1Tatitux sarakituwa:
2“Jeremías, sañu lurir jaqin utapar saram. Ukan mä yatiyäwi churäma” sasa.
3Nayasti sarawaytwa, ukatsti sañu lurir jaqirux lurañap chiqan ñiq'it sañu luraskir jikxatta.
4Kunapachatix sañu luratapax jan walïkän ukapachaxa, wasitat uka pachpa ñiq'it yaqha sañu luräna, kunjämtix jupax munkäna ukhamar tukuñapkama.
5Ukapachaw Tatitux nayar situ:
6“Israelitanaka, ¿janit nayasti jumanakampi, kunjämtix sañu luririx lurki ukham lurkarakiriststi? Jumanakax nayan amparaxan sañu lurañ ñiq'jamäpxtawa, kunjämatix ñiq'ix sañu luririn amparapankki ukhama. Naya, Tatituw uk arsta.
7Nayax mayak amtiristxa, mä markaru, jan ukax mä marka apnaqäwir q'al t'unjañsa.
8Ukampis uka markatix ñanqha lurañanakat jithiqtxaspa ukkhaxa, kuna mutuyäwitix wakichatäkän ukxa janiw apayankxiristti.
9Yaqha urun uka markarux sayt'ayirista, jach'arus jiltayarakirista.
10Ukampis uka markatix ñanqhanakak luraskaspa, nayan arunakaxarus janirak ist'kaspa ukapachaxa, janiw nayax kuna askinakatix jupanakatak wakichatäki ukanak apayankiristti.
11“Jichhax Jerusalén markan jakir jaqinakaru, Judá uraqin utjirinakarus sarakim, naya Tatituw jupanakar sista: ‘Jumanakar jan walt'ayañatakiw amtaskta; jumanakar mutuyañ amtaskta. Ukhamax jan wali sarnaqäwinakam apanukupxam, luräwinakamsa, sarnaqäwinakamsa askichasipxarakim’ sasa.
12Jupanakasti sapxarakïtamwa: ‘¡Jan inamay parlkamti! Nanakax kunjämarutix munapkta ukhamaruw sarnaqasipkä, chuymanakaxan jan wali amtatanakaparuw arkasipkarakï’ ” sasa.
13Ukatpï Tatitux sixa:
“Yaqha markanakar jiskt'asipxam,
akham arunaka ist'irix utjarakpachati.
¡Israel markax jan walpin luri!
14Líbano jach'a qullunakax
janipuniw kunapachas jan khununix jikxataskiti;
janirakiw uka qullunakat
q'uma umanak jaliris wañt'kiti.
15Ukampis markaxax nayar armituwa,
ukatsti k'ari diosanakaruw inciensonak luqtasipki.
Nayra thakhipatsti yaqha thakhiruw saranukupxi,
jan uñt'at thakhinjam sarapxaraki.
16Ukhamat markapxa
mä ch'usa wasarar tukuyxapxi,
muspharkaña, mulljaskaña tukuyapxaraki.
Uka chiqa sarakipirinakasti,
taqiniw mayjt'asiñat p'iqi khiwipxani.
17Nayasti, inti jalsu tuqit jutir thayjamaw Israelar ananukü;
uñisirinakapan nayraqatapat jaltayä.
Mutuyäwipax purinkani uka urusti,
nayax jupanakatakix maysa uñtxä.”
Profetar jan walt'ayañatak amtäwinaka18Jaqinakasti sapxarakïnwa: “Jichhax Jeremiasar jan walt'ayañatak mä amtäwir puriñäni. Jiwasar yatichir sacerdotenakax utjaskaniwa, amuyt'an jaqinakas iwxanakap churañatakix utjaskaniwa, Tatitun arunakap yatiyir profetanakas utjaskapuniniwa. Jeremías profetar jiwayapxañapatak k'arintapxañäni. Kuntix jupax siski uka arunakarus janirak yäqkañäniti” sasa.
Jeremiasan Diosat mayisitapa19¡Tatay, nayar ist'akitaya!
¡Uñisirinakaxan parlatanakap ist'am!
20¿Mä aski luräwix ñanqhampit kuttayataxa?
¡Jupanakax sepultura nayatakix allsupxi!
Amtasim nayan jumampi parlir jutataxa,
jupanakatak jumar mayitaxsa,
phiñasiñam jupanakat apaqxañamatak mayisitaxsa.
21¡Jichhasti, wawanakap manq'atjam jiwarayam,
jan ukax espadampi jiwarayatäpxpan;
warminakapasti ijma, jan wawan qhiparapxpan!
¡Chachanakapasti usunakampi jiwarapxpan,
waynanakasti nuwasïwin jiwarapxarakpan!
22Jupanakan ukarusti
akatjamat mä tama lunthat jaqinak khithanim;
¡axsarañatsa jach'at wararipxpan!
Nayatak mä p'iya allipxatap layku,
saräwinakaxar sipitanak uskupxatap layku.
23Ukampis Tatay, jumaw taqi amtatanakap yatta,
nayar jiwayañatak amtapki ukanaka.
¡Ñanqha luratanakapat jan pampachamti,
jucha luratanakapsa janirak armamti!
¡Juma nayraqatar tinkurayam,
jach'a phiñasiñampi mutuyarakim!
Who We AreWhat We EelieveWhat We Do
2025 by iamachristian.org,Inc All rights reserved.
