SALMOS 106 - Qullan Arunaka DC

SALMO 106Israel markax sapa kutiw Tatitur qallkati

1¡Tatitux jach'añchatäpan!

Tatitur yuspagarapxam,

munasiñapax jan tukuskiriwa,

khuyapayasiñapax wiñayawa.

2¿Khitirak Diosan muspharkañ luräwinakap arsuspasti?

¿Khitirak aytat kankañapat jach'añchaspasti?

3Chiqa kankañar yäqirinakax kusisiñaniwa,

chiqapar uñjirinakas kusisiñaniwa.

4Tatay, markamar munasitam laykuy nayat amtasita,

qhispiyir jutkät ukapachay nayar tumpasita,

5ajllitanakaman kusisiñap uñjañaxataki,

markaman kusisiñapamp kusisiñaxataki.

6Nayra awkinakaxar uñtataw jucha lurapxta;

kunayman ñanqhanaka, juchanak lurapxta.

7Egipto markankapkäna ukkhaxa,

janiw muspharkañ luräwinakam amuyapkänti;

jach'a khuyapayasiñamat armasipxäna,

Mar Rojo quta jak'an jumarux qallkatapxäyätam.

8Ukampis juma, Diosaw jupanakarux qhispiyäyätaxa,

ukhamat juman sutimax jach'achatäñapataki.

9Mar Rojo qutaruw tuqinuqäyätaxa,

qutasti wañt'änwa,

waña uraqinjam irpkatäyätaxa.

10Ukham lurasaw uñisirin amparapat qhispiyäyätaxa,

timasirin amparapat antutnukuyäyätaxa.

11Jalxatirinakarux umaw axskatayäna,

janiw maynis jupanakat qhispkänti.

12Ukat Diosan arunakapar iyawsapxäna,

juparurakiw q'uchupxäna.

13Ukampis mäkiw Diosan luräwinakap armasipxäna,

janiw amtäwinakap uñt'añatak suyapkänti.

14Khä ch'usa wasaran Diosarux yant'apxäna,

munatanakaparjamaw manq'a mayipxäna.

15Ukat Diosax jupanakan mayitaparjam churäna,

jiwarayir usunak jupanakar apayanïna.

16Chhujllanak taypin Moisesar uñisipxäna,

Tatitur katuyat Aarón chacharus uñisipxarakïnwa.

17Ukat uraqix jist'artäna,

Datán chachampiru,

Abiram chachan tamapampiruw manq'antäna.

18¡Ninaw jupanakxarux nakhäna!

¡Nina lawrax ñanqha luririnakaruw nakhantäna!

19Horeb qullun vaca qallu lursusipxäna,

quri umatatayasaw mä dios lursupxäna,

ukaruw yupaychapxäna:

20¡qhapaq Tatit Dios lantix

qura manq'ir vacan uñnaqap uchasipxäna!

21Qhispiyir Diosapat armasipxäna,

muspharkañanak Egipton lurkipansa,

22Cam uraqin muspharkañanak lurkipansa,

Mar Rojo qutan jan amuyt'kañanak lurkipansa.

23Diosax jupanakar tukjañ munäna;

jupan ajllit Moisesasti, nayraqatapan achikt'äna,

ukat q'apisiñap t'akurayäna.

24Uka qhipatsti munkay uraqiruw jisk'achapxäna,

janiw Tatitun arupar iyawsapkänti;

25utanakap taypin Tatitutak arusipxäna,

janiw arsutanakap ist'apkänti.

26Tatitusti jupanakar jan walt'ayañatakiw juramento luräna,

jupanakar wasaran jiwarayañatakiw arsüna,

27wawanakapar jiwarayañataki,

yaqha markanak taypir ananukuñataki.

28Pegor chiqan Baal diosan luqtiriparuw tukupxäna,

jiwat diosanakar luqtatanak manq'apxäna.

29Ñanqha luratanakapampix Diosaruw q'apisiyapxäna,

jupanak taypinsti jach'a usuw sartäna.

30Finees chachasti juchanirux juchap uñt'ayäna,

ukhamat uka jach'a usux jan purinkxänti,

31Finees chachan aski luräwipatxa,

wawapan wawapansa aytatapunïniwa.

32Meribá umanak jak'an Tatiturux q'apisiyapxäna,

jupanak laykuw Moisesax jan walir purïna,

33jupan chuymap mayjt'ayapxäna,

lakapasti jan arsuñanak parläna.

34Tatitun aruparjamax janiw markanakar t'unjapkänti,

t'unjapxañapäkän uka markanakarux janiw tukjapkänti.

35Diosar jan uñt'ir jaqinakampiw chikachasipxäna,

luräwinakap yatiqasipxäna:

36diosanakaparuw yupaychapxäna,

ukat jan walt'añanakar puripxäna,

37yuqanakapampi, phuchhanakapampi jiwayasax

ñanqhanakaruw luqtapxäna.

38Jan juchan jaqin wilap wartapxäna,

wawanakapan wilap wartapxäna,

Canaán uraqi diosanakaruw wila luqtapxäna.

Uraqix wilampi q'añuchataw uñjasïna,

39luräwinakapampiw q'añuchasipxäna,

ñanqha luratanakapampiw wachuqapxäna.

40Tatitux markapatakiw q'apisïna,

jupankirinakarux uñisïnwa;

41Diosar jan uñt'ir jaqinakaruw katxaruyäna,

uñisirinakapasti jupanakaruw apnaqäna;

42timanakapax t'aqhisiyänwa,

ch'amapampiw axsarayäna.

43Walja kutiw Tatitux jupanakar qhispiyäna:

jupanakasti amtataparux saykatapxänwa,

pachpa juchanakapampiw aynacht'apxäna.

44Ukampis Tatitux ayqupxatap uñtanïna,

arnaqasitanakaparuw ist'äna;

45jupanakamp arust'äwi luratat amtasïna,

jach'a khuyapayasiñampiw ch'allxtayasïna,

ukat jan mutuykxänti:

46jupanakar katuntirinakampis

khuyapayasiñampiw uñjayäna.

47¡Tatit Diosaxay, qhispiyapxakitaya!

¡Yaqha markanak taypit irpthapxapxita,

qullan sutim jach'añchañataki,

kusisiñampi jumar yupaychañataki.

48Israelan Tatit Diosapax

wiñayan wiñayapatak jach'añchatäpan.

Taqpach markax sispan:

“¡Ukhamäpan!” sasa.

¡Tatitux jach'añchatäpan!