ECLESIASTÉS 2 - Qullan Arunaka DC

1Ukat naya pachpaw chuymaxan sarakta: “Jichhax nayax kusisiñan yant'ä; kunatix sumäki ukampiw jakäwixan kusisi” sasa. ¡Ukampis ukax inamayarukiw tukuwayi!

2Ukat sista: “Larusiñax luqhi kankañawa, kusist'añas janiw kunatakis askïkiti” sasa.

3Amuyuxampi, yatiñ kankañampi apnaqatax vino mallt'añ munasaw machañar katuyasta, jaqix akapachan jakht'at urunakapan kuna asksa jikxataspa, uk yatiñataki.

4Jach'a lurañanak lurta; reyi utanak utachasta; uva yapunakaw utjitäna.

5Nayaw yapunakaxa, panqar yapunakax yapuchasta, uka yapunakarux muxsa achur alinak ayrusta.

6Uma qutacht'añanak lurta, ayrut alinakar umamp qarpañataki;

7chachatsa warmitsa uywatanak alasta, ukhamarus utaxan yuripki uka uywatanakaxaw utjitäna; vacanakasa, ovejanakas nayat juk'amp nayra Jerusalenankapkän ukanakat sipansa, waljapuniw utjitäna.

8Qursa, qullqsa waljpun apthapta, ukanakax yaqha suyun reyinakan yänakapänwa. Q'uchur chachanaka, q'uchur warminakaw utjitäna, jaqinakan kusisiñapan wal kusisiyäta, warminakas waljaw utjitäna.

9Nayax wali aytat jaqïyätwa, nayat nayra Jerusalenan jakapkän ukanakat sipan juk'amp yänakaw utjitäna. Ukhamarus yatiñ kankañaxax janiw nayat saraqkitänti.

10Kuntix munkäyät uk luräyäta; kunampitix kusisiñ munkäyät ukampiw kusisïyäta. Taqi chuymaxampiw luratanakaxat kusisïyäta, ukatsti uka kusisiñaw nayan churäwixäna.

11Ukatsti nayax kuntix lurkäyäta, qawqha ch'amtix irnaqañatak apskäyät uk uñakipta, ukat taqi kunas inamayakïtap amuyarakta, thayarus katthapiñ munksna ukhamakiwa, janiw kuna askis akapachan utjkiti.

12Uka qhipatsti yatiñ kankañata, pisi amuyt'anïñata, jan amuyt'asirïñat lup'irakta: ¿Kunat juk'ampsa nayan qhipaxat jutir reyix luraspa kunatix luratäxi ukatxa?

13Ukat nayax amuyta, yatiñ kankañax pisi amuyt'anïñat sipansa juk'amp askïtapa, kunjämatix qhanax ch'amakat sipan juk'amp askïki ukhama.

14Yatiñan jaqix sum uñjañaruw uchasi, ukampis pisi amuyt'anix ch'amakanjam sarnaqi. Ukatsipana, taqinirus pachpak suyt'atap amuyta,

15ukat sista: “Kunatix pisi amuyt'anirux suyt'ki ukax nayaruw suyt'arakitu, ukhamasti nayatakix wali yatiñanïñax janiw askïkiti. ¡Ukas inamayakiwa!

16Yatiñan jaqitsa, pisi amuyt'an jaqitsa janipuniw khitis amtaskaniti; pachanak mäki sarakipatapatsti taqiw armatäxi, yatiñan jaqisa, pisi amuyt'an jaqis kipkakiw jiwapxi” sasa.

17Nayax jakañar uñisiñaruw purta, kunatix aka uraqin luraski ukax nayatakiw sayt'i. Chiqpachansa, taqi ukas inamayakiwa, ¡thayarus katthapiñ munksna ukhamakiwa!

18Nayax akapachan kuntix lurkäyät ukanak uñisiñaruw purta, ukampis taqi ukanak naya qhipat jutir jaqir jaytañaxäniwa.

19Ukatsti, ¿khitirak naya qhipat jutir jaqin ch'ikhïtapsa, pisi amuyt'anïtapsa yatispasti? Ukatsipana nayax kunanaktix ch'ama tukuñampi, yatiñ kankañamp jikxatkta uk katusini. ¡Ukas inamayarakikiwa!

20Akapachan kuntix nayax lurkäyät uk uñjasinxa, jan inakt'as irnaqataxat wal amtasta,

21maynix yatiñampi, uñt'añampi, suma luraña yatitampi luratapaxa jaytxañatakikiwa, khititix jan lurkäna taqi ukanaka jupan katuntasiñapataki ¡Ukasti inamayakiwa, jan chiqapar uñjañarakiwa!

22Ukhamasti, ¿kuns jaqix akapachan jan inakt'as irnaqasa, llakisisax jikxati?

23Taqi jakäwipas llakisiña, ch'ama tukuñakiwa; janiw amuyupas arumax samart'kiti. ¡Ukax inamayarakikiwa!

24Mä jaqitakix manq'asiña, umaña, irnaqäwipat kusisiña ukakiw juk'amp askixa, ukampis taqi ukas Tatitut jutatap amuyarakta.

25Jan jupäspa ukasti, ¿khitirak manq'aspa, kusisirakispasti?

26Chiqpachansa Tatituw khitirutix munki ukarux yatiñ kankañsa, yatxatañ chuymsa, jan ukax kusisiñsa churi; ukatsipana jucha lurir jaqirux yänak jikxatañapatakiw irnaqayi, ukat khitirutix munki ukar churxañataki. ¡Ukasti inamayarakikiwa, thayarus katthapiñ munksna ukhamakiwa!