JOSUÉ 2 - Qullan Arunaka DC

Josué chachan Jericó markar uñaqanak khithatapa

1Josué chachax Sitim chiqat pani uñaqir jaqinak jamasat khithäna, jupanakarusti sänwa: “Sarapxam, kunjamätaynasa uka uraqixa, Jericó markasa uk uñaqanipxam” sasa.

Jupanakasti sarapxänwa, Jericó markar purisax mä jan wali sarnaqir warmin utaparuw puripxäna, sutipax Rahab satänwa, uka arumax ukan qurpachasipxäna.

2Ukampis mayni jaqiw Jericó markan reyiparux uk yatiyäna akham sasa:

—Israelit jaqinakaw jichha arumax markasar uñaqir mantanipxi —sasa.

3Ukat reyix Rahab warmin ukar khithäna akham sañapataki:

—Utamankki uka chachanakax mistunipxpan, jupanakax uñaqanakäpxiwa —sasa.

4Ukampis Rahab warmix uka pani chachanakar imantänwa, ukatsti sarakïnwa:

—Chiqaw ukaxa, pani chachanakaw utaxar sart'anitu, ukampis janiw nayax kawkinkirïtapsa yatkti.

5Niya ch'amakthapki, markan punkunakap janïr jist'antapkipan sarxapxi, janirakiw kawkir sarapxatapsa yatkti. Ukampis jumanakatix arktapxasmaxa inas jikxatapxchisma —sasa.

6Ukampisa Rahab warmix uta pataruw uka pani chachanak irpkatatayna, ukansti jupanakax lino alinak wañachat taypin imantatäsipkänwa.

7Reyin soldadonakapasti Jordán jawir tuqir sarki uka thakhinjam arktapxäna. Jupanakan mistupxatap ukspachaw marka punkux jist'antasxäna.

8Ukatsti uka uñaqa chachanakan janïr ikirkipan, Rahab warmix uta patar makhatasin jupanakarux säna:

9—Nayasti Tatitun aka uraqi jumanakar churatap yattwa, nanakax jumanakat parlir ist'asax wal axsarayasipxta. Aka markankirinakax taqiniw jumanakat ist'asax axsarañatsa khathatipxi.

10Nanakax yatipxtwa, kunjämtix Tatitux Egipto markat mistunipkta ukkhax, uka Mar Rojo quta wañt'aykäna, ukat ukanjam jumanakan makhatapxañamataki ukxa. Ukatsti kunjämtix amorreonakan Sihón, Og sat reyinakaparu Jordán jawir khurkatan jumanakax tukjapkta uksa yatipxaraktwa.

11Ukanak ist'asax walpun axsarapxta, janirakiw khitis jumanakampi nuwasiñ munkiti. Jumanakan Tatitu Diosamax alaxpacha, akapacha apnaqir Diosawa.

12Ukat jichhax jumanakar mayipxsma, akawjanpach Tatitun sutipxar juramento lurapxañamataki, wila masinakaxar khuyapayasiñampi uñjapxañamataki, kamisatix nayax jumanakat khuyapayaskta ukhama. Jumanakan chiqa chuymanïpxatam uñacht'ayapxita,

13ukatsti awkixaru, taykaxaru, jilanakaxaru, kullakanakaxaru, taqi jupanakampïpki ukanakarus janiy jiwayapxampti. ¡Taqiniruy jiwañat qhispiyapxita —sasa.

14Jupanakasti sapxänwa:

—Jumatix nanakan jutataxa jan khitirus yatiykäta ukaxa, nanakax pachpa jakañanakaxampiw jumanakat sayt'apxä. Kunapachatix Tatitux aka uraq churapkitan ukkhaxa, nanakasti jumatxa khuyapt'ayasipxämawa, arsutanakaxsa janiw mayjaptayapkäti.

15Rahab warmin utapax markar muyuntki uka pirqa patankänwa, ukatsti uka pä chacharux mä wiskata uta ventanap chiqa warkuqäna.

16Jupanakarux sarakïnwa:

—Qullunak tuqir sarxapxam, khitinakatix jumanakar thaqhasipktam ukanakampi jan katjayasiñataki. Uka qullunsti kimsüruw imantasipxäta, jupanakan markar kutiniñapkama, uka qhipat sarxapxäta —sasa.

17Uka chachanakasti sapxänwa:

—Nanakax mayipkista uka juramentompix phuqhapxämawa.

18Ukampis kunapachatix nanakax aka markaru mantanipkä ukkhaxa, jumax aka wila wiska kawkïr ventanattix warkuqapkista ukawjat warkuqanïta. Ukatsti utamarux awkimaru, taykamaru, jilanakamaru, awkiman taqpach wila masinakaparuw tantachäta.

19Jupanakat maynitix utamat anqar mistuni ukasti jiwaniwa; nanakax janiw uka jiwatapat juchanïpkäti, ukampis maynitix utamankaskirir jiwayañ munanixa, juchax nanakxankaniwa.

20Jumatix aka tuqit arsüta ukaxa, nanakax janiw juramentompi arsupkta uk phuqhapkäti.

21Warmisti sänwa:

—Arunakamarux phuqhaspan —sasa.

Ukatsti uka chachanakar khithanukusax, mä wila wiska uta ventanapar chinuntäna.

22Uka pani uñaqanakasti qullunakar sarasin kimsa uruw ukan imantasipxäna, ukchañkamasti soldadonakax inamayakiw taqi chiqa thaqhasipkäna; jan jikxatasinsti, Jericó markaruw kuttanxapxäna.

23Ukatsti uka pani uñaqanakax qullunakat saraqanxapxäna, Jordán jawir makhatasinsti Josué chachan ukaruw sarapxäna, kunanakatix luraskatayna ukanak yatiyapxäna.

24Juparusti sapxänwa: “Tatitux taqi uka uraqinak amparasaruw katuyistu, jichhasti uka uraqin jakir jaqinakax jiwasat yatisax axsarañat wal khathatipxi —sasa.