.

Chika urpachaw jiwañ puriyanirakta,

wayna yuqanakani warminakxarusa,

akatjamat llakisiñampi axsarañampi puriyanirakta.

9Walja wawanakan taykanakasti,

jan ch'amaniw liwirtapxi;

p'inqachata, jisk'achjataraki,

lupi qhanasa jupanakatakix ch'amakt'xiwa.

Jupanakat yaqhipanakatix jakasipkani ukanakaruxa,

uñisirinakapampiw jiwarayarakï.

Naya, Tatituw uk arsta.”

Jeremías profetan art'asitapa

10¡Ay kunakïkan nayatxa,

taykaxay, jumaw wawachasista

taqinimpi nuwasiñaxataki!

Janiw khitirus qullqi mayt'kti,

janirakiw nayarus mayt'apkituti,

ukampis taqiniw nayarux ñanqhachapxitu.

11Tatay, uka ñanqhachäwinakapax phuqhaspan,

janitix nayax jumaru sum luqtksma ukaxa,

janitix nayax uñisirinakaxatak achikt'asksma

kunapachatix jupanakax llakisiñankapxäna, jan walt'añankapxarakïna ukapachaxa.

Diosax Israelan mutuyäwip yatiyi

12“¿Khitis amsta tuqit jutir markanakar atipjaspa?

13Israel, walja juchanak luratam laykux,

taqi imasitanakamsa,

qamir yänakamsa,

uñisirinakamaruw katuyä,

taqi kunanakatix uraqiman utjki ukanaksa,

inaki apasxapxañapatakiw

jupanakar katuyä.

14Juman jan uñt'at uraqinxa,

uñisirinakaman t'aqhisiyatap tukuyarakïma,

phiñasiñaxasti ninjamaw

jumar nakhantañatakix aqtani.”

Jeremías profetax Tatituruw mayi

15Tatay, jumax taqi kun yattaxa,

juma laykuw jisk'achatas uñjasta.

¡Nayat amtasisax nayar yanapt'iriy jutam!

¡Janikiy ukhamak qhiparamti,

khitinakatix nayar arknaqapkitu,

ukanakar mutuyam

janïr nayar jiwaykipana!

16Jumax nayar parlxaykista ukapachaxa,

arunakam nayax manq'jam manq'antäyäta;

uka arunakamaw chuymaxarux kusisiyarakïna,

taqi ch'amani Dios Tatitu,

nayax juman wawamätwa.

17Nayax khitinakatix aliq kusist'añak munapki,

ukanakampi chikachasiñ janiw munkti;

jumax nayar katuntasista ukat aksarusti,

sapakiw sarnaqxta,

q'apisiñamaw nayar phuqhantitu.

18¿Kunatsa t'aqhisiñaxax jan tukusi?

¿Kunatsa chhuxrinakaxas jan waliptirjamäki,

taqi qullanakampis jan qullkayäki?

Nayatakix mä chhaqtir umar uñtataw tuktaxa.Tatitun arusxatatapa

19Ukhamasti Tatitux sarakituwa:

“Nayan ukarutix kuttanxäta ukkhaxa,

nayax katuqxämawa,

kuntix nayatak lurañamäki

ukarak lurxarakïta.

Jan wal arsuñamtix apanuküta,

kunatix arsuñamäki ukak arsurakïta ukkhasti,

jumax naya lantiw arsüta.

Jupanakaw juman ukarux kuttanxañapa,

janiw jumati jupanakan ukarux kuttañamäki.

20Nayasti jumarux aka markatakix

broncet lurat jan atipjkay pirqjam tukuyarakïma.

Jumarux wal nuwantapxätam,

ukampis janiw atipapkätamti,

nayaw jumampi chikäskta,

jumar qhispiyañataki.

Naya, Tatituw uka arunak arsta.

21Ñanqha jaqinakan amparapat antutayäma,

¡qhuru jaqinakan amparapat qhispiyarakïma!”