ABDÍAS 1 - Qullan Arunaka DC

I. EDOM MARKAN JACH'A JACH'A TUKUTAP LAYKU, QHURÜTAP LAYKU AXSARAYAÑ ARUNAKAEdom markan jisk'achat uñjasitapa

1Tatitux mä unañchäwi tuqiw Abdías profetar yatiyäna.

Tatitun mä yatiyäwip ist'apxta;

mä yatiyiriw markanakar yatiyir sari:

“¡Sartasipxam! ¡Edom markar nuwantir sarañäni!” sasa.

Tatitusti Edom markarux siwa:

2“Taqi markanak taypin jisk'aruw tukuyäma,

walrak jisk'achjäma.

3Jach'a jach'a tukutamaw sallqjtamxa.

‘Janiw khitis liwiqkitaspati sistawa:

Nayax qarqa p'iyanakan jakasta,

alay qullunakan utjasirakta’ sasa.

4Ukampis mä pakar uñtatasay alayar makhataskam,

warawaranak taypirusay tapachasiskam,

ukatpach jumarux jaquqanïma.”

Tatitux siwa:

5“Lunthatanakatix arum jutasin lunthatsupxiristamxa,

janiw taqpach apasipkaspati;

uva apthapirinakatix juman ukar jutapxaspaxa,

yaqhip uva wayunak jilt'ayawayapxaspawa.

Ukampis juman uñisirinakamax

q'alpun tukjawayapxtam.

6¡Jumarusti Esaú, yänakam q'ala apaqapxtamxa!

¡Qamir yänakamsa jan mayan q'alpun lunthatsupxtamxa!

7Jumampi arust'asir markanakasti taqpachaniw sallqjapxtam;

pachpa uraqimatsa jayaruw apanukupxtamxa.

Pachpa masinakamas

jumatakiw sayt'asxapxi,

alkatasirïkta uka masinakamas sipita wakicharapiraktamxa.

¡Edom marka, jan amuyt'asirïtawa!”

8Tatitux siwa:

“Edom markar mutuykä uka urux,

taqi amuyt'an jaqinakaparuw tukjä,

qullunakapan jakir jaqinakatsa

amuyt'asiñanakap apaqarakïwa.

9Temán sat markan nuwasir jaqinakapasti

axsarañatsa khathatipxaniwa,

Edom markan qullunakapansti

taqiniw nuwasïwin jiwarayat uñjasipxani.

Edom markan juchanakapa

10“Jumasti Edom, sinti p'inqachjataw uñjasïta,

wiñayatak tukjataw uñjasirakïta,

Jacob jilamar chhuxriñchjatamata,

jupar jiwayatamata.

11Kunapachatix uñisirinakax markan qamir yänakap q'ipsupkäna,

yaqha markankir soldadonakax

Jerusalén markan punkunakap t'unjapkäna ukapachaxa,

¡jumax jan kun yatiriw tuktaxa!

Kunapachatix jilt'ir yänakapsa aljasipkäna,

taqi imasit yänakapsa apasxapxän ukkhaxa,

¡jumax jupanakjamaw tuktaxa!

12Jilamax chijir purkän uka urux

janiw kusisiñamäkänti,

Judá markax aynacht'kän uka urusti

janirakiw kusisiñamäkänti,

llakisiña urupansti

janiw jupanakat sawkasiñamäkänti.

13T'aqhisiñ urupansti markaxarux

janiw mantañamäkänti.

Chijir puritapatsa, jan walt'añ urupansa,

janiw kusisiñamäkänti,

aynacht'añ urupansti,

janiw qamir yänakap lunthatañamäkänti.

14Janirakiw thakhi p'allqanakansa,

jaltirinakar jiwayañatak suyxatañamäkänti.

Janirakiw t'aqhisiñ urun jaltirinakarus

uñisirinakapampi katuntayañamäkänti.

15“Kunjämtix mayninakar lurkta

ukham luratarakiw uñjasïta;

¡luratamatjam jichhax katuqäta!

II. TATITUN URUPAMPI, MARKANAKAR TARIPÄWIMPI(15b-18)Israel markan jach'ar aptatäxatapa

“Tatitun urupax niya jak'ankxiwa,

taqi markanakar taripañataki.

16Kunjäm k'allk'ükäntix jumanakan umañamax

nayan qullana qulluxanxa,

ukhama k'allk'urakïniwa yaqha markanakan umañapaxa,

jupanakasti juk'at juk'at umantapxani;

ukatsti taqiniw tukusipxani.

17Ukampis Sión qullux mä qullana chiqawjäniwa,

ukaruw yaqhipanakax jaltxapxani.

Jacobun wawanakapasti uraqinakap

wasitat kutkatayasxapxani;

18Jacobun wawanakapax ninäniwa,

Josean wawanakapasti lawrkir ninäniwa;

Esaun wawanakapasti t'unar uñtatäniwa,

uka ninaw jupanakar q'al nakhantani.

¡Esaun wawanakapax janiw maynis qhispkaniti!

Naya, Tatituw uk arsta.”

III. TUKUY ARUNAKA(19-21)

19-20Néguev chiqankir israelitanakax Edom markan qullunakap katuntasipxani, pampankirinakasti filisteonakan uraqinakap katuntasipxani. Efrainan uraqinakapsa, Samaria uraqsa katuntasipxarakiniwa. Benjaminan wawanakapasti Galaad uraqi katuntasipxani. Israelitanakat waljani yaqha markanakar katuntat apayatanakasti, cananeonakan uraqinakap katusipxani, Sarepta markakama; Jerusalén markachirinakasti, khitinakatix Sefarad chiqar apatapkäna ukanakaxa, Néguev tuqinkir markanak katusipxarakini.

21Jupanakasti taqiniw Sión qullur makhatapxani, atipjir markjama; jach'a jach'a tukuri Edom markarux jupanakaw apnaqani, ¡nayasti, reyipäyäwa!