1 TESALONICENSES QALLTA ARUNAKA - Qullan Arunaka DC
QALLTA ARUNAKAPablox Corinto markankaskänwa, Timoteo sat yanapiripasti Tesalónica iglesiat mä yatiyäwi churaskäna, jupan utt'ayat iglesiax kunjämatix jikxataskän ukanakata. Judío jaqinakax Pablotakiw sayt'asipxäna, ukat Pablox Tesalónica markat mistuwayxäna, jan judiöpki ukanakasti taqi chuymampiw yatichäwinakap katuqapxäna, Criston iyawsirinakapaw tukupxarakïna. Ukampis Pablox uka iyawsirinakat munasiñ chuymampiw amtasïna, jupanakatsti yatiñ munarakïna.Jupanak tuqit yatiyäwinakax wali askïnwa. Jupanakatak sayt'asiñ utjkipansa, Cristor iyawsirinakan sarnaqäwipax uka chiqankir iyawsirinakatakix mä suma uñacht'äwïnwa. Ukhamïpansti Pablox aka qillqat kusisit chuymampiw qillqäna, Diosar yuspagarasa, jupanakan iyawsapxatanakapat yuspagarasa, ukatsti jupanakampïkäna ukanakat amtayarakïna (1.1—3.13). Jupanakarux Cristompi sarañan jiltapxañapatakiw iwxt'arakïna, kunjämtix qalltapkäna ukhamaru (4.13—5.11), ukxarusti jupanakarux Tatitun jiwatanak taypit jaktäwipata, payïr jutäwipat sum amuyt'ayarakïna. Pablox uka chiqa yatichäwinakatsa, suyt'äwitsa wali sum amuyt'ayäna; iyawsañansa, munasiñansa suma wakicht'atäpxañapatakiw iwxt'arakïna. Aka qillqatsti mä qawqha iwxanakampi, amuyt'äwinakampiw tukt'ayi (5.12-28).Sumpach amuyt'kasinxa, aka qillqatax nayrïr qillqatänwa, uka qillqatampiw Machaq Testamenton wakichasiñapax qalltäna. Pablosti phisqa tunka, jan ukax phisqa tunk mayan maräkän uka pachaw aka qillqat qillqawayäna.
