DEUTERONOMIO 31 - Qullan Arunaka DC

VI. MOISESAN QHIPA ARUNAKAPAMPITA, JIWXATAPAMPITA(31—34)Josué chachan Moisés lanti sayt'atapa(Nm 27.12-23)

1Moisesasti wasitat Israel markarux parläna, ukatsti akham säna:

2“Nayax patak pä tunkan maranïxtwa, janirakiw ch'amaxas maysat maysar sarnaqañatak utjkxiti, ukhamarus Tatit Diosax situwa: ‘Janiw jumax Jordán jawir khurkatar makhatkätati’ sasa.

3Ukampis Tatit Diosamaw jumanakan nayräxam sarani, juman nayräxamatsa uka markanakar t'unjarakini, uraqipan jakapxañamataki. Josué chachaw jumanakan nayraqatam sarani, jupasti Tatitux siski ukhamarjam jach'a jilïrit utt'ayatawa.

4Tatituw jumanakar saykatir markanakarux t'unjaskani, kunjämtix Sihón, Og sat amorreo jaqinakan reyinakaparu, taqpach markapamppachar t'unjkän ukhama.

5Kunapachatix Tatitux jumanakar uka markanak katuyapkätam ukkhasti, kuntix nayax iwxawayapksma ukanak uka markanakarux lurapxäta.

6Ch'amañcht'asipxam, qamas katxatapxarakim, jupanakamp nuwasipkät ukkhaxa, jan axsarapxamti, janirak khathatipxamsa, Tatit Diosamaw jumanakampïski, janiw jaytapkätamti, janirakiw apanukupkätamsa” sasa.

7Ukatsti Moisesax Josué chacharuw jawsäna, ukat taqpach Israel marka nayräxan jupar akham säna:

“Josué, ch'amañcht'asim, qamas katxatarakim, jumaw aka jaqinakar irpäta, kawkïr uraqtix jumanakan nayra awkinakamar Tatitux churañ arskäna uka uraqiru, ukatsti jumarakiw uka uraqinak jupanakar lakintäta.

8Tatituw juman nayräxam sarani, jumampïskaniwa; janiw jaytkätamti janirakiw antutkätamsa; ukhamasti, jan axsaramti, janirak llajllasimsa.”

Manunak pampachasiñ maran kamachi ullaraña

9Moisesasti aka kamachinak qillqantasin Diosan arust'äwi lurat arcap apiri levita sacerdotenakaruw churäna, Israelan taqpach jilïri jaqinakaparux churarakïnwa.

10Ukatsti jupanakarux sarakïnwa:

“Sapa paqallq maraw manunakat pampachañ marax uruyatäni.

11Kunapachatix uka marax purinkani, ukatsti israelitanakax Tatit Diosapan ajllit chiqawjar tantachasipkani, Chhujllanakan urup taqpachani uruyañataki ukapachasti, taqi aka kamachi arunak jupanakan nayräxapan ullart'äta.

12Ukapachasti taqpach markaw tantachasiñapa, taqi jaqinaka, warminaka, wawanaka, jumanak taypin jakir yaqha markat jutir jaqinakas tantachasiñaparakiwa, uka kamachinak ist'apxañapataki, Tatit Diosamar axsartañ yatiqapxañapataki, uka kamachinakarjam sarnaqapxañapatakiraki.

13Ukhamat jumanakan wawanakamax ist'apxani, janiw jupanakax uka kamachinakat kuns yatipkiti, ukhamat taqi jakañapan Tatit Diosapar jaysañsa yatiqapxani, Jordán jawira khurkatar makhatasin katupkäta uka uraqina.”Diosan Moisesar qhipa yatichäwinak churatapa

14Tatitux uka qhipat Moisesarux säna:

“Niyaw jumatak jiwañam urux jak'achasisinki; ukhamasti Josué chachar jawsam, ukatsti Jikisiñ Carpar panin jutapxam, ukan nayax kuntix lurapxañamäki ukanak sapxäma” sasa.

Moisesampi Josué chachampisti Jikisiñ Carparuw sarapxäna,

15ukansti punku mantañ chiqan Diosax qinay taypin jupanakarux uñstäna.

16Ukat Tatitux Moisesar säna:

“Niyaw jumax jiwxäta, ukapachasti aka markax aka uraqin utjir jaqinakan k'ari diosanakaparuw yupaychani; ukapachasti apanukxitaniwa, jupampi lurat suma arust'äwirux p'akintarakiniwa.

17Ukampis q'apisiñaxaw jupanakatak aqtani, jupanakarusti apanukurakïwa; janiw kunatakis jupanakat amtaskäti, jan walt'añanaka, llakisiñanak jupanakxar apayanï, ukat jupanakax sapxani: ‘¿Tatit Diosasasti janit jiwasampïkxpacha, ukatti aka t'aqhisiñanakan jikxataspachätansti?’ sasa.

18Ukampis uka urux juk'amp jupanakat jithiqtäxa, taqi jan walinak luratanakapata, yaqha diosanakar yupaychatanakapata.

19-20“Kunapachatix nayax israelitanakar kawkïr uraqtix awkinakapar juramentompi churañatak arskta uka uraqir puriykä ukapachaxa, jupanakax lik'intañkamaw manq'apxani, ukansti lechesa, misk'isa umjamaw jalaski. Ukapachasti jupanakax nayat armasxaniwa, yaqha diosanakaruw yupaychxapxani, jupanakamp lurat suma arust'äwirusti janiw phuqhapkaniti. Jichhasti jumampi, Josué chachamp aka q'uchu qillqapxäta, ukat israelitanakar q'uchuñ yatichapxarakïta, jupanakan q'uchuñapataki, jupanakax q'uchupkani ukkhax taqi kunanaktix nayax jupanakar yatichkta ukanakat amtasipxañapataki, janirak ‘janiw ukxat kuns yatipkäyätti’ saskañapataki.

21Kunapachatix jupanakxaru wali jan walt'añanakampi, llakinakamp jutkani ukapachasti, aka q'uchux jupanakatak mä qhanañchäwïniwa, qhipa wawanakapasti amtapxaniwa, ukatsti q'uchupxarakiniwa; ukampis kawkïr uraqtix churañ arskta ukar janïr mantapkipanxa, nayax yatxtwa kawksaru chuymanakapan wayusitapsa” sasa.

22Ukürpachaw Moisesax uka q'uchu qillqäna, ukatsti israelit jaqinakaruw yatiqayarakïna.

23Tatitux Nun chachan Josué yuqaparux aka iwxanak churäna:

“Josué, ch'amañcht'asim, qamas katxatarakim, jumaw israelitanakar puriyäta, jupanakar churañ nayax arskta uka uraqiru, nayarakiw jumampïskä” sasa.

24Kunapachatix Moisesax uka kamachinak qillqañ tukuyxän ukkhaxa,

25Diosan arust'äwi lurat arcap apiri levita sacerdotenakaruw säna:

26“Kamachinakan qillqat aptapxam, ukatsti Tatit Diosaman arust'äwi lurat arcap thiyar uchapxam, uka yatichäwinakaw jumanakan sarnaqatanakam irkatani.

27Nayax yattwa jumanakan jan ist'asiri, saykatasiri jaqinakäpxatama. Jumanakax nay jakaskipansa Tatitutakix sayt'asipxtawa, ¿kunjämarakïni nay jiwxä ukkhasti?

28Jichhax markan jilïrinakapampiru, ayllunakan jilïr jaqinakapampir akar irpanipxam, nayan aka arunak jupanakar yatiyañaxataki, alaxpachampi akapachampiw ukanakat qhanañchani.

29Nayax yattwa, jiwxä uka qhipatxa, jan wali lurañanakaruw katuyasipxäta, nayax uñachayapksma uka thakhi apanukupxäta, jutir urunakansti chijinakaruw puripxäta, Tatitun nayraqatapan jan walinak lurapxatamata, ukampi jupar q'apisiyapxatamata.”

Moisesan q'uchupa

30Ukatsti Moisesax tantachat israelita jaqinak nayraqatan aka q'uchu arsüna, qalltat tukuykama: