1Tatituw Israel markatak ak yatiyitu: Alaxpach jach'ar tukuyiri, akapach uraqsa utt'ayiri, jaqirus jakañ churiri Tatitux siwa:
2“Kunapachatix aka jak'ankir markanakax Jerusalén markaru, uka kipkaraki Judá uraqinkir markanakarus katuntañatak muyuntapkani ukapachaxa, nayaw jupanakarux aynacht'ayä. Jerusalenarux machantayir vinoruw tukuyä, ukaw taqi jak'ankir markanakar machjayani.
3“Khä urux taqpach markanakatakiw Jerusalenax mä jathi qalar uñtat tukuni. Uka jathi qala unxtayañ munirinakarux tukjaniwa. Taqi markanakaw Jerusalén marka tukjañatak tantacht'asipxani,
4ukampis ukkhax nayaw caballonakap chhuktayä, caballxata saririnakaparusti luqhiptayäwa. Judá markankir wila masinakaparux imäwa, markanakan taqi caballonakaparusti juykhukamak tukuyarakï.
5Ukham uñjasasti, Judá markankir jilïrinakax amuyt'asisaw sapxani: ‘Taqi ch'aman Tatitux Jerusalén markan jakirinakan Tatitupawa, jupaw jupanakarux ch'amsa churaraki’ sasa.
6“Khä urun Judá markan jilïrinakaparux lawanak taypin nakhaskir mä nina sank'jam tukuyä, mä ninjama trigo puyanak marqthapita taypina. Kupïxankiri, ch'iqäxankiri taqi jak'ankir markanakaruw uka ninax tukjani, ukampis Jerusalén markarux janiw kunas kamachkaniti.
7Nayraqatxa naya, Tatitux, Judá wila masinakaruw qhispiyä, nayatakix Davidan wila masipat saraqirinakasa, Jerusalén markan jakirinakas wali yäqatawa. Jan khitis may amuypati.
8Naya, Tatituw Jerusalén markan jakirinakarux imarakï. Jupanakat wali t'ukhäpkis ukanakax David reyjamaw wali ch'aman tukupxani, Davidat saraqirinakasti Diosar uñtatäniwa, jupanakan nayraqatap sarantir Tatitun angelapjama.
9“Khä urusti nayax Jerusalenar nuwantañ muniri markarux tukjäwa.
10Davidat saraqiri wila masinakapampiru, Jerusalén markan jakirinakampirux, khuyapayasiñampi mayisiñ ajayumpiw phuqt'ä. Ukkhaw khitirutï chhuxriñchapki ukarux uñkatapxani, ukatsti jupat llakisipxaniwa, jachapxarakiniwa, sapa yuqall wawa jiwayasiri jaqjama, jan ukax jilïr wawan jiwatapatjama.
11Jerusalenanxa jach'a jachañaw utjani, kamisatix Meguido uraqina Hadad-rimón sat diosapat jachañax utjki ukhama.
12Uka markpachan sapa mayni wila masinakaw yaqha yaqha tantacht'asis llakisiñat jachapxani: Davidat saraqir wila masinakapa, warminakapamppacha; Natán chachat saraqir wila masinakapa, warminakapamppacha;
13Leví chachat saraqiri wila masinakapa, warminakapamppacha; Simí chachat saraqir wila masinakapa, warminakapamppacha;
14ukhamarak taqi maynïr wila masinakasa, yaqha yaqha, warminakapamppacha.
Who We AreWhat We EelieveWhat We Do
2025 by iamachristian.org,Inc All rights reserved.
