2 REYES 16 - Qullan Arunaka DC

Ahaz reyin Judá marka apnaqatapa(2 Cr 28.1-27)

1Remalías chachan Pécah yuqapax, tunka paqallqun mara Israel marka apnaqkän ukkhaw, Jotam chachan Ahaz yuqapax Judá marka apnaqañ qalltäna.

2Jupasti ukapachax pä tunka maranïnwa, ukatsti Jerusalén markan tunka suxtan maraw Judá marka apnaqäna; jupax janiw Tatit Diosapan nayraqatapan chiqap sarnaqkänti, kunjämtix David nayra awkipax chiqap sarnaqkäna ukhama,

3jupax Israelan maynïr reyinakapan thakhip arkäna, jupasti wawaparusa wilañcha luqtasin nakhantayäna, kunjämtix markanakax jan walinak lurapxirïkän ukhama, Tatitusti uka markanakarux israelitanakan nayraqatapat jaqunukutaynawa.

4Ukxarusti qullu patanakana, wali laphinakan quqanak k'uchunakan utjir yupaychañ chiqanakan wilañchanak luqtäna, inciensonak nakhayarakïna.

5Khä urunakansti Siriankir Rezín reyimpi, Israelankir Pécah reyimpix, Jerusalén markaruw katuntañatak sarapxäna. Ukampisa, markar muyuntapkchïn ukasa, janiw Ahaz reyir atipjañatak ch'amanïpkänti.

6Ukapachasti, Siria markan Rezín reyipax markapatak Elat marka kutirayasxäna, ukatsti Judá markankirinakarux uka markat apanukurakïna, ukatxa edomitanakaw purinipxäna, Judá jaqinakar Elat markat apanukusinxa, jupanakaw jichhürkam ukan jakasipki.

7Ukatsti Ahaz reyix, yatiyirinak khithäna Asiria markankir Tiglat-piléser reyir akham sapxañapataki: “Naya luqtirimax, juman wawamjamätwa. Ukhamasti, Siriankir reyimpita, Israelankir reyimpit nayar qhispiyiriy jutam, jupanakax nayar nuwantiriw jutasipkitu” sasa.

8Ukxarusti Ahaz reyix, kuna qullqimpi, qurimpitix Tatitun utapana, ukhamaraki reyin utapan utjkatayna ukanak katusin, Asiriankir reyir waxt'añatakiw apayäna,

9ukatsti Ahaz reyin mayitaparu ist'asinxa, Damasco markar katuntañatakiw wakt'ayasïna, uka marksti katuntänwa, uka qhipatsti markachirinakaparux Quir sat chiqaruw apanukuyäna, Resín reyirux jiwayarakïnwa.

10Kunapachatix Ahaz reyix Damasco markar Asiriankir Tiglat-piléser reyimp jikisir sarkän ukkhaxa, jupax ukan utjkatayna uka altar uñjäna. Ukatsti Urías sacerdoteruw kunjäm luratäkäntix uka altarax uka qillqaqat plano apayäna,

11ukat Urías sacerdotex, mä altar luräna, kunjämtix Ahaz reyix Damasco markatpach suma qillqaqat plano apayankatayna ukhamarjam taqi kun phuqhasa, jupasti Ahaz reyix Damasco markat janïr kutt'ankän ukkhaw uka altar lurañ tukt'ayxäna.

12Ahaz reyix Damasco markat kuttanisinxa, altar uñjiriw saräna, jak'achasisinsti uka altarxan nakt'ayat waxt'äwi luqtäna;

13granonakat waxt'äwi nakt'ayarakïna, vino waxt'äwip altarxar warakipäna, ukhamaraki sumankañ wilañcha luqtanakapan wilapa ch'allakipäna.

14Uka qhipatsti, Ahaz reyix Tatitun utap nayraqatan uchatäkän uka broncet lurat altar aptxäna, ukat alay tuqiruw uskxäna, uka altar lantsti, luraykatayna uka machaq altar uchxäna.

15Ukatsti Urías sacerdoterux yatiyarakïnwa, jach'a altarana willjta nakt'at luqtäwi, granonakat jayp'u waxt'äwi nakt'ayañapataki, ukhamaraki reyin nakt'ayat luqtäwinakapsa, granonakat waxt'äwinakapsa, ukatsti taqpach markan nakt'ayat luqtäwinakapa, granonakat waxt'äwinakapa, vino waxt'äwinakap nakt'ayañapataki. Ukxarusti uka altar patxaru nakt'at wilañchanakan wilanakap ch'allakipañapataki, ukampis broncet lurat altaraxa jupa sapaki Tatitumpi parlañatakïtapa yatiyarakïna.

16Ukatsti Urías sacerdotex kuntix Ahaz reyix lurañapatak siskäna ukanak taqpach luräna.

17Ukxarusti Ahaz reyix aynacha uchañana telapxa khuchhuränwa, ukatsti katxäski uka broncet lurat urqu vacanakan patxapankki uka jach'a lamansa apaqxarakïnwa, uksti qalanak suk'suta patxaruw uchäna.

18Asiriankir reyir kusisiyañatakisti, Tatitun utapan sábado urutaki utachapkatayna uka utachxatat apsxäna, ukhamaraki reyin mantañapatakik luratäkäna uka anqa punkumppacha.

19Ahaz reyin ukat ukxar sarnaqäwipasa, taqi kun luratanakapasa Judá markankir reyinakan luräwinakapa qillqatankiwa.

20Jupax jiwxäna ukkhasti, Davidan Markapan nayra awkinakapan imäwip thiyaruw imt'xapxäna. Uka qhipatsti Ezequías yuqapaw jupa lantix marka apnaqxäna.