SALMOS 85 - Qullan Arunaka DC

SALMO 85¡Wasitat qhispiyapxakita! 1 Coré chachan wawanakapan q'uchupa.

1 1 (2) Tatay,

aka markamatakix sinti munasiñanïtawa,

katuntat Israelarux wasitat kusisiñar kuttayanxta,

2 2 (3) markaman ñanqha luratanakap pampachtawa,

taqpach juchanakapax pampachatawa;

3 3 (4) q'apisiñam apanukxtawa.

4 4 (5) Qhispiyir Diosaxay,

jichhax mayampi qhispiyapxakita,

janikiy nanakampix q'apisitäxamti.

5 5 (6) ¿Nanakatakix q'apisitakïskätati,

mara marapunit q'apisïtaxa?

6 6 (7) ¿Janit wasitat jakañ churapkitäta,

markaman jumamp kusisiñapatakixa?

7 7 (8) Tatay,

¡munasiñam uñacht'ayapxita,

qhispiyapxarakita!

8 8 (9) Kuntix Tatitux arskän uk ist'ä:

Diosax sumankañxat markaparux yatiyani,

taqpach chuymamp jupar iyawsirinakaru,

wasitat ñanqha jan lurapxañapataki.

9 9 (10) Diosax jak'asankapuniwa,

iyawsirinakapar qhispiyañatakixa;

qhapaq kankañapasti uraqisan utjasini.

10 10 (11) Khuyapayasiñampi,

aski kankañampix jikisipxaniwa,

sumankañampi, chiqapar uñjañampiw

mayacht'asipxani,

11 11 (12) aski kankañax uraqit mistuni,

chiqapar uñjañasti alaxpachatpach uñtanini.

12 12 (13) Tatit pachpaw jallu apayanini,

uraqisasti sum achurakini.

13 13 (14) Aski kankañax jupan nayraqatap sarani,

jupatakisti thakhi wakicharapini.