DEUTERONOMIO 20 - Qullan Arunaka DC

Nuwasiñatak kamachinaka

1Moisesasti saskakïnwa: “Kunapachatix jumanakax uñisirinakamamp nuwasir sarantapkät ukapachaxa, janiw jupanakar axsarapxätati. Uñisirinakamax jumanakat sipan juk'amp ch'amanïskpasa, walja caballonakani, walja nuwasiñ carronakanïskpasa; Egipto uraqit irpsunipktam uka Tatit Diosamaw jumanakampïskani.

2Nuwasiñ urux purinkani ukkhasti, sacerdotew taqpach ejercitor parlani,

3akham sasa: ‘Ist'apxam israelit jaqinaka; jichhürux uñisirinakamampiw nuwasipxäta. Janiy ch'amanakamax jiwt'pati, janirak axsarapxamsa; jan khathatipxamti, janirak mulljasipxamsa,

4jumanakan Tatit Diosamaw jumanakampïski; jupaw uñisirinakamamp nuwasiskani, jupanakarux atipjapxarakïtawa’ sasa.

5“Ukxarusti ejerciton jilïrinakapaw soldadonakar parlarakini, akham sasa: ‘Jumanakat khititix mä machaq uta utachaschi, ukat janirak uka utan jakkchiti ukasti, utapar sarxpan, inampis jupax nuwasiñan jiwaspa ukat yaqha jaqik uka utapan utjasxaspa.

6Jumanakat khititix uva yapu ayruschi, ukatsti janirak uka achunakat manq'kchiti, jupasti utapar sarxpan, inampis nuwasiñan jiwaspa ukat yaqha jaqik uka uva yapupat manq'xaspa.

7Jumanakat khititix jaqichasiñatak parlatanïchi, ukatsti janirak jaqichaskchiti, jupax utapar sarxpan, inampis nuwasiñan jiwaspa ukat yaqhak parlatapamp jaqichasxchispa’ sasa.

8“Ukatsti jilïrinakax ejercitonkirinakar sasipkakiniwa akham sasa: ‘Jumanakat khititix axsarayaschi, ch'amapsa jiwt'ayasirakchi ukax, utapar sarxpan jan mayni jilanakapar llajllasiyañapataki’ sasa.

9Kunapachatix jilïrinakax parlañ tukuyxapxan ukkhasti, ejerciton jilïrinakapax soldadonakapan nayraqatap nuwasïwir sarantapxani.

10“Jumanakax mä markar katuntañatak jak'achasipkät ukapachaxa, nayraqatax sumankañxat jupanakamp parlapxäta.

11Ukatsti uka markankir jaqinakatix sumankañ munapxani, markaparus mantayapxarakïtam ukapachax, jupanakar wali ch'ama irnaqañanak lurayasaw luqtayasipxäta.

12Ukampis jupanakatix jumanakamp jan sumankañ munapkani, ukat nuwasiñ qalltapxani ukkhaxa, jumanakax markar muyuntasin nuwantapxäta.

13Tatit Diosamaw jumanakar katuyapxätam, jumanakasti espadampkamaw taqi chachanakar jiwarayapxäta.

14Taqi warminaka, wawanaka, uywanaka, taqi kunatix markan utjki ukanakax jumanakankaniwa, ukatsti uñisirinakamat aparanipkta ukanakat Tatit Diosamax manq'ayapxarakïtam.

15Uka pachparak jumanakat jayankir taqpach markanakar lurapxäta, uraqimat jayankapki ukanakaru.

16Ukampis Tatit Diosamax churkätam uka uraqin utjir markanakapanxa, janiw maynirus jakaskir jaytapxätati,

17jan ukasti, Diosan arsutaparjam jan maynin t'unjanipxäta, hititanakaru, amorreonakaru, cananeonakaru, ferezeonakaru, heveonakaru, jebuseonakaru, Tatitur wilañcha luqtapkasma ukhama,

18ukhamat uka axtaskañ sarnaqäwinakapa, kunjämtix diosanakapar yupaychapki ukanak jumanakar jan yatichaskañapataki, ukham lurasin Tatit Diosamatak jucha jan lurasipkañamataki.

19“Mä marka katuntañatakitix walja urunak uka markar muyuntapxañamächi ukapachaxa, janiw jumanakax achuni quqanakap hachamp tinkurayapxätati, achunakapax jumanakan manq'añamatakïniwa; ukhamarus pampankir quqanakakiwa, janiw jaqinakjam jumanakar saykatapkätamti.

20Ukampis kawkïr quqanakatix achunak jan achurïki ukanak tinkurayapxäta, katuntapkät uka markar muyuntañatakiw lawanak munapxasma, amparanakamar jalt'añapkama.