AMÓS 1 - Qullan Arunaka DC

I. QALLTA(1.1-2)

1Amós Profetax Judá uraqin, Tecoa sat mä jisk'a markankirïnwa, jupasti ovej awatirïnwa, ukhamaruw Tatitux jupan yatiyäwi arunakap Israel markar parlir sarañapatak jawsäna, Tatitusti uka arunakxa pä mara janïr uraqi khathati purinkipan parläna, uka pachasti Judá markanxa Oziasaw reyïskäna, Israel markansti Jeroboam sat Joás chachan yuqapaw reyïskarakïna.

2Amós profetax sänwa:

Tatitux Jerusalén markana,

Sión qullutpacha wali jach'a arumpi art'ki ukapachaxa,

uywa manq'añ chhuxllanakas q'alaw pharsxi,

Carmelo sat qullus wañsxarakiwa.

II. YAQHA MARKANAKAMPITAKI, ISRAEL MARKAMPITAK TATITUN ARSUTANAKAPA(1.3—2.16)Jak'ankir markanakan taripäwipa

3Tatitux akham siwa:

“Damasco markankirinakax wali ñanqhanakpun lurapxi,

ukat jupanakax mutuyatäpxani,

Galaad markankirinakarux trigo jawq'añampiw jawq'supxi.

4Ukat Hazael reyin utaparux ninampi phichkatäxa,

uka ninasti Ben-hadad yuqapan jach'a utapsa q'al nakhantani.

5Damasco markan punkunakap munkir jan munkir jist'arä;

Bicat-avén chiqan jakirinakaruw tukjä,

Bet-edén marka apnaqirirus t'unjarakïwa,

Sirio jaqinakasti, Quir markar katuntata apatäpxaniwa.”

Ukham siw Tatituxa.

6Tatitux akham sarakiwa:

“Gaza markankir jaqinakax wali ñanqhanak lurawayapxi,

ukat jupanakarux mutuyarakï,

mä markpachar katuntasaw apasxapxi,

Edom markanxa, yaqhanakar luqtapxañapatakiw aljantapxi.

7Ukat Gaza markan uyunakap ninampi phichkatä,

uka ninasti reyi utanakapsa q'al nakhantarakini.

8Asdod markan utjasirinakarux tukjäwa,

Ascalón marka apnaqirirus q'al tukjrakï.

¡Taqi ch'amaxampiw Ecrón markatakix sartä,

jan mayanipuniw filisteonakax jiwarapxani!

Ukham siw Tatituxa.”

9Tatitux akham siwa:

“Tiro markankir jaqinakax wali ñanqhanakpun lurawayapxi,

ukat jupanakarux mutuyarakï;

mä markpachar t'aqhisiyat luqtiritak Edom markar aljantapxatapata,

kawkïr markanakampitix jilapurjam jakasiñatak arust'äwix utjkäna ukar jan phuqhapxatapata.

10Ukat Tiro markan uyunakapsa ninampi phichkatä,

ninasti reyin jach'a utanakapsa q'al nakhantarakini.”

11Tatitux akham siwa:

“Edom markankir jaqinakax wali ñanqhanakpun lurawayapxi,

ukat jupanakarux mutuyarakï;

israelita jilanakaparu jan khuyapt'ayasis espada ayt'at arknaqapxatapata.

Jach'a phiñasiñapasa,

uñisiñapas jilanakapatakix jan tukuskirïnwa.

12Ukat Temán markarux ninampi phichkatä,

uka ninaw Bosrá markan reyi utanakapsa nakhantani.”

13Tatitux akham siwa:

“Amón markankir jaqinakax wali ñanqhanakpun lurawayapxi,

ukat jupanakarux mutuyarakï,

uraqip jach'aptayasiñatakix

Galaad markankir usur warminakan purakanakap kharitatapxäna.

14Ukat Rabá markan uyunakap ninampi phichkatä,

jach'a utanakapasa qhillar tukuñkamaw nakhantani,

ukasti nuwasiñ uruna, arnaqasiñanak taypin jach'a thaya urun lurasini.

15Reyipasti, jaya markar apayataw uñjasini,

jupampi chikasti taqpach jilïr jaqinakapaw sarani.”

Ukham siw Tatituxa.