ISAÍAS 30 - Qullan Arunaka DC

Egiptompi arxatayasiñ munirinakatak arsutanaka

1Tatitusti siwa:

“¡Ay, kunakïkan kutkatasir israelit jaqinakatakixa,

jan nayar jiskt'asisaw kuns amtapxi,

nayan jan amuyt'ayat amtäwinak wakichapxi,

juchsa mayampi mayamp lurapxi!

2Mäkiw Egiptonkir reyirux yanap mayipxi,

nayar jan jiskt'asaw ukham lurapxi;

uka reyin ch'amaparuw katuyasipxi.

3Ukampis faraón reyix janiw arxatapkätamti,

Egipto markas janirakiw katuqapkätamti.

4Jumanakax Soan, Hanés uka markanakarusa

khithanak khithasipksta ukasa,

5taqiniw uka jan kunatak inamay markampix sallqjat uñjasipxäta,

janirakiw jumanakatakix kuna askinaksa apankaniti,

jan ukasti q'inasiñampi, jan walt'añampik apanini” sasa.

6Profecía arunaka Néguev chiqankir animalanakxata:

Uka axsarkay uraqinakanxa,

axsarkay leonanakaw jakapxi,

katarinakasa, chhiqhan katarinakas ukan thuqhunaqapxi,

uka chiqanjam qamir kankañanakap

asnoru, camellor khumuntat apapxi,

Egipto markaruw jan kunatak inamay apapxi,

7uka jan ch'aman markasti, janiw yanapt'kaniti.

Ukatpï uka markat akham sistxa:

“Jan kun luriri wararir jach'a axsarkañ animala” sasa.

8Tatitusti Isaías profetarux siwa:

Jichhax jutam, kuntix uñjkta uk qillqam,

mä qillqañar taqi ukanak qillqantam,

ukasti qhipa urunakatak qhiparpan,

taqininsa amtaskañapataki.

9Aka markax Tatitur saykatir markawa,

janiw taqi chuymäkiti,

Tatitun yatichäwinakapsa janiw ist'añ munkiti.

10Unañchäwi uñjirinakarusti sapxiwa:

“Uka unañchäwinak jan uñjapxamti”,

profetanakarusti sapxarakiwa:

“Chiqa yatiyäwinak katuqapktas ukanak jan yatiyapxistati,

jan ukasti suma quña arunakak parlt'apxita;

janirak kusisiñanakaxsa apaqapxistati.

11Tatiturux jan ist'apxamti,

chiqa thakhitsti maysar saranukupxam,

janirak Israelan Qullan Diosapatsa parlapxamti” sasa.

12Ukatpï Tatitux sixa:

“Jumanakax aka arunak janiw katuqañ munapktati,

ñanqha lurañanakaru nuwasiñanakaruw alkatapxtaxa,

ukanakarurakiw yanap mayipxtaxa;

13ukatpï, jumanakax juchanïpxtaxa.

K'ak'at jach'a pirqar uñtatäpxtawa,

uka pirqasti akatjamat liwisini;

14ñiq'it lurat chatjam q'ala t'unjatäpxätawa,

uka jik'illitanakax jan kunatak wakiskiriwa,

qhirit nina sank'a apsuñatakisa,

jan ukax phuch'ut uma qichsuñatakisa” sasa.

15Israelan Tatit Diosapasti siwa:

“Nayar wasitat ist'xapxita,

ukatsti nayaw samarañ churapxäma.

Nayarutix chiqpach katuyasipxitäta ukaxa,

samarañan jikxatapxäta,

ukatsti qhispitäsipkätawa” sasa.

Ukampis jumanakax janiw munapktati,

16caballxat jaltxañatakiw wakichasipxtaxa,

wali jalir carronakat sarxañatakiw wakichasipxtaxa.

“Ukhamächi ukaxa, walikiwa,

caballonakxat jaltxapxakchïtaya;

¡ukampis jumanakar arknaqirinakax

juk'amp jaltirinakäniwa!”

17Mä sapa jaqin axsarayatakiw

waranqanakax jaltxapxani;

¡taqi jumanakasti

phisqanin axsarayatakiw jaltxapxäta!

Taqi ukanak ukham lurasitapatxa,

jumanakat juk'anikiw ukan qhiparxapxäta,

kunjämatix mä lawax qullu patan jikxataski ukhama,

jan ukax qullu patan mä chimpükaspas ukhama.

Tatitux khuyapayasiñ arunak markatak arsu

18Ukampis Tatitux jumanakat khuyapayasiñatakiw suyasipktam, jupax walipuniw munasiñap uñacht'ayañ munapxtam, Tatitusti khuyapayasiri chiqap Diosarakiwa. ¡Jupar suyt'irinakax kusisiñanïpxiwa!

19Jerusalenan jakir israelitanaka, janiw juk'ampi jachkxapxätati. Yanap mayisisa arnaqasitamatxa, Tatituw khuyapt'ayasïtam, arnaqasitam ist'asinsti jaysarakïtamwa.

20Tatitux kuna t'aqhisiñanaksa churkchïtam ukasa, jupax janiw imantaskxaniti. Tatituw yatichirimaxa, jumax pachpa nayranakamampiw uñjarakïta.

21Kupi tuqiru, jan ukax ch'iqa tuqirus saranukütaxa, qhipäxamatsti mä aru ist'äta, sarakïtamwa: “Aka chiqaw thakhixa, sarasipkakim” sasa.

22Ukatsti uka qullqit lurat diosamxa, qurimpi jawikipat diosamsa, jan wali yänakäkaspas ukhama, jan ukax t'unäkaspas ukham apanuküta.

23Yapuchasitamar purxatañapatakisti, Tatitux jallu apayanïtam, ukhamat uraqix walja jilarkiri trigo achuntani. Uka urun uywanakamax walja manq'añanïpxaniwa.

24Kawkïr vacanakamatixa, asnonakamas uka yapunakan irnaqapki ukanakax suma chhuxllanak manq'asipxarakini.

25Kunürutix Tatitux uñisirinakamar jiwaraykani, jach'a pirqanakapsa liwirtaykani uka uruxa, uka jach'a qullunakat walja jawiranakaw umampi phuqhantat saraqanini.

26Uka urunxa, Tatituw markapan chhuxrinakap qullart'ani. Ukapachaw phaxsix intjam qhantani, intisti qhanapat sipansa juk'amp qhant'ani, paqallqu intin qhanapäkaspas ukhama.

Tatitux Asiria markaruw mutuyi

27Uñtapxam, Tatitux jupa kipkaw jayatpach jutaski,

phiñasiñapasti mä jach'a ninjamaw nakhaski,

lakanakapasa, laxranakapasa,

q'apisiñapamp phuqt'atawa,

tukjir ninjamarakiwa,

28samanapasti mä jach'a jawirat jilarkir umjamawa,

taqi kunsa q'al chhaqtayaraki.

Tatitux uka markanakar aynacht'ayiriw juti,

q'al atipjiriw jutaraki,

ukhamat maysar saranukupxañapataki.

29Ukampis jumanakax q'uchunak ist'apxäta,

qullana phunchhäwi arumanjama;

chuymamasti wali kusisitäniwa,

pinkillun phust'asitaparjam sarnaqkis ukhama,

ukhamat Tatitun qullupar sarañataki,

Israelan imantasiñ markapar sarañataki.

30Tatitusti jach'a arupa ist'ayani,

jach'a ch'amapsti uñacht'ayarakiniwa,

axsarkañ phiñasiñampiw ukanak lurani,

q'ixu q'ixunakampi, jallumpi,

chhijchhimpi taqi ukanakax

mä aqkir ninjam tukjiriwa.

31Kunapachatix Asiria markax Tatitun arunakap ist'kani ukkhasti,

kuna mutuyäwitix jupatak suyt'aski uk yatini,

ukatsti axsarañampiw phuqhantasini.

32Tatitux sapa kuti jawq'antkan ukkhasti,

tamboranaka, arpanakaw toct'asini.

Tatitusti jupanakarux walpun nuwjani.

33Asiria markataki, reyipatakisa,

t'aqhisiyañ chiqax nayratpach wakichatawa,

uka chiqan ansapasti wali jach'awa, manqharakiwa,

ninasti walja lawanak taypin wal nakharaki.

Tatitun phust'atapaw aqtayarakini,

jach'a azufre jallükaspas ukhama.