NÚMEROS 29 - Qullan Arunaka DC

Trompetanak phust'añ kusisiñ uru(Lv 23.23-25)

1“Paqallqür phaxsina, nayrïr uru saraqataruw jumanakax mä qullan tantachasïwi lurapxäta. Uka urusti janiw kuna irnaqañanaksa lurapxätati, trompetanak phust'asaw uka uru yatiyapxäta.

2Tatitur jach'añchas nakt'at mä suma q'apkir waxt'a luqtapxäta, mä urqu vaca qallu, mä urqu oveja, maran paqallqu urqu ovejanaka, uka uywanakasti jan kuna kamacht'atäñapawa.

3Urqu vaca qallump chikax, suxta kilo suma jak'u aceitempi chapuntat waxt'a luqtapxäta; urqu ovejamp chikasti pusi kilo suma jak'u,

4sapa maya urqu oveja qallump chikasti pä kilo jak'u.

5Ukxarux jumanakan jucha luratanakamat pampachayasiñ jikxatañatakix, mä chivo wilañcha luqtapxäta,

6sapa phaxsi nakt'ayat luqtata, sapür nakt'ayat luqtat sipana, grano juyra waxt'apampi, vino waxt'apampi, Tatitun arsutaparjama. Aka luqtax Tatitutak nakt'ayat mä suma q'apkir waxt'äniwa.

Pampachasiñ urun waxt'anak churañxata(Lv 23.26-32)

7“Pachpa paqallqür phaxsina, tunka uru saraqkipana, jumanakax qullan tantachasïwi lurapxarakïta. Ukürusti ayuno lurapxäta, janirakiw kuna irnaqañanaksa lurapxätati.

8Tatitur jach'añchas nakt'at suma q'apkir waxt'a luqtapxäta, mä urqu vaca qallumpi, mä urqu ovejampi, marani paqallqu urqu ovejampi, uka uywanakasti jan kuna kamacht'atäñapawa.

9Urqu vaca qallump chikax, suxta kilo suma jak'u aceitemp chaput luqtapxäta; urqu ovejamp chikasti pusi kilo jak'u,

10sapa oveja qallump chikasti pä kilo jak'u.

11Ukxarusti jucha luratat mä chivo wilañcha luqtapxarakïta, juchanakat pampachasiñ urun wilañchax luqtatäki, sapür nakt'ayat waxt'ax grano juyra waxt'apampi, vino waxt'anakapamp chik luqtatäki ukanakat sipana.

Chhujlla utanak uruyañ urunakan waxt'anak churañxata(Lv 23.33-44)

12“Paqallqür phaxsina, tunka phisqan uru saraqatarusti, jumanakax qullan tantachasïwi lurapxäta. Uka urux janiw kunanaksa irnaqapxätati. Paqallqu uruw Tatitun jach'a kankañapar jach'añchasa uruyapxäta.

13Nayrïr urux Tatitur jach'añchasa nakt'ayat mä suma q'apkir waxt'a luqtapxäta, tunka kimsani urqu vaca qallunaka, pä urqu oveja, marani tunka pusin urqu oveja qallunaka, ukanakasti jan kuna kamacht'atäñapawa.

14Sapaqat urqu vaca qallutxa suxta kilo suma jak'u, aceitemp chaputa luqtapxäta; sapaqat urqu ovejatxa, pusi kilo jak'u,

15sapaqat urqu oveja qallutsti pä kilo jak'u.

16Jucha luratat mä chivo wilañcha luqtapxarakïta, ukasti sapür nakt'ayat waxt'at sipan yaqhäskaniwa, grano juyra waxt'ampi, vino waxt'amp chika.

17“Payïr urusti tunka payan urqu vaca qallumpi, pä urqu ovejampi, tunka pusin mä marani urqu oveja qallumpi luqtapxäta, ukanakasti jan kuna kamacht'atäñapawa.

18Uka luqtanakamp chikasti grano juyra waxt'anakampi, vino waxt'anakamp lurapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakasa, kunjämtix Diosax siski ukhamarjama.

19Jucha luratat mä chivo wilañcha luqtasirakini, ukasti sapüru nakt'ayat waxt'anakat sipan yaqhäskaniwa, grano juyra waxt'anakampi, vino waxt'anakamp chika.

20“Kimsïr urusti tunka mayan urqu vaca qallunak luqtapxarakïta, pä urqu ovejampi, tunka pusin mä marani urqu oveja qallumpi, ukanakasti jan kuna kamacht'atäñapawa.

21Uka luqtanakamp chikasti grano juyra waxt'anakampi, vino waxt'anakamp lurapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama.

22Jucha luratat mä chivo wilañcha luqtapxarakïta, ukasti sapüru nakt'ayat waxt'anakat sipan yaqhäskaniwa, grano juyra waxt'anakampi, vino waxt'anakamp chika.

23“Pusïri urusti tunka urqu vaca qallunak luqtapxäta, pä urqu ovejampi, tunka pusin mä maran urqu oveja qallunakampi, ukanakasti jan kuna kamacht'atäñapawa.

24Uka luqtanakamp chikasti grano juyra waxt'anakampi, vino waxt'anakamp lurapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama.

25Jucha luratat mä chivo wilañcha luqtapxarakïta, ukasti sapüru nakt'ayat waxt'anakat sipan yaqhaskaniwa, grano juyra waxt'anakampi, vino waxt'anakamp chika.

26“Phisqïr urusti llätunk urqu vaca qallunak luqtapxäta, pä urqu ovejampi, tunka pusin mä marani oveja qallunakampi, uka uywanakasti jan kuna kamacht'atäñapawa.

27Uka luqtanakamp chikasti grano juyra waxt'anakampi, vino waxt'anakamp luqtapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama.

28Jucha luratat mä chivo wilañcha luqtapxarakïta, ukasti sapüru nakt'ayat waxt'anakat sipan yaqhaskaniwa, grano juyra waxt'anakampi, vino waxt'anakamp chika.

29“Suxtïr urusti kimsaqallqu urqu vaca qallunakampi, pä urqu ovejampi, tunka pusin mä maran urqu oveja qallunakampi luqtapxäta, ukanakasti jan kuna kamacht'atäñapawa.

30Uka luqtanakamp chikasti grano juyra waxt'anakampi, vino waxt'anakamp luqtapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama.

31Jucha luratat mä chivo wilañcha luqtapxarakïta, ukasti sapüru nakt'ayat waxt'anakat sipan yaqhäskaniwa, grano juyra waxt'anakampi, vino waxt'anakamp chika.

32“Paqallqür urusti paqallqu urqu vaca qallunak luqtapxäta, pä urqu ovejampi, tunka pusin mä marani urqu oveja qallunakampi, ukanakasti jan kuna kamacht'atäñapawa.

33Uka luqtanakamp chikasti grano juyra waxt'anakampi, vino waxt'anakamp luqtapxäta, qawqhäkitix urqu vaca qallunakasa, urqu ovejanakasa, mä maran urqu oveja qallunakas ukhamarjama, kunjämtix Diosax siski ukhama.

34Jucha luratat mä chivo wilañcha luqtapxarakïta, ukasti sapüru nakt'ayat waxt'anakat sipan yaqhäskaniwa, grano juyra waxt'anakampi, vino waxt'anakamp chika.

35“Kimsaqallqür urusti mä jach'a tantachasïwi lurasaw uruyapxäta, uka urusti janirakiw kuna irnaqañanaksa lurapxätati.

36Tatituruw mä suma q'apkir nakt'ayat waxt'a luqtapxäta, mä urqu vaca qallumpi, mä urqu ovejampi, mä maran paqallq urqu oveja qallumpi, ukanakasti jan kuna kamacht'atäñapawa.

37Uka luqtanakamp chikasti grano juyra waxt'anakampi, vino waxt'anakamp luqtapxäta, qawqhäkitix urqu vaca qallunakasa, urqu ovejanakasa, mä maran urqu oveja qallunakas ukhamarjama, kunjämtix Diosax siski ukhama.

38Jucha luratat mä chivo wilañcha luqtapxarakïta, ukasti sapür nakt'ayat waxt'anakat sipan yaqhäskaniwa, grano juyra waxt'anakampi, vino waxt'anakamp chika.

39“Uka wilañchanak jumanakax uruyañ urunakan Tatitur luqtapxäta, chuymanakamatjam waxt'a luqtapkäta, arsuta phuqhasin waxt'a luqtapkäta ukax yaqhäskaniwa, nakt'ayat waxt'äpansa, grano juyra waxt'äpansa, vino waxt'äpansa, jan ukax, sumankthapiñ wilañchäpansa.”

40 40 (1) Ukatsti Moisesax taqi kunanaktix Tatitux jupar siskatayna ukanak israelitanakar yatiyäna.