JEREMÍAS 2 - Qullan Arunaka DC

Israel markan Diosar jan taqi chuyma arkatapa

1Tatitusti nayaruw parlxayitu, akham sasa:

2“Saram, ukatsti Jerusalén markar yatiyanim;

sum ist'apxañapatakix jach'at art'am:

‘¡Akham siw Tatituxa!

Amtasisktwa, jumax tawaqükäyäta

ukapachax taqi chuymaw nayatakïyätaxa,

jumax nayan warmixa tukxäyäta

ukapachasti nayarux wal munasïyästaxa,

wasaranjam nayarux arkanïyästa,

kawkhantix jan kunas achki uka uraqinjama.

3Juma sapakiw nayatakïyätaxa;

¡nayan nayraqat munasitaxäyätawa!

Maynitix kuna ñanqhsa lurchiyätamxa,

nayaw ukarux t'aqhisiñ apayanïyäta.

Naya, Tatituw uk arsta” sasa.

4Jacobun wawanakapa, Israelan taqi wila masinakapa, jumanakax Tatitun arunakap ist'apxam.

5Tatitux jumanakarux sapxtamwa:

“Janiw kuna jan walsa nayra awkinakamarux lurkti,

ukatsipana, jupanakaw nayat jithiqtawayapxi.

Jan kunatak inamaya diosanakaruw yupaychapxi,

jupanakas ina ch'usaruw tukupxaraki.

6Nayar thaqtañatsti janiw llakisipkiti,

nayaw jupanakarux Egiptot irpsunta,

wasaranjam irparakta,

sinti waña uraqinjama,

jach'a jaqhi jaqhi taypnama,

jan umani uraqinjama,

kunayman jan walt'añanakan phuqhantat uraqi,

kawkhantix jan khitis jakki,

janirak khitis sarnaqki uka uraqinjama.

7Nayaw jupanakarux aka suma uraqir irpanta,

ukhamat suma achunakapat manq'apxañapataki.

Ukampis jumanakax jutasinxa nayan uraqix takisipxtawa,

aka uraqixatsti axtasiyapxarakistawa.

8Sacerdotenakax janiw thaqhapkituti,

markaxar yatichañatak uskuta jaqinakasti,

nayar jan uñt'iriw tukupxi,

jilïrinakax nayatakiw sayt'asipxi,

profetanakasti Baal diosan sutipxarukiw parlapxi,

ukatsti uka k'ari diosanakan qhipap arkapxi.

Israel markar juchañchäwi

9“Ukat naya, Tatitux arsta:

Jucha taripirinak nayraqataruw apapxäma,

jumanakampiru, wawanakamampiru,

allchhinakamampiru.

10Inti jalanta tuqinkir wat'anakar sarapxam,

ukatsti amuyapxarakim;

Quedar chiqarusti mayni khithapxam,

sum uñjaniñapataki,

inach ukhamax luraspacha,

11Diosar jan uñt'ir mä markan

diosanakap apanukutapa,

uka diosanakapax jan chiqa diosäpkchi ukasa.

Ukampis markaxax nayarux apanukuwayituwa,

nayax chiqpach Diosäkta ukasa,

jan kunatak inamay idolonak laykukiw apanukuwayapxitu.

12¡Alaxpacha, ukanak uñjasax mayjt'asim!

¡Mayjt'asiñatsa khathatirakim!

Naya, Tatituw uk arsta.

13“Markaxax pä jach'a juchanak luri:

Naya suma jakañ umarusti,

apanukuwayapxituwa,

ukatsti jupanakax pachpa phuch'unakap allisipxi,

uka phuch'unakaparusti umax janiw sayt'karakiti.

Israelan jan taqi chuymätap layku t'aqhisitapa

14“Israelax janiw mä t'aqhisiyat jaqïkiti;

jupax janiw t'aqhisiñan yurkarakïnti.

¿Jichhasti kunatarak taqi yänakap aparapxisti?

15¿Kunatarak leonanakjama

jach'at warart'asis nuwantapxisti?

Uraqipxa q'ala tukjat antutawayapxi,

markanakapasti ninampi nakhantayata,

janirakiw khitis ukanakan qhiparkxiti.

16Menfis, Tafnes siski uka chiqankir jaqinakaw

p'iqsa ch'iyjapxaraktam.

17Taqi akanakasti nayar apanukutam laykuw

ukham t'aqhisiyapxaraktam,

naya, Tatitu Diosamaru,

jumar irpiriru apanukutamata.

18Israelitanaka, jichhasti Egiptor sarasasti

ukat Nilo jawiran umanakapat umt'asasti

¿kunrak jikxatapxtasti?

Asiria uraqir sarasasti,

ukat Éufrates jawirat umt'asasti

¿kunrak jikxatapxtasti?

19Pachpa ñanqha luratamaw mutuyätam,

jan taqi chuymampi sarnaqatamaw juchañchaskätam.

Amuyt'asim, ukat uñjarakïta,

kunja jan walïkataynatix

nayar apanukuñaxa,

kunja llakïkataynatix nayar jan yäqatamasa,

naya, Tatitu Diosamar apanukutamata.

Naya, taqi ch'aman Tatituw uk arsta.

Israel markan Tatitu Diosar saykatatapa

20“Nayratpach nayatakix sayt'astaxa,

janiw nayar jayskarakistati.

‘Janiw luqtañ munkti’ saraktawa.

Taqi alay qullunakana,

jach'a quqanak k'uchunakan

yaqhampi jucha luras sarnaqtaxa.

21Mä suma uva alïkasmas ukham nayax ayrusïyäsma,

wali suma uva jathat jutirïkasmas ukhama.

¡Ukampis jichhax q'ala jan wali tukutätawa,

jan uñt'añjamarakïxtawa.

22Lejiampis jariqasiskam,

jabonampis jarisiskam,

naya nayraqatansti

juchaman q'añupax uñstaskakipuniniwa,

Naya, Tatituw uk arsta.

23¿Kunjämarak sätasti: ‘Janiw nayax q'añucht'askti,

janiw k'ari diosanakarus yupaychkaraktti’ sasasti?

Amuyasim kunjämänsa Ben-hinom sat qhirwan sarnaqatamaxa,

jan wali luratanakamax luratanakamapunïnwa,

qachu camellor uñtata,

urqu camellon qhipap kawksarus jalakiraktawa;

24montenkir qachu asnor uñtata,

qullu tuqirukiw sarañ munasktaxa,

taqi kun munasakiw wal samaqisktaxa.

Kunapachatix urqu asnompi jikintasiñ munki ukkhax

janiw khitis jarkt'kaspati.

Mä urqu asnotix thaqhaspaxa,

jank'akiw jan qarjasis jikxataspa.

25“¡Israel, jan kayunakam q'ara kayu jalanaqasax chhuxriñchjasimti,

mallq'amsa janirak wañantayasimti!

Ukampis jumax sistawa:

‘Janiwa. Janipuniw sayt'kiristti,

yaqhanakaruw wal muntxa,

jupanakampiw sarxarakï’ sasa.

Israelan mutuyatäñapax wakisiwa

26“Kunjämatix lunthatax katjayasisin wal p'inqasixa,

ukhamarakiw Israel markax p'inqasini,

reyinakasa, jilïrinakasa,

sacerdotenakasa, profetanakasa.

27Jumanakasti mä quqarukiwa:

‘Awkixätawa’ sapxtaxa.

Mä qalarukiw:

‘Taykaxätawa’ sapxaraktaxa,

nayatakisti maysa uñtapxtaxa,

janiw qhan uñkatapkistati;

jan walt'añan jikxatasxapxta ukkhakiw

‘¡jutam qhispiyapxita!’ sapxistaxa.

28Judá, ¿kawkinkarak juman lurasit diosanakamasti?

¡Uka diosanakamax markanakar uñtat waljapuniwa!

¡Kunapachatix jan walt'añax purinkätam ukkhax

jupanakay jumar qhispiyirix jutapxpan!

29¿Kunrak jumanakasti nayar sapxitasma?

Jumanakaxay nayatak sayt'asipxstaxa.

Naya, Tatituw uk arsta.

30Inamayaw wawanakamarux mutuytxa,

jan wali luratanakapatxa janiw kuttaniñ munapkiti,

jumanakasti qhuru leonanakar uñtataw

profetanakamarux jiwarayapxtaxa.

31Jichhax khitinakatix akankapkta

ukanakax sum ist'apxita:

¡janiw nayax jumanakatak mä parintat wasarar uñtatäkti,

janirakiw axsarkay ch'amakan phuqhantat p'iyar uñtatäkti!

¿Ukatsti, kunatarak sapxistasti:

‘kuntix munapktxa uk lurapxä,

janirakiw jumarux yupaychkxapxämati sasasti’?

32¿Mä warmix armasispati kunanakampitix jaqichasïwipan

k'achachatäkän ukanakatxa?

Ukampis jumanaka, nayan markaxax

jaya pachaw nayat armasxapxista.

33“¡Jumasti Judá,

yaqha chachanak jikxatañatakix kusapunïtawa!

¡Yaqha chachanakampi sarnaqir warminakas

jumat yatiqasipxi!

34Isimax q'añuchjatawa,

t'aqhinakana, jan juchaninakan wilapampi,

khitinakarutix jan kuna juchan jikxatkta

ukanakan wilapampi q'añuchjatawa.

35Ukampis saskaktawa:

‘Nayax janiw kuna juchanïktsa,

Diosax janiw nayatakix phiñasitäkxiti’ sasa.

Jichhax walikiwa,

niyakixay ‘Janiw juchanïkti’ sistaxa,

ukhamax mä taripäwiruw mantañäni.

36Jumax jank'akiw

parlatanakam mayjt'aytaxa;

Egiptox apanukurakikïtamwa,

kunjämatix Asiriax apanukktam ukhama.

37Ukatsti Egiptot mä p'inqaw kutt'anïta,

nayaw khitinakatix jumar arxatapktam ukanakarux apanukta,

jupanakampi sumankatamampisti

janiw kunsa jikxatkätati.”