NÚMEROS 4 - Qullan Arunaka DC

Levitanakan lurañanakapa

1Tatitux Moisesampiru, Aaronampiruw parläna, akham sasa:

2“Quehat chachan wawanakapäki uka levitanakat wila masitkam jakthapim,

3kimsa tunka maranita, phisqa tunka marankama, jupanakasti Tatitump Jikisiñ Carpan lurañatakis walirakïpxpan.

4“Quehat chachan wawanakapan lurañanakapax wali qullanawa, ukanakasti akanakawa:

5Kunapachatix markax yaqha chiqar sarañatak sarxarkani ukkhax, Aaronampi, wawanakapampiw jutasin Qullanansa Qullanapa chiqawjat velo apaqapxani, ukatsti ukampiw arust'äwi arcar janxatapxani.

6Uka patxarusti suma lip'ichinakampiw imxatapxani, ukxarusti jan ch'ukuni morado telampiw janxatapxarakini, ukat lawanakampi apañatak uchapxani.

7Ukatsti Tatitutak yaqhachat t'ant'anak uchañ patxarux, morado telampiw janxatapxani, uka patxaruw chuwanaka, wisllanaka, qirunaka, vino luqtañ chatunaka, sapür luqtañ t'ant'anak uchapxani.

8Taqi uka patxarusti wila telampiw janxatapxani, ukxarusti suma lip'ichinakampiw imxatapxani, ukat lawanakampi apañatak uchapxani.

9Ukatsti morado tela aptasin ukampiw candelero imxatapxani, ukhamarak lamparanaka, nina jawriñanaka, jisk'a chuwanaka, aceitetak apnaqaski taqi uka qirunaksa.

10Taqi ukanaksti suma lip'ichinakampiw llawuntapxani, ukatsti lawanak patxaruw kallañatak uchapxani.

11“Qurit lurat altar patxarusti morado isi janatatapxani, suma lip'ichinakampiw ukar llawuntapxani, altar aptañatakisti lawanakampiw uskupxani.

12Ukxarusti qullan utjäwin apnaqaski taqi uka yänak apthapisin, morado telaruw uchapxani, ukanaksti suma lip'ichinakampiw llawuntapxani, ukatsti lawanakxaruw kallapxani.

13Ukatsti altarat qhillanak picharapxani, ukxarusti ch'iyar wila telampiw imxatapxani.

14Uka patxarusti taqi kunanakatix altaran yupaychañatak wakiski ukanak uchapxani: nina sank'a nakhayañanaka, nina jawriñanaka, lampanaka, jach'a qirunaka; taqi kunanakatix altaran apnaqaski ukanaka. Taqi ukanakaruw suma lip'ichinakamp imxatapxani, kallañatakisti lawanak uskupxarakini.

15Aaronampi, wawanakapampix taqi uka qullan yänak llawthapiñ tukuyxapxani, sarantañatakis niya jank'akïpxarakini ukapachasti, Quehat chachan wawanakapaw jutapxani, taqi uka yänak apañataki. Ukampis kunatix qullanäki ukxa janiw llamkt'apxañapäkiti, jupanakan jan jiwapxañapataki. Quehat chachan wawanakapax, taqi aka qullan yänak Tatitump Jikisiñ Carpat apapxañapa.

16Aarón sacerdoten Eleazar yuqapax lamparanak qhanayir aceite imañapa, ukatsti suma q'apkir incienso, sapür nayar luqtañ juyra waxt'anaka, luqtañ aceite imañaparaki. Ukatsti qullan utjäwi uñjañaparaki, taqi kunanakatix ukan utjki ukanaksa, ukan apnaqañatak wakiski taqi uka qullan yänakampi.”

17Tatitusti Moisesampiru, Aaronampirux sänwa:

18“Jan jumanakax munapxamti, levitanak taypit Quehat chachan wila masinakapan chhaqtapxañapa.

19Jan jupanakan qullan yänak llamkt'apxatap layku mutuyat uñjasis jiwasipkañapatakix, akanak lurapxañapa: Aaronampi, wawanakapampiw sapa maynir unañchani, kunanaktix lurapxañapäki, kunanaktix apapxañapäki ukanaka.

20Ukhamat jupanakax kunatix qullanäki ukanak uñjir jan mantapkaniti, janirakiw jiwapkanisa.”

21Tatitux Moisesar saskakïnwa:

22“Guersón chachan wawanakapar jakthapirakim, saraqiripatkama, wila masipatkama,

23kimsa tunka maranit amstaru phisqa tunka marankam jakthapisa, jupanakasti Tatitump Jikisiñ Carpan lurañanakatakis walïpxarakpan.

24“Guersón chachan wawanakapax akanak lurapxani:

25Qullan utjäwin cortinanakap apapxani, Tatitumpi Jikisiñ Carpa, suma lip'ichinakamp patxar janxatatäkis uka, Tatitumpi Jikisiñ Carpar mantañankki uka cortina,

26uta anqäxan cortinanakapa, qullan utjäwimpiru, altarampir muyuntki uka mantañapan uchat cortina, chinuñanaka, luqtañatak wakiski taqpach yänakampi.

27Aaronampi, wawanakapampiw Guersón chachan wawanakapar kuntix lurañanakapäki, apapxañapäki ukanaksa uñachayapxani. Jumanakaw jupanakar lurañap katuyapxäta.

28Taqi ukanak Guersón chachan wawanakapax Tatitump Jikisiñ Carpan lurapxani, jupanakarusti Aarón sacerdoten Itamar yuqapaw sarayani.

29“Ukatsti Merarí chachan wawanakapar uka kipkarak jakthapim, saraqiripatkama, wila masipatkama.

30Taqinin sutinakap qillqantam, kimsa tunka maranit amstaru, phisqa tunka marankama, Tatitumpi Jikisiñ Carpan irnaqañatakis walïpxarakpan.

31Jupanakan lurañanakapasti Tatitumpi Jikisiñ Carpanxa, akanakawa: tablanakampi, sayt'u lawanakampi, sayir lawanakampi, katxäsirinakapamp apapxani.

32Ukatsti qullan utjäwir muyuntki uka sayir lawanakap apapxarakini, lawanak katxäsirinakapampi, ch'akurunakapampi, chinuñanakapampi, kunanakatix yupaychañatak munaski taqi ukanakampi. Jumaw sapa maynir kuntix apañapäki ukanak sarakïta.

33Taqi ukanakaw Merarí chachat saraqir wawanakapan lurañanakapaxa, jupanakarusti Itamar chachaw sarayani.”

34Ukatsti Moisesampi, Aaronampi, markan jilïrinakapampiw Quehat chachan wawanakapar jakthapipxäna, saraqiripatkama, wila masipatkama,

35kimsa tunka maranit amstaru phisqa tunka marankam yuqall wawanakaru, Tatitumpi Jikisiñ Carpan irnaqañatakis walïpkarakïn ukanakaru,

36taqpachani qillqantatasti pä waranqa paqallqu patak phisqa tunkan yuqall wawanakänwa.

37Quehat chachan saraqirinakapax taqi ukanakänwa, Tatitump Jikisiñ Carpan irnaqañatakis walïpkarakïn ukanaka. Moisesampi, Aaronampiw taqi jupanakar jakthapipxäna, kunjämtix Tatitux Moisesar arskatayna ukhamarjama.

38Guersón chachan wawanakapax saraqiripatkama, wila masipatkam jakthapitanakax,

39khitinakatix kimsa tunka maranit amstar phisqa tunka marankamäpkäna, Tatitump Jikisiñ Carpan lurañatakis walïpkarakïn

40ukanakasti, pä waranqa suxta patak kimsa tunkan jaqinakänwa.

41Guersón chachan saraqiripatkam jakthapit yuqall wawanakax taqi ukanakänwa, khitinakatix Tatitump Jikisiñ Carpan irnaqañatakis walïpkarakïn ukanaka; Moisesampi, Aaronampiw jakthapipxäna, kunjämtix Tatitux Moisesar arskatayna ukhamarjama.

42Merarí chachan wawanakapax saraqiripatkama, wila masipatkama,

43khitinakatix kimsa tunka maranit amstar phisqa tunka marankamäpkäna, Tatitump Jikisiñ Carpan irnaqañatakis walïpkarakïn

44ukanakax, kimsa waranqa pä patakanïnwa.

45Merarí chachan saraqiripatkam jakthapit yuqall wawanakax taqi ukanakänwa, Tatitump Jikisiñ Carpan irnaqañatakis walïpkarakïn ukanaka, Moisesampi, Aaronampiw jupanakar jakthapipxäna, kunjämtix Tatitux Moisesar arskatayna ukhamarjama.

46Moisesampi, Aaronampi, Israelan jilïrinakapampix taqpach levitanak jakthapipxäna, saraqiripatkama, wila masipatkama,

47kimsa tunka maranit amstaru phisqa tunka marankama, Tatitumpi Jikisiñ Carpan irnaqañatakis walïpkaraki ukanaka,

48taqpachanisti kimsaqallq waranqa phisqa patak kimsaqallq tunkan yuqall wawanakänwa.

49Uka jakthapïwisti kunjämtix Tatitux Moisesar arskatayna ukhamarjamaw lurasïna. Ukhamaw Moisesax sapa maynir kuntix lurañapäki, kuntix apañapäki ukanaksa uñachayäna, Tatitux jupar arskatayna ukhamarjama.