PROVERBIOS 22 - Qullan Arunaka DC

1Walja qurinïñat sipana, walja qullqinïñat sipana,

suma jaqit uñt'atäñaw juk'amp askixa.

2Qamir jaqisa, jan kunan jaqis khuskhakiwa;

panpachaniruw Tatitux irnuqi.

3Ch'ikhi jaqix jan walt'añ uñjasinxa, jaltxiwa,

jan amuyt'asir jaqisti, saraskakiwa, ukat t'aqhisiraki.

4Llamp'u chuymamp Tatitur axsartas sarnaqañaxa,

qamir kankañampi, jach'ar aptatäñampi, jakañamp katuqañawa.

5Ñanqha lurir jaqin sarnaqäwipax sipitanakamp phuqhantatawa,

suman sarnaqañ munir jaqisti, ukanakat jithiqtiwa.

6Wawarux jisk'atpach sarnaqäwipan sum yaticham,

awkïxani ukkhasti janiw uka yatichäwinakat armaskaniti.

7Qamir jaqix pist'añan jakasir jaqinak taypinxa, reyiwa;

qullqi mayt'iristi, manusir jaqinak taypinxa reyirakiwa.

8Jan walinak yapuchir jaqix, jan walinak apthapirakini;

¡Tatituw jupar tukjani q'apisiñ jach'a kankañapampi!

9Khuyapayasiñampi mayninakar uñjir jaqix askinak katuqani,

t'ant'ap jan kunan jaqinakamp jaljt'asitap layku.

10Pitusir jaqir jaqunukum, jachjayasiñanakasti tukusxaniwa,

ch'axwañanakasa, chuym ust'ayasiñanakas sayt'xaniwa.

11Reyix qhana chuyman jaqiruw muni,

quña arumpi parlir jaqimpiw suman sarnaqasiraki.

12Tatitux yatiñan jaqiruw sum imaski,

k'ari jaqirusti p'inqachayiwa.

13Jayra jaqix jan irnaqañ munasin siwa:

“Mä leonaw anqan utji, thakhinpach jisk'a jisk'a tukjitaspa” sasa.

14Jan wali sarnaqir warmin lakapax wali manqha phuch'ur uñtatawa;

Tatitur q'apisiyir jaqinakasti ukaruw jalanti.

15Pisi amuyt'amp lurañax waynanakan amuyupawa;

ukampis ukax jawq'ampi chiqachatawa.

16Qamiriptañ munasin jan kunaninakar lunthatirixa,

jan kunaniw tukusini.

IV. KIMSÏR CHHIJLLATA: “YATIÑAN JAQINAKAN SÄWI ARUNAKAPA”(22.17—24.22)Yatiñan jaqinakan kimsa tunka säwi arunakapa

17Yatiñan jaqinakan säwinakapar taqi chuymamp ist'am,

yatichksma ukanak amuyt'arakim.

18Chuymaman imxäsiñax kusisiyätamwa,

ukhamat taqpachan mayaki arsuñataki.

19Jichhüruw nayax jumar yatiysma,

Tatitur taqi iyawsañ chuymamp alkatañamataki.

20Nayax kimsa tunka säwi arunak qillqarapsma,

ukanakasti suma iwxa arunakawa, yatiñ arunakarakiwa,

21chiqa kankañ uñt'añam yatichañataki,

ukhamat jumar jiskt'asirinakar sum arusxatañ yatiñamataki.

- 1 -

22Jan kunan jaqitxa jan kuns aparamti jan kunanïtap layku,

janirak taripirinak nayraqatansa jupar t'aqhisiyamti,

23Tatituw jupan arxatiripaxa,

jupar t'aqhisiyirinakarusti t'aqhisiyaniwa.- 2 -

24Qhuru jaqinakampix jan chikachasimti,

janirak tuqisiñ chuyman jaqinakamp sarnaqamti,

25jupanakan jan wali luräwinakap jan yatiqasiñamataki,

jakañamar sipit jan uchasiñamataki.

- 3 -

26Janipun yaqha jaqinakan manunakap phuqhañatak arsumti,

27jan kunampi phuqhirjamäkätaxa,

ikiñamamppach aparapxätam.

- 4 -

28Nayra awkinakaman uchat qurpanakxa,

jan jithinaqayamti.

- 5 -

29Lurañap sum lurir jaqix,

reyinakan luqtiripäniwa,

janiw jan yäqat jaqinakan luqtiripäkaniti.