1Jotam reyix pä tunka phisqan maranïkän ukkhaw Judá marka apnaqañ qalltäna, jupasti Jerusalén markan tunka suxtan maraw marka apnaqäna. Taykapax Jerusá satänwa, jupasti Sadoc chachan phuchhapänwa.
2Jotam reyin luratanakapasti Tatitun nayraqatapan chiqapänwa, kunjämatix Ozías awkipan luratanakapax chiqapäkäna ukhama. Ukhamäkipansa, janipuniw jupax Tatitun utapar incienso nakhayañatak mantkänti. Markasti jan wali lurañanak luraskakïnwa.
3Jotam reyiw Tatitun utapan amsta jach'a punkup lurayäna, Ófel qullunkir pirqanak lurayäna.
4Ukatsti Judá uraqin utjir qullunakapansti markanak sayt'ayäna, ch'uminakansti nuwasiñatak wakichat jach'a pirqanaka, pukaranak lurayarakïna.
5Ukatxa amonitanakan reyipampiw nuwasiñankäna, jupanakarusti atipjänwa. Uka marasti amonitanakax kimsa waranqa kimsa patakan kilo qullqinaka, pä tunka waranqa quintal trigo, cebadatsa mä ukkharaki juparux churapxäna. Uka pachparaki pä maranak sarakipkipan churapxäna.
6Jotam reyisti ch'amaniw tukxäna, jupan sarnaqäwipax Tatitun nayraqatapan chiqapätap layku.
7Jotam reyin ukat ukxar sarnaqäwipasa, nuwasïwinakapasa, luratanakapasa, Israel, Judá markanakankir reyinakapan qillqatapankiwa.
8Jotam reyix pä tunka phisqani maranïkän ukkhaw marka apnaqañ qalltäna, jupasti Jerusalenan tunka suxtan maraw marka apnaqäna.
9Jotam reyix jiwxäna ukkhasti, Davidan Markapana, nayra awkinakap thiyaruw jupar imt'xapxäna. Ukatsti jupa lantix, Ahaz yuqapaw reyïxäna.
Who We AreWhat We EelieveWhat We Do
2025 by iamachristian.org,Inc All rights reserved.
