2 CRÓNICAS 11 - Qullan Arunaka DC

1Kunapachatix Roboam reyix Jerusalenar purkäna ukkhaxa, Judá, Benjamín ayllunkiri wila masinakapat patak kimsaqallq tunka waranqa ajllita soldadonakaruw Israelitanakampi nuwasiñatakix tantacht'äna, ukhamat marka apnaqañap kutsuyasiñataki.

2Ukampis Tatitux Semaías sutini, Diosankir chacharuw parläna, juparusti sänwa:

3“Salomonan Roboam yuqapar yatiyam, Judá markankir reyiparu, ukatsti Judá, Benjamín ayllunkir taqi israelitanakar yatiyarakim,

4jan jupanakax jilanakapampi ch'axwapkpanti. Jan ukasti, utanakaparkam sarxapxpan, nayan ukham wakichatax layku” sasa.

Jupanakasti Tatitun arunakap ist'asax kuttawayxapxänwa, janiw Jeroboam reyimpi nuwasirix sarkxapxänti.

III. JUDÁ MARKAN REYINAKAPA(11.5—36.23)Roboam reyin nayrar sartatapa

5Roboam reyix Jerusalén markan sum utt'asïna, ukatsti sayt'asiñatak jach'a pirqanakan markanak Judá uraqin lurayäna.

6Ukanakasti: Belén, Etam, Tecoa,

7Bet-sur, Socó, Adulam,

8Gat, Maresá, Zif,

9Adoraim, Laquis, Azecá,

10Sorá, Aialón, Hebrón. Uka markanakasti Judá, Benjamín ukanakan jach'a pirqanakani markanakapänwa.

11Sayt'asiñatak pirqanak sum lurayasinsti, uka markanakxarux jilïr irpirinak uchäna, ukhamarak manq'añanaka, aceite, vino, taqi ukanaka.

12Ukhamarus taqi uka markanakarux jark'aqasiñanaka, lanzanaka sapa maya markarux lakintäna, walpun uka markanakar wakichrantäna. Roboam reyisti, Judá, Benjamín markanakarux ukham apnaqäna.

13Taqpach Israelankir sacerdotenakampi, levitanakampix taqi chiqanakat jupampi chikachasiñatakix jutapxäna,

14levitanakasti uywa awatiñ uraqinakapsa, yapunakapsa apanukuwayapxänwa Jerusalenaru sarxañataki, ukhamarak Judá uraqinkir yaqha chiqanakar sarxañataki, Jeroboam reyisa, jupa lanti utt'asir reyinakas Tatitur luqtañ luräwinakat jupanakar jark'apxatap layku.

15Jeroboam reyix qullu patanakan yaqha diosanakar luqtapxañapatak jupakiwa sacerdotenaka utt'ayasïna, supayanakar yupaychañataki, jupax lurkatayna uka vaca qallunakar yupaychañataki.

16Ukhamarusa, khitinakatix chiqa chuymampi Israelan Tatit Diosapar thaqtañ amtanïpkäna ukanakasti, sacerdotenakjama, levitanakjamarakiw Jerusalenar sarxapxäna, wilañchanaka nayra awkinakapan Diosapar luqtiri.

17Ukhamat Judá uraqinkir marka apnaqäwi ch'amañchapxäna, Salomonan Roboam yuqaparux kimsa maraw yanapapxäna, jupasti uka kimsa marakiw David, Salomón awkinakapan sarnaqäwiparjam arkäna.

18Roboam reyix Jerimot chachan Mahalat sat phuchhapampiw jaqichasïna, jupax Davidampina, Abihailampin wawapänwa, uka warmix Eliab chachan phuchhapänwa, Jesé chachan allchhiparaki.

19Roboam reyimpina, Mahalat warmimpin wawanakapasti: Jehús, Semarías, Záham jupanakänwa.

20Ukxarusti jupax Absalón chachan Maacá phuchhapampiw jaqichasïna, wawanakapasti: Abiam, Atai, Ziza, Selomit jupanakänwa.

21Roboam reyix tunka kimsaqallquni warmini, suxta tunka uñt'atanïnwa, ukampis taqi warminakapat sipansa, Maacá warmiparuw sinti munasïna. Jupasti pä tunka kimsaqallqun yuqall wawani, suxta tunka imill wawanïnwa.

22Roboam reyix Maacá warmipan Abiam yuqaparuw jilanakapan irpiripat utt'ayäna, jupax Abiam yuqapan reyïñap munäna.

23Jupan mä suma amtäwipaw utjäna, Judá, Benjamín uka uraqinaka yuqanakaparux lakiräna, sayt'asiñatak jach'a pirqanakan markanak taypin jilïrit jupanakar utt'ayäna, jupanakarusti jilarkir manq'añak churäna, ukhamarak walja warminak thaqharapïna.