NÚMEROS 32 - Qullan Arunaka DC

Rubén, Gad ayllunkirinakax Jordán jawirat inti jalsu tuqiruw utjantasipxi(Dt 3.12-22)

1Rubén, Gad ayllunkir jaqinakan uywanakapax waljapunïnwa. Jupanakasti Jazer uraqimpi, Galaad uraqimpi, uywanak uywañatak wali suma uraqïtap uñjasinxa,

2Moisesampiru, Eleazar sacerdotempiru, markan jilïrinakapampir jikxatiriw sarapxäna, ukat jupanakar sapxäna:

3—Uñtapxam: Atarot, Dibón, Jazer, Nimrá, Hesbón, Elalé, Sebam, Nebo, Beón uka uraqinakax

4uywanakatak suma ch'uxñanakan uraqinakawa, nanakansti walja uywaw utjapxitu. Tatituw uka uraqinak markapatak katuntawayi.

5Jumanakan amuyatamat walïspa ukkhaxa, nanakar uka uraqinak churapxita, ukatsti Jordán jawir khurkatar jan makhatayapxistati —sasa.

6Moisesasti jupanakarux sänwa:

—¿Jumanakasti akanti qhiparañ munapxta, marka masinakaman nuwasïwir sarañapkamasti?

7¿Kunatarak israelitanakar mayjt'ayañ munapxtasti, Tatitux churapktam uka uraqir jan mantapxañapatakisti?

8Uka kipkarak awkinakamax lurapxäna, jupanakar nayax Cadés-barnea chiqat uka uraqinak uñakipir khitkäyät ukkhaxa.

9Jupanakax Escol sat jisk'a jawirkam purisin uka uraqinak uñatatanipxäna, ukat israelitanakarux mayjt'ayapxäna, Tatitux churkatayna uka uraqir jan mantapxañapataki.

10Ukat Tatitun q'apisiñapax ukürun aqtäna, juramentompiw jupax arsurakïna:

11“Nayar taqi chuyma jan iyawsapxatap layku, juramentompiw arsta Egiptot mistunipki uka jaqinakax janiw maynis pä tunka maranit amstarux mantkaniti, kawkïr uraqtix Abraham, Isaac, Jacob nayra awkinakapar churañatak nayax arsuwaykta uka uraqiruxa.

12Caleb sat Jefuné chachan yuqapampi, Josué sat Nun chachan yuqapampikiw mantapxani, nayar iyawsapxatap layku” sasa.

13Tatitun q'apisiñapaw Israel markatak aqtäna, ukat jupanakar wasaran pusi tunka mara uksar aksar sarnaqayäna, jan wali luräwinakapampi jucha lurapkatayna uka jaqinakan taqpach jiwarañapkama.

14Jichhasti jumanakax jucha lurir awkinakan wawanakapa, awkinakamjamaw lurañ munapxaraktaxa, Israel markatak wasitat Tatitun q'apisiñap aqtayañataki.

15Jumanakatix Tatitur jan arkañ munapkstaxa, jupax walja maranakampiw israelitanakarux wasaran sarnaqayani, ukatsti jumanakaw juchanïpxäta jupanakan t'unjat uñjasiñapataki —sasa.

16Ukapachaw jupanakax wasitat Moisesar jak'achasisin sapxäna:

—Nanakax aka chiqan uywanakaxatak uywa uyunak lurapxä, wawanakaxatakisti markanak sayt'ayapxarakï.

17Ukampis nanakax ejerciton nayraqatap sarantapxä, ukatsti mayni ayllunakamp chikaw nuwasiñatak wakichrantasipxä, jupanakan jakañatak uraqip utjañapkama. Ukchañkamasti wila masinakaxax suma sayt'ayat markanakan qhiparapxani, uka chiqan jakirinakax jupanakar jan kuna jan walsa lurasipkañapataki.

18Mayni israelitanakax jakañatak uraqipar utt'asipkani ukapachaw nanakax uraqixar kuttanxapxä.

19Nanakax janiw jupanakamp kuna uraqsa Jordán jawirat khurkatankirit jaljasiñ munapkti, nanakan katuqäwixax akankiwa, jawirat inti jalsu tuqina.

20Ukxaruw Moisesax jupanakar säna:

—Jumanakatix ukham lurañ munapxstaxa, wakichrantasipxam, nuwasïwir sarantapxam.

21Jordán jawir khurkatar wakichrantat makhatapxam, ukatsti Tatitun yanapapamp uñisirinakamar jupan jaqunukuñapkam ch'amamp nuwasipxam.

22Tatitux uka uraqi katuntkani ukapachasti, jumanakax utanakamaruw kuttanxapxäta, ukampix arsüwinakamsa Tatit nayraqatana, Israel marka nayraqatansa phuqhapxätawa. Aka uraqisti, Tatitun arsutaparjamaw jumanakankani.

23Ukampis janitix ukham lurapkätaxa, Diosatakiw juchachasipxäta, uka jucha luratat mä uruw mutuñax jumanakatak purinini.

24Ukhamasti utamankirinakatak markanak sayt'ayapxam, uywanakamatakis uyunak lurapxam, arsutanakamarusti phuqhapxarakim —sasa.

25Gad, Rubén ayllunkirinakax ukxaruw Moisesar sapxäna:

—Nanakax juman luqtirinakamäpxtwa, arsutamarjamaw lurapxä.

26Nanakan warminakaxampi, jisk'a wawanakaxampi, taqpach uywanakaxampix, aka Galaad markanakan qhiparapxani,

27nanak luqtirinakamasti, wakichrantasisin Tatitun arsutapar jaysasin nuwasïwirux sarantapxä, jumax sapkista ukhamarjama —sasa.

28Moisesasti Josué chachampi, Eleazar sacerdotempi, Israelan ayllunakapan jilïrinakapampiw parläna, jupanakarusti akham säna:

29—Gad, Rubén ayllunakankir taqpach jaqinakapatix jumanakamp chika Jordán jawir wakichrantat makhatapxani, Tatitun arsutapar jaysasa, jumanakan uka uraqi katuntañamkamaxa, ukapachasti jumanakax Galaad uraq jupanakar churapxäta.

30Ukampis jupanakatix arsutanakaparjam jan phuqhapkanixa, Canaán uraqin jupanakax jumanak taypin jakir sarapxani —sasa.

31Ukxaruw Gad, Rubén ayllunkirinakax sapxäna:

—Nanaka, juman luqtirinakamax Tatitun arsutaparjamaw lurapxä.

32Wakichrantataw Tatitur jaysas Canaán uraqir makhatapxä, ukampis nanakax Jordán jawirat akkatan jakiriw kuttanxapxä. Akäniw nanakan uraqixaxa —sasa.

33Ukhamaw Moisesax Gad, Rubén ayllunkirinakaru, Manasesan chikat ayllupar uka uraqit churäna. Sihón sat amorreo reyin uraqinakapa, ukhamarak Og sat Basán reyin uraqipa, jupanakan markanakapampi, markanak muyuntir pampanakapampi.

34Ukatsti Gad ayllunkir jaqinakax, Dibón, Atarot, Aroer sat markanak wasitat sayt'ayapxäna,

35ukhamarak Atarot-sofán, Jazer, Jogbehá,

36Bet-nimrá, Bet-arán uka markanakampi, uka markanakar sum uyuchrantapxäna, uywanakapatakis uywa uyunak lurapxarakïna.

37Rubén ayllunkir jaqinakax, Hesbón, Elalé, Quiriataim sat markanak wasitat sayt'ayapxäna,

38ukhamarak Nebo, Baal-meón, Sibmá markanakampi, yaqhip markanakan sutinakapsa yaqha sutimpiw uchapxäna, jupanakan sayt'ayat markanakarusti machaq sutinak uchapxäna.

39Manasés chachan Maquir sat yuqapan saraqirinakapax, Galaad uraqir mantantasin uka uraqi katuntasipxäna, uka uraqin jakir amorreo jaqinakarusti jaqunukupxänwa.

40Ukat Moisesax Maquir chachan saraqirinakaparux Galaad uraqinak churäna, jupanakasti ukan utjantasipxäna.

41Manasés chachan Jaír sat yaqha yuqapax amorreo jaqinakan mä qawqha campamentonakap katuntasïna, ukarusti Havot-jaír sutimpiw uchäna.

42Nóbah chachan tamapankir jaqinakax Quenat uraqi katuntasipxäna, uka thiyanakan utjir markanakamppacha, uka uraqirusti Nóbah sutipampiw uchapxäna.