GÉNESIS 32 - Qullan Arunaka DC

Jacobux Esaú jilapampiw jikisi

1 1 (2) Jacobusti thakhinjam saraskakïnwa, ukhamaruw Diosan angelanakapax jupar jikxatir mistunipxäna.

2 2 (3) Jacobux jupanakar uñjasin säna: “Akax Diosan mä ejercitopawa” sasa. Ukat uka chiqarux Mahanaim sutimpi uchäna.

3 3 (4) Jacobusti mä khithanak Edom chiqankir Seír uraqir khithäna, Esaú jilapar jutaskatap yatiyañataki,

4 4 (5) ukatsti aka arunak iwxarakïna:

—Esaú jilaxarux sapxam: “Jacob jilamax juman arsutamar phuqhañ muni, ukatsti sarakiwa: ‘Akkha maranakaw Labán tiosampix jakta,

5 5 (6) jichhasti utjituw vacanaka, asnonaka, ovejanaka, uywatanaka chachatsa warmitsa; aka iwxa jumaru apayansma, jumax suma chuymampi nayar katuqt'añamataki’ ” —sasa.

6 6 (7) Khithanakax kuttxapxän ukkhasti, Jacoburux sapxänwa:

—Esaú jilamar uñjirix sarapxtwa, jichhasti jupa kipkaw jumar katuqir pusi patak jaqinakampi chikt'at jutaski —sasa.

7 7 (8) Uk ist'asinsti, Jacobux wal axsaräna, wali mayjt'atarakiw suyt'äna. Ukatsti jupampïpkäna uka jaqinaksa, ovejanaksa, vacanaksa, camellonaksa pä tamaruw jaljtayäna,

8 8 (9) chuymapansti sarakïnwa: “Esautix mä tama jaqinakaxar jalxatir jutanixa, maynïr tamasti jaltxapxaspawa” sasa.

9 9 (10) Ukatsti Diosat mayisïna: “Tatay, Abraham achachilaxan Diosapa, Isaac awkixan Diosapa, jumaw uraqixar kuttayanista, wila masinakaxan ukarusa; jumarakiw taqi kunansa yanapaskista.

10 10 (11) Janiw kuna askïktsa juman nayar khuyapayasiñampi, chiqa kankañampi uñjañamatakixa. Nayax thujru maya ayt'atakiw aka Jordán jawir makhatäyäta, ukampis jichhax jaqinakaxasa, uywanakaxas pä tamawa.

11 11 (12) ¡Jumay Esaú jilaxan amparapat qhispiyita! Axsarayastwa, jupax nayar jalxatir jutakispawa, ukatsti warminakaxaru, wawanakaxaruw jiwarayaspa.

12 12 (13) Jumax qhan sistaxa: ‘Nayaw yanapaskäma, wawanakamas quta iranankir ch'allanakjam jan jakt'kayäniwa’ ” sasa.

13 13 (14) Uka arumasti Jacobux uka pachpan ikxäna, kuna uywanakapatix jupan utjkäna ukanakatxa, waxt'anak Esaú jilapatak wakicht'äna:

14 14 (15) Pä pataka cabra, pä tunka chivo, pä pataka oveja, pä tunka urqu oveja,

15 15 (16) kimsa tunka jichha wawan camellonaka, pusi tunka vacanaka, tunka urqu vaca qallunaka, pä tunka qachu asnonaka, tunka urqu asnonaka.

16 16 (17) Ukatsti uywatanakaparuw katuyäna, sapa tama yaqhachatkama, jupanakarusti sarakïnwa:

—Jumanakax nayrt'apxam, ukatsti mä tamat mä tamarux jaypacharuki sarapxam —sasa.

17 17 (18) Nayrïr tama irpirirux akham sänwa:

—Esaú jilaxax jikxatkätam, ukatsti jiskt'arakïtam ukkhax: “¿Khitis uywirimaxa, kawkirus saräta, khitinkis uka uywanakasti?” sasaxa,

18 18 (19)ukapachasti sätawa: “Tata Esaú, akanakax jumatakiwa, Jacob luqtirimaw apayantam. Jupasti qhipat jutaski” —sasa.

19 19 (20) Payïr tama irpirirusa, kimsïr tama irpirirusa, ukat ukxar tama irpirirusa sarakïnwa:

—Kunapachatix Esaú jilaxax jikxatapkätam ukkhaxa,

20 20 (21) uka kipkarak sapxäta: “Jacob luqtirimax qhipat jutaski” —sasa.

Jacobusti chuymapan akham amuyäna: “Uka waxt'äwinakampiw Esaú jilaxarux phiñasiñap malarayä, ukhamat inach sum katuqitaspa” sasa.

21 21 (22) Ukhamaw waxt'anak apirinakax nayraqat saräna, jupasti uka arumax pachpa utjnuqäwipan qhantatïna.

Jacobux mä angelampiw nuwasi

22 22 (23) Uka arumasti Jacobux sartasisin pä warmipa, pä uywatapa, tunka mayani wawanakap irpxarüna, jupanakarusti Jaboc sata jawir makhatañjam makhatayäna,

23 23 (24) taqi kunapatix utjkän ukanakamppacha.

24 24 (25) Jacobux sapak qhiparxän ukkhasti, mä jaqiw jupampi nuwasïna uru qhanjtaniñapkama;

25 25 (26) ukampis uka jaqix Jacobur jan atipjañjamätapatsti, lankhu charampi, thixnimpi jikthaptkis ukkhat nuwantäna, Jacobun uka ch'akha muqupasti jupampi nuwaskasin jithinuqtäna.

26 26 (27) Ukat uka jaqix Jacobur säna:

—Antutxita, willjtanxiwa —sasa.

Jacobusti ukxaruw sarakïna:

—Janitix aski waxt'äwinakam churkitätaxa, janiw antutkämati —sasa.

27 27 (28) —¿Kuna sutinïtasa? —sasaw uka jaqix jiskt'äna.

—Jacob satätwa —sasaw jupax sarakïna.

28 28 (29) Ukat uka jaqix säna:

—Janiw jichhax Jacob satäxätati. Sutimax Israel satäxaniwa, Diosampi, jaqinakampi nuwasitamata, jumaw atipjaraktaxa —sasa.

29 29 (30) Jacobusti jiskt'arakïnwa:

—Jichhax jumarak sita, ¿kunas sutimaxa? —sasa.

Ukampis uka jaqix sänwa:

—¿Kunatakis sutix yatiñ muntasti? —sasa.

Ukatsti uka jaqix ukawjanpach Jacoburux aski waxt'äwip churäna.

30 30 (31) Jacobusti uka chiqarux Penuel sasaw sutichäna, sarakïnwa: “Diosarux ajanuy ajanuw uñkatta, ukampis jakaskaktwa” sasa.

31 31 (32) Intix jalsunxänwa, kunapachatix Jacobux Penuel chiqat sarxäna ukkhaxa, ukampisa thixnipa usuchjatätapatsti jupax wixchutisaw saräna.

32 32 (33) Ukat Israelan wawanakapax thixninkir anku jichhürkam jan manq'apkiti, Jacobun ukkhat usuchjatätapata.