DEUTERONOMIO 4 - Qullan Arunaka DC

Moisesax israelitanakar ist'asirïñapatakiw iwxt'i

1Moisesasti saskakïnwa: “Jichhasti Israelit jaqinaka, yatichapksma uka kamachi arunak ist'apxam, uka kamachi arunakarjam phuqhas sarnaqapxarakim, kawkïri uraqtix nayra awkinakaman Tatit Diosapax churapkätam ukan jakapxañamataki.

2Churapksma uka kamachi arunakarux janipun jilxatayapxamti, janirak apaqapxamsa; jan ukasti, Tatit Diosaman kamachi arunakap phuqhapxam.

3Jumanakasti uñjapxtawa, kuntix Tatitux Baal-peor sat chiqan lurki ukxa, ukhamarak kunjämtix jumanak taypit ukan utjir diosar yupaychirinakar jiwaraykän uksa.

4Ukampis jumanakat khitinakatix Tatit Diosamar taqi iyawsañampi arkapkta ukanakax jakasipktawa.

5Nayasti jumanakarux Tatit Diosax iwxawaykitu taqi uka kamachi arunak yatichapxsma, katuqapkäta uka uraqin uka kamachinakarjam sarnaqapxañamataki.

6Uka kamachi arunak phuqhasaraki sarnaqapxam, ukhamat taqi markanakas yatini, jumanakan yatiñ kankañanïpxatama, suma amuyt'anïpxatama; kunapachatix uka kamachinakxat yatipkani ukkhasti, jupanakax sapxaniwa: ‘Kunja suma amuyt'an markas aka markaxa’ sasa.

7¿Kawkïr jach'a markan diosaparak jupanak jak'anki, kamisatix Tatit Diosasax jupar art'asipktan ukapacha jiwasanak jak'ankki ukhamsti?

8¿Kawkïr jach'a markarak utji, kamachinakapasa, arsutanakapas chiqa, nayax jumanakar jichhürun yatiyapksma ukhamasti?

9Jichhasti sum imapxam, janipun armasipxamti taqi kuntix uñjapkta ukanaka, janirak chuymanakamatsa mistpanti; ukat sipana, wawanakamansa wawanakapar yatichapxam.

Diosax Horeb qullun Israel markar parli

10“Kunürutix Horeb qullun jumanakax Diosan nayraqatapan jikxatasipkäyäta ukkhaxa, Tatitux nayaruw sitäna: ‘Taqpach markar tantachthapim, arunakax ist'añapataki, jakañanakapan nayar waqaychañ yatiqañapataki, ukatsti wawanakapar kipkarak yatichapxañapataki’ sasa.

11Jumanakasti qullu kayuruw jak'achasipxtaxa, qullutsti aqaskir ninanakaw wali alaykam mistüna, ch'iyar ch'amak qinayaw uñjasirakïna;

12ukatsti Tatitux nina taypit parlanipxtam. Jumanakasti arunakap ist'apxtawa, ukampis janiw jupar uñjapktati.

13Tatitusti jumanakarux jupan suma arust'äwip yatiyapxtam, ukasti Tunka Kamachinakawa, pä qala tablar qillqt'at churapxtam, jumanakan uka kamachinakarjam sarnaqapxañamataki.

14Nayaruw Tatitux iwxitu kamachinakapa, arsutanakap jumanakar yatichañataki, churapkätam uka uraqin phuqhañanakamataki.

Yaqha diosanakar yupaychañxat iwxanaka

15“Kunürutix Tatitux Horeb qullun nina taypit parlanipktam ukkhax janiw kunsa uñjapktati. Walpun ukanakat amuyasipxam,

16jan jumanakan uka yaqha diosanak lurañ juchar puripxañamataki, kawkïrinakatix chacharu, warmiru uñtat luratäki ukanaka,

17janiraki animalanakaru, jamach'inakaru,

18asirunakaru, chawllanakar uñtat luratäki ukanaksa.

19Ukatsti alaxpach uñtasina, intiru, phaxsiru, warawaranakaru, taqpach warawaranakar uñtapkät ukapachaxa, jan ukanakar yupaychapxamti, ukanaksti Tatit Dios awkisaw taqi akapach uraqinkir markanakatak luri.

20Jumanakarusti Tatituw irpsunipxtam khä Egipto hierro umatatayañ hornota, ukatsti jupan markaparuw tukuyapxtam, kunjämatix jichhax jikxatasipkta ukhama.

21Ukampisa, Tatitux jumanakan juchanakam laykuw nayatak q'apisi, ukatsti juramento luri nayan Jordán jawir jan makhatañaxataki, churapkätam uka suma uraqir jan mantañaxatakisa.

22Ukhamasti nayax aka markan jiwä, janirakiw Jordán jawir khurkatarus makhatkäti, ukampis jumanakax uka jawir makhatapxätawa, uka suma uraqsa jumanakatakiw katuntasipxäta.

23Ukampis amuyasipxam janipun kuna suma arust'äwtix Diosampi lurapkta ukanak armasipxamti. Janirak kuna idolonaksa, kunar uñtat yaqha diosanaksa lurasipxamti. Tatitun arunakap phuqhapxam, janipun kuna idolonakarus yupaychapxamti.

24¡Jumanakan Tatit Diosamasti tumpasir Diosawa, taqi kuns nakhantir ninjamawa!

25“Kunapachatix jumanakax uka uraqin wawanakanïxapxäta, allchhinakanïxapxäta, jumanakas awkiptxapxarakïta, ukatsti jumanakax kuna uñtat yaqha diosanak lurasisa jucharu puripxäta, ukhamat Tatit Diosam nayraqatan mä jach'a jucha lurasina, ukat jupar q'apisiyapxät ukkhaxa,

26alaxpachampi, akapachampiw qhanañchirit sayt'ani, janiw walja urunak Jordán jawira khurkatankir uraqin jakapkätati, jan ukasti taqi jumanakax t'unjataw uñjasipxäta.

27Tatitusti jumanakarux taqi markanakaruw ananukupxätam, ukatsti mä juk'anikirakiw jumanakat uka markanakan jilt'ani.

28Uka markanakansti jaqin lurat diosanakaruw luqtapxäta qalata, lawata lurat idolonakaru, ukanakasti janiw uñjapkiti janirakiw ist'apkisa, manq'apkisa, samsupkisa.

29Ukampis jumanakatix uka chiqan Tatit Diosamar taqi chuymampi, taqi jakañampirak thaqhapxäta ukaxa, jikxatapxätawa.

30Kunapachatix jumanakax taqi uka t'aqhisiñanakana, llakisiñanakan uñjasisina, Tatitur kuttapxäta, iyawsapxarakïta ukkhaxa,

31Diosan suma chuymanïtap laykux janiw jaytanukupkätamti, t'unjapkätamsa, janiw awkinakamamp lurat arust'äwit armaskaniti, janirakiw arupampi arsuwayki ukanak phuqhañsa armaskaniti.

32“Jichhasti jumanakat nayra pacha urunak uñtapxam, Diosax jaqir aka uraqin irnuqkän uka pachatpach yatxatapxam; taqi akapach uraqinjam sarasin jiskt'apxarakim, kunapachach kunjämatix jichhax muspharkañanak luraski ukhama jach'a lurasïwinakax utjpachäna.

33¿Utjpachati kuna markasa jumanakjam Diosan nina taypitpach parlanitap ist'irixa?

34¿Utjarakpachati mä diosasa markaparu yaqha markanak taypit ajlliri, wali yant'anakampi, uñacht'äwinakampi, muspharkay luräwinakampi, nuwasiñanakampi, ukatsti wali ch'aman amparampi katuntasa, wali axsarkañ luräwinak luriri, kunjämatix Tatit Diosamax jumanakatak Egipto markan lurkäna ukhamsti?

35Ukanakasti Tatitun chiqpach Diosätapa yatipxañamataki uñacht'ayatawa, jupat sipansa yaqhax jan utjatap yatiñamataki.

36Jupasti alaxpachatpach jumanakar chiqachañatak parlanipxtam, aka uraqinxa jach'a ninap uñacht'ayapxtam, arunakapsti nina taypit ist'apxaraktaxa.

37Jupaw nayra awkinakamarux munäna, ukatsti wawanakaparuw ajllirakïna, Egipto markat jach'a ch'amapamp qhispiyanisa.

38Jumanak nayräxatsti walja jaqinakan markanakaruw jaqunuku, jumanakat sipansa juk'amp ch'aman markanakaru, jupanakan uraqinakap katuntasisin utjasipxañamataki, kunjämtix jichhax luraski ukhama.

39“Ukhamasti, chuymanakamar sum imapxam Tatitukiw Diosaxa, alaxpachansa, akapachansa, janiw yaqhax jupat juk'amp utjkiti.

40Jichhürun churapksma uka kamachi arunakap phuqhapxam, ukatsti jumanakasa, wawanakamasa, sumakiw sarnaqapxäta, walja maranakarakiw jakapxäta Tatit Diosamax wiñayatak churapkätam uka uraqina.”

Jordán jawirat inti jalsu tuqinkir imantasiñ markanaka

41Ukatsti Moisesax kimsa markanak ajllïna Jordán jawirat inti jalsu tuqiru,

42ukhamat khiti jaqitix masipar jan munkasin jiwaykaspa, jani uka masipampix ch'axwirïkasina, ukhamat uka kimsa markanakat maynïr markar jaltxasin qhispiyasiñataki.

43Uka markanakasti akanakänwa: Rubén ayllunkirinakatakixa, wasara pata pampankir Béser marka; Gad sat ayllunkirinakatakisti, Galaad uraqinkir Ramot sat marka; Manasesan chikat ayllunkirinakatakisti, Basán uraqinkir Golán sat marka.

Tunka Kamachin qalltapa

44Aka yatichäwinak Moisesax Israel markar churäna,

45ukhamarak kamachinaka, kamachi arunaka, arsüwinak yatiyäna, kunapachatix jupanakax Egipto markat mistunisina,

46Jordán jawirat inti jalsu tuqin jikxatasipkän ukapacha, Bet-peor sat uraqi uñkatas qhirwana; amorreonakan Sihón sat reyipan uraqipana. Sihón reyisti Hesbón markan jakäna, ukatsti Moisesampi Israel markampiw jupar atipjapxäna, israelitanakax Egipto markat mistunipkän ukapacha.

47Israelitanakasti Sihón reyin taqpach uraqinakap katuntäna, Og sat Basán markan reyipan uraqinakapamppacha, Jordán jawirat inti jalsu tuqin jakapkän uka pani amorreo reyinakan uraqinakapa.

48-49Jupanakan uraqinakapasti Sirión sat qullut qalltäna, uka qullusti Hermón sutimpi uñt'atarakiwa. Aroer chiqata, aynach tuqir muytanïna, Arnón jawir thiyanakata, Pisgá sat qullukama. Ukatsti Mar Muerto sat quta sarakipäna, Arabá sat taqpach uraqinakampi. Uka chiqan Moisesax, Jordán jawirat inti jalsu tuqin israelitanakarux Tatitun kamachi arunakap katuyäna.