SALMOS 84 - Qullan Arunaka DC

SALMO 84Diosan utapankañ munaña 1 Coré chachan wawanakapan q'uchupa.

1 1 (2) ¡Taqi ch'aman Diosay,

qullan utjäwimax munkayawa!

2 2 (3) ¡Taqpach ajayuxampiw

qullan utaman uyupankañ munta!

¡Taqpach chuymaxampiw

jakkir Diosar kusisit q'uchta!

3 3 (4) Taqi ch'aman Tatituxay,

Reyixay, Diosaxay,

phichhitanka jamach'inakas jak'aman tapacht'asi,

golondrina sat jamach'isti,

chhiwlinakapatak altaraman tapa jikxataraki.

4 4 (5) ¡Utaman jakirinakax kusisiñanïpxiwa,

jan qarjasisaw jumarux yupaychapxtam!

5 5 (6) Juman ch'amam katuqirinakax kusisiñanïpxiwa,

qullan utamkam puriñ munirinakax kusisiñanïpxiwa.

6 6 (7) Jachañ qhirwa taypinjam sarakipapkani ukapachaxa,

uma jalsuruw tukuyapxani,

jallumppachaw askinakampi phuqhantani;

7 7 (8) ch'amanakapax jilxataniwa,

Sión markansti Diosaruw uñjapxani.

8 8 (9) Taqi ch'aman Diosay,

¡mayisitaxarux ist'akimaya!

Jacobun Diosapa,

¡arnaqasitaxarux jaysakimaya!

9 9 (10) Nanakar arxatir Diosay,

juman ajllit reyirux khuyapayasiñampiy uñtanim.

10 10 (11) ¡Mä urukis utaman qamañax juk'ampi sumawa,

waranq urunak anqankañat sipana!

Nayax Diosan utap q'umachirïñ munta,

ñanqha lurañ chiqawjan jakañat sipana.

11 11 (12) Diosaw qhan churistu, imarakistu;

jan kamskay askin jakirinakarux,

jupaw khuyapayasiñampi, aytat kankañampi churi,

Tatitux taqi kun churi.

12 12 (13) ¡Taqi ch'aman Diosay,

jumar alkatir jaqinakax kusisiñaniwa!