1Tatitutakix machaq q'uchu q'uchupxam,
akapachankir jaqinaka, Tatitur q'uchupxam;
2Tatitur q'uchupxam, sutip jach'añchapxam,
sapürupun atipjäwipat yatiyapxam.
3Aytat kankañapat markanakar yatiyapxam,
muspharkañ luräwinakapat taqi jaqinakar parlapxam,
4Tatitux taqi ch'amaniwa,
yupaychatäñapax wakisipuniwa,
¡k'ari diosanakat sipan wali axsarkayawa!
5Yaqha markanakan diosanakapax janiw kunäpkisa,
Diosasti alaxpach luririwa.
6¡Aytat kankañampi, lliphipkir qhanampiw nayraqatapanki!
¡Ch'amampi, muspharkay kankañampiw qullan utapanki!
7Taqi markankir jaqinaka, Tatitur jach'añchapxam,
Tatitun aytat kankañapampiru, ch'amapampir jach'añchapxam;
8Tatitun qhapaq sutip waqaychapxam;
qullan utapan anqäxaparux luqtanakamp mantapxam;
9qullan utapan Tatitur yupaychapxam.
¡Taqpach jaqipun nayraqatapan khathatpan!
10Markanakarux sapxam: “¡Tatituw reyixa!” sasa.
Jupaw akapacharux jan unxtañapatak utt'ayi;
jupaw markanakarux chiqapar uñjas apnaqi.
11¡Alaxpachax kusispan, uraqix k'uchiraspan!
¡Lamar qutas qhuthutpan,
ukan utjirinakas kusisipxpan!
12¡Pampanakasa, ukan utjirinakas jallallapxpan!
¡Ch'uminkir quqanakas kusisiñat arnaqasipxpan,
13jutaskir Tatit nayraqatan wararipxpan!
¡Akapachar apnaqiriw jak'achasisinki,
chiqapar uñjasaw akapacharux apnaqani,
chiqa kankañampiw markanakarux sarayani!
Who We AreWhat We EelieveWhat We Do
2025 by iamachristian.org,Inc All rights reserved.
