1Josiasax kimsaqallqu maranïkän ukapachaw marka apnaqañ qalltäna. Jupasti Jerusalén markan kimsa tunka mayan maraw Judá marka apnaqäna. Taykapax Jedidá sutinïnwa, jupasti Boscat chiqankir Adaías chachan phuchhapänwa.
2Josías reyin luratanakapasti Tatitun nayraqatapan chiqapänwa; jupasti David nayra awkipan sarnaqäwiparjamaw arkäna.
Hilquías sacerdoten kamachi qillqat jikxatatapa(2 Cr 34.8-33)3Kunapachatix Josías reyix tunka kimsaqallqun mara Judá marka apnaqaskän ukkhaw, jupax Tatitun utapar khithäna, Asalías chachan Safán yuqapa qillqiriparu, Mesulaman allchhiparu. Reyisti sänwa:
4—Hilquías jilïr sacerdoten ukar saram, juparusti sätawa: “Kuna qullqinaktix jaqinakax Tatitun utapar mantañ punku uñjirinakaru katuyapki ukanak apthappan,
5ukatsti Tatitun utap lurayirinakaru churpan, jupanakasti khitinakatix Tatitun utap askichasipki ukanakaruw irnaqäwipat churapxarakini:
6k'ullu khithurinakaru, irnaqäwinak sarayirinakaru, utachirinakaru, ukhamaraki lawanaka, ch'iyat qalanaka Tatitun utap askichañatak alapxañapataki.
7Jupar sarakïtawa, uka qullqi apnaqapxatapatxa janiw jakthapiñatak mayiñapäkiti, jupanakan chiqa chuymampi apnaqapxirïtap layku” —sasa.
8Mä urusti, Hilquías jilïr sacerdotex, Safán qillqiriruw yatiyäna, Tatitun utapan kamachinakan qillqat jikxatkatayna ukxata; ukatsti juparuw uka qillqat katuyäna, Safán qillqiristi uka qillqat ullaränwa.
9Ukatsti Safán chachax ukxat yatiyiriw reyin ukar saräna, akham sasa:
—Juma, reyin luqtirinakamax Tatitun utapan utjkatayna uka qullqi apthapisinxa, khitinakatix askichayañataki utt'ayatäki uka jaqinakaruw churapxi.
10Ukhamarus, Hilquías sacerdotex aka qillqat jikxatatayna, uksti nayaruw katuyitu. Akax uka qillqataxa —sasa.
Ukat Safán qillqirix reyitak ullart'arapïna.
11Reyisti kuntix kamachinakan siskäna ukanak ist'asin llakisiñat isip ch'iyanuqasïna,
12ukatsti ukspachaw Hilquías sacerdoteru, Safán chachan Ahicam yuqaparu, Micaías chachan Acbor yuqaparu, Safán qillqiriru, Asaías yanapiripampir akham säna:
13—Tatitur jiskt'ir sarapxam, kuntix aka qillqatarjam lurañasax wakiski uk yatiñasataki; Tatitux jiwasanakatak wali q'apisitäpachawa, nayra awkinakasax janiw aka qillqatan arunakapar yäqapkänti, janirakiw aka qillqatanakarjamas sarnaqapkänti —sasa.
14Ukatsti Hilcías, Ahicam, Acbor, Safán, Asaías jupanakax Huldá sat profetisa warmin ukaruw sarapxäna; jupasti Jerusalén markan machaq markäkis ukan jakäna. Huldá warmix, Ticvá chachan Salum yuqapan warmipänwa, Harhás chachan allchhipa. Salum chachax reyin isinakap uñjirïnwa; jiskt'apkäna ukkhasti,
15Huldá profetisa warmix jupanakar akham säna:
—Israelan Tatit Diosapan arupax akawa: ‘Nayar jiskt'ir khithanipktam uka jaqir sapxam,
16naya, Tatituw sista: Nayaw aka uraqirusa, jaqinakapxarus mä jan walt'añ apayanï, kunjämtix uka qillqatan Judá markankir reyix ullarki ukan yatiyatarjama.
17Jupanakax nayar apanukusin yaqha diosanakaruw inciensonak nakhayapxi, taqi uka luratanakapampi nayar q'apisiyasa; ukat nayan q'apisiñaxax aka chiqatak aqti, ukasti janiw t'akurkaniti.
18Jichhax Tatitur jiskt'añatak khithanipktam uka Judá markan reyiparux sapxam: Israelan Tatit Diosapax sarakiwa: Aka qillqatankir arunak ist'asina,
19aka chiqawja uraqitaki, markachirinakapampitaki tukjat uñjasiñapa, ñanqhachatäñapa yatisin chuymam llakthaptayatam layku, llamp'ur tukutamata, isim ch'iyanuqasitamata, nayraqataxan jachatam laykuw, nayax jumar ist'araksma. Naya, Tatituw uk sisma.
20Uka luratam laykuw, nayax samarañan jiwxañama wakiyta, nayra awkinakamampi jikisiñamataki, kuna jan walt'äwinaktix akawja uraqitak apayankä ukanakxa, janiw jumax uñjkätati’ —sasa.
Reyin khithanakapasti, kuna arunaktix Tatitux Huldá profetisa tuqi siskatayna uka arunak reyir yatiyiri kuttawayapxäna.
Who We AreWhat We EelieveWhat We Do
2025 by iamachristian.org,Inc All rights reserved.
