1Ukanak tukt'ayatarusti, marka apnaqir jilïrinakax nayar jak'achasisin sapxitu: “Esdras, yatiyañ munapxsma; israelitanakasa, sacerdotenakasa, levita jaqinakasa, janiw aka markankir jaqinakat yaqhachat jakapkiti: cananeonakata, hititanakata, ferezeonakata, jebuseonakata, amonitanakata, moabitanakata, egipcionakata, amorreonakatsa, ukanakan axtkañ idolonakar luqtas sarnaqäwinakapatxa.
2Jupanakasa, yuqanakapasa uka markankirinakan phuchhanakapampiw jaqichasipxi; ukhamasti Tatitun markapax yaqha markanakankir jaqinakampiw mayachasxapxi. Nayraqatax jilïrinakampi, marka apnaqirinakampiw juch lurapxi” sasa.
3Uka arunak ist'asinsti, chuyma ust'ataw isix ch'iyanuqasta, ñik'utaxsa, sunkhaxsa mitharasirakta, wali llakt'at jikxatasisaw uraqir qunt'asta.
4Jayp'thapiñkamaw ukham jikxatasiskäyäta. Nayamp chik kutt'anirinakasti naya jak'ankapxänwa, jupanakax uka israelitanakan juchanakap layku kuna mutuyäwtix Tatitux apayankani uk axsarapxäna.
5Ukatsti, jayp'u tuqir wilañcha luqtañäki ukkhaw llakisiñaxat kutitatta. Ch'iyanuqat isinpachaw Tatituxan nayraqatapan qunqurt'asta, amparanakax luqtasaw
6jupar sarakta: “Tatituxay, Tatituxay, nayax wali p'inqasitätwa, chuymaw chhaqtarakitu, janiw kunjämsa jumamp parlirjamäkti. Nanakan jucha luratanakaxax sintipuniw utjapxitu, juchanakaxas alaxpachkamarakiw puri.
7Khä urunakatpach jichhakamaw wali jucha lurañan jakapxta. Juchanakax laykuw nanakasa, reyinakaxasa, sacerdotenakaxas yaqha markanakankir reyinakan munañanakapar katuyat jikxatasipxta. Ukatxa chhuxriñchjata, jayar apanukuta, lunthatjata, jisk'achjata jikxatasipxäyäta, jichhasti uka pachpa luräwiruw puripxarakta.
8Ukampis jichhax nanakan Tatit Diosaxay, juman khuyapayasiñamat nanakat mä tamax antutat jikxatasi, ukhamat nanakatak yaqhacharapipkista uka uraqin jan kuna llakin jakañataki; jumaw machaq qhana jakañanakaxaru churapxista, t'aqhisiñanakax taypin mä juk'a samarañ churapxarakista.
9Nanakax t'aqhisiyatäpkta ukasa, janiw jumax t'aqhisïwixan apanukupkistati; Persia markankir reyinak tuqiw khuyapayasiñam uñacht'ayapxista, pampar tukut utam wasitat sayt'ayapxañaxatakiw jakañ churapxista, ¡Judá uraqina, Jerusalén markansa imapxarakistawa!
10“Ukampis jichhax nanakan Diosaxay, taqi jan wali luratanakaxat ¿kamsapxiristsa? Nanakax janiw juman arsüwinakam
11jumar luqtir profetanakam tuqi churapkista ukanakarux phuqhapkti. Jumasti nanakarux iwxapxistawa, kawkïr uraqirutix katuntañatak mantapkäyäta ukaxa, uka chiqankiri jaqinakan ñanqha lurañanakapampi phuqhantat uñjasitapa, jupanakan axtkañ luräwinakapamp phuqhantatätapa.
12Sapxarakistawa, phuchhanakaxax uka jaqinakan yuqanakapamp jan jaqichasipxañapataki, janirak jupanakan phuchhanakapas yuqanakaxamp jaqichasipxañapataki. Janipun kunapachas uka jaqinakan samarañanakapsa, sumankañapsa munañanakaxa, ukhamata nanakax ch'aman sarantañataki, aka uraqin utjir suma achunakapat manq'asiñataki, kusisit jakañatakiraki, ukatsti wawanakaxampiru, allchhinakaxampir tutipäkaspas ukham wiñayatak jaytañataki.
13“Nanakan juchachasitanakaxata, ñanqha luräwinakaxat taqi uka jan walt'añanakarux puripxta. Nanakan Tatituxay, janiw juchanakaxatjam mutuyapkistati, jan ukasti, jan kuna llakin sarnaqasiñak churapxistaxa,
14¿wasitampit kamachi arunakam p'akintapxirista, ukatsti axtkañ saräwini warminakapampit jaqichasipxirista? Janiw ukhamäkaspati, ¿Janit jumasti nanakar q'al tukjañkam phiñaskasmasti?
15“¡Tatay, Israel markan Tatit Diosapa, jumax chiqaparuw uñjapxista! Jumarakiw wakt'ayarakta nanak taypit mä tama qhispiyasina jakañapsa, kunjämatix jichhürux uñjapkta ukhama. Nanakasti chiqpachan juma nayraqatan wali juchanïpxtwa; jumar jak'achasiñatakis janiw askïpkti” sasa.
Who We AreWhat We EelieveWhat We Do
2025 by iamachristian.org,Inc All rights reserved.
