1 REYES 13 - Qullan Arunaka DC

IV. JUDÁ, ISRAEL MARKA APNAQÄWITA, ELÍAS PROFETAN URUNAKAPKAMA(13—16)Judá markankir mä profetaw Jeroboam reyir tuqinuqi

1Jeroboam reyix altarxan incienso nakhayaskän ukapachaw Tatitun khithanita mä profetax Judá uraqit Betelar purinïna.

2Uka profetasti Tatitun munañapat altaratak jach'at parläna, akham sasa: “Altar, altar: Tatitux siwa: ‘Davidan saraqiripat mä wawaw yurini, jupasti Josías satäniwa, jach'äxani ukkhasti, juma patxan incienso nakhayir sacerdotenakaruw jiwayani, idolonakan yupaychañ utanakapan jumxar incienso nakhayiri jaqinakaru; juma patxan jaqinakan ch'akhanakapaw nakhani’ ” sasa.

3Ukürpachaw profetax muspharkay mä chimpu uñacht'ayäna. Sarakïnwa: “Tatitun yatiyat qhanañchäwi chimpupax akawa: Altarax jisk'a jisk'aruw tukuni; uka altar patxankki uka qhillasti willitattaniwa” sasa.

4Jeroboam reyisti, profetan arunakap Betelankir altaratak arskatayna uka arunak ist'asax, altaratpach amparap luqtanïna, sarakïnwa: “¡Uka jaqir katuntapxam!” sasa. Ukampis kawkïr ampartix luqtankatayna uka amparax tisikiw tukuwayxäna, janiw jupax unxtaykxänti.

5Ukspachaw altarax jisk'a jisk'a tukusïna, altar patxankkän uka qhillasti willitattarakïnwa, kamisatix profetax Tatitun arsutaparjam chimpu qhanañchkäna ukhamarjama.

6Ukat reyix profetar säna:

—Amparaxan k'umaräxañapatak Tatitu Diosamaruy mayirapita —sasa.

Profetasti Tatituruw achikt'äna, ukatsti reyin amparapax nayrjam k'umarakïxänwa.

7Ukat reyix profetar säna:

—Nayamp chik utaxar sarañäni, mä kunsa manq'asiñamataki, nayasti mä churäwi jumar katuyäma —sasa.

8Ukampis profetax ukxaruw reyir säna:

—Janiw nayax utamar sarkiristti, reyi utamat chikatpach churkitasma ukasa, janiw akan t'ant'a manq'käti, umsa umkarakïti;

9Tatitux ukham nayar situ: “Janiw t'ant'a manq'ätati, janiw umsa umätati, janirakiw sarkta uka pachpa thakhinjamsa kutt'awayätati” sasa.

10Ukatsti profetax yaqha thakhinjam sarawayxäna, ukhamat Betel chiqar sarkatayna uka pachpa thakhinjam jan kutt'añataki.

11Khä urunakansti mä awki profetaw Betel markan jakasïna, wawanakapasti kuntix Judá uraqinkir profetax, khä urun Betel chiqan lurkatayna ukxat jupar yatiyapxäna; ukhamaraki kuntix reyix uka profetar siskatayna ukanaksa.

12Ukatsti awkipax jupanakar jiskt'änwa:

—¿Kawki thakhinjamsa sarxi? —sasa.

Wawanakapasti kawkïr thakhinjamtix Judá uraqinkir profetax kutt'awaykatayna uka thakhi uñacht'ayapxäna.

13Ukat wawanakaparux säna:

—Asno wakt'ayarapipxita —sasa.

Jupanakasti iyawsasaw wakt'ayarapipxi, profetasti asnor lat'xatawayasaxa,

14Judá uraqinkir profetan qhipap mistuwayi. Ukatsti profetarux encina sat quqa kayun qunt'atäskir jikxatäna, ukat jupar jiskt'arakïna:

—¿Jumätati Judá uraqit jutir profetaxa? —sasa.

Profetasti sänwa:

—Jïsa, nayätwa —sasa.

15Awki profetasti sänwa:

—Utaxar t'ant'a manq'asir sarañäni —sasa.

16Ukampis Judá uraqinkir profetax sänwa:

—Janiw jumamp chika sarkiristti, janiw utamarus mantkiristti, janirakiw jumamp akan manq'kiristti, umsa umkarakiristti;

17Tatitux qhan nayar situ: “Janiw akan t'ant'a manq'ätati, umsa umätati, sarkta uka pachpa thakhinjamsa janirakiw kutt'ätati” sasa.

18Ukampis awki profetax saskakïnwa:

—Nayax jumjam profetarakïtwa, mä angelaw Tatitun arupar jaysasin parlitu nayax utaxar irpasina manq'ampi, umampi jumar churañaxataki —sasa.

Judá uraqinkir profetax janiw uka awki profetan k'arisitap yatkänti,

19ukat jupamp chika utapar sarasax manq'äna, umarakïna.

20Jupanakax manq'asipkäna ukkhasti, Tatitux awki profetaruw parläna, khititix Judá uraqinkir profetaru kutt'ayankäna ukaru,

21awki profetax Judá uraqinkir profetaruw jach'at sarakïna:

—Tatitux siwa: “Jumax Tatitun arunakapar jan jaysatama, Tatitu Diosaman arsut arunakap ist'kasasa, jan phuqhatama,

22Tatitux kawkhantix jan uk lurañamataki sisktam ukkharuw manq'iri, umiri kuttawaytaxa. Uka layku, jiwxäta ukapachaxa, janiw nayra awkinakaman amay imäwipar imt'atäkätati” —sasa.

23Kunapachatix Judá uraqinkir profetax manq'aña, umañ tukuyxän ukkhasti, awki profetax asno wakt'ayarapïna,

24ukatsti Judá uraqinkir profetax sarawayxänwa. Ukampis thakhin mä leonaw jalxatasin jupar jiwayäna, janchipasti thakhin jaqtataw uñjasïna. Asnompi, leonampisti uka jiwat thiyankasipkänwa.

25Uka thakhi chiqanjam sarir jaqinakasti, jiwatar thakhin liwtat uñjawayapxäna, leonarusti jiwatan thiyapankaskir uñjapxarakïna. Ukatsti awki profetan jakäwi markapar purisasti, uñjaniwayapkatayna ukxat uka jaqinakax yatiyapxäna.

26Awki profetasti ukham yatisinxa, jach'at arsüna: “Ukax Tatitun arupar jan ist'ir profetawa. Ukat Tatitux mä leonampi katuntayi, jupar jisk'a jisk'a tukjasin jiwayaraki, kunjämtix Tatitux jupar siskatayna ukhamarjama” sasa.

27Ukatsti awki profetax ukspachaw wawanakapar mä asno wakt'ayañapatak mayïna, jupanakasti ukham lurapxäna.

28Profetasti sarawayasinxa, jiwatarux thakhin jaqtatäskir jikxatäna, uka thiyansti asnompi leonampiw ukankaskarakïna. Leonasti janiw jiwatarux manq'antkataynati, asnorus janirakiw jisk'a jisk'a tukjkataynati.

29Ukatsti awki profetax Judá uraqinkir profetan jiwat janchip aptasin, asno patxaruw khumxatäna, ukat markapar apasxäna, purisinsti jupat jachäna ukat janchip imt'xarakïna.

30Ukatsti jiwat janchip amay imäwiparuw imt'xäna, ukan jupat wararis jacharakïna: “¡Jilataxaya!” sasa.

31Imt'xasinsti wawanakaparuw säna:

—Nayax jiwkä ukapachax, Diosan wawapax imantatäki uka pachparuw imt'xapxitäta, ch'akhanakaxsa jupan ch'akhanakap thiyaruw uchxapxäta,

32chiqpachansa, kuntix jupax Tatitur jaysasin Betel chiqankir altaratak qhanañchawayki ukax phuqhasiniwa, ukhamaraki Samarian taqi markanakapana utjir yupaychañ utanakapatak qhanañchatanakapasa —sasa.

33Ukhamäkipansa, Jeroboam reyix janiw jan wali sarnaqäwinakap apanukkänti, jan ukasti, qullu patanakankiri yupaychañ utanakapatakix wasitat jaqinak taypit sacerdotenak utt'ayäna. Khititix sacerdotëña munkän ukaruxa, Jeroboam reyix qullu patanakan utjir yupaychañ utanakan sacerdotepat utt'ayäna.

34Uka luratapaw Jeroboam reyin saraqirinakaparux juchar puriyäna, uka laykurakiw taqi tukjata uñjasirakïna.