JOB 31 - Qullan Arunaka DC

1Naya pachpaw chuymaxan amtasta,

mä tawaqur jan uñch'ukiñataki.

2¿Kunarak nayast alaxpachankir

taqi ch'aman Diosat katuqtsti?

3¡Ñanqha jucharar jaqir wakt'ki

uka t'aqhisiñaki!

4Amuyatax Diosax janis uñjkitaspa ukhama

janiraki luräwinakax uñjkaspa ukhamawa.

5Nayax juramentompiw arsta,

janipuniw khitirus ñanqha amtañamp kuns lurkti,

janiw khitirus sallqjañ amtkaraktti.

6¡Diosax nayar yant'itpan,

ukhamat nayan jan juchanïtax yatirakini!

7Nayatix chiqa thakhit saranuksta,

inampst'añanakampi atipjayasiraksta,

jaqin kuna yänakapsa katuntasiraksta,

8ukapachasti, yaqhanak yapuxat manq'pan,

ayrusitanakaxsa saphitpach jik'inukupxpan.

9Mä warmimpitix sallqjayastxa,

jan ukax, uta jak'ankir masixan warmipar uñch'ukiskaraksta ukasti,

10warmixax yaqha jaqin uywatapar tukpan,

jan uñt'at jaqinakarak warmixampix ikintpan.

11Uka luräwinakax jach'a p'inqäspawa;

mutuñ katuqañas wakisirakispawa.

12Tukjir ninar uñtatäspawa,

ukhamarakiw taqi kunaxsa tukjaspa.

13Uywatanakaxatix kunsa mayipkitän ukapachaxa,

nayax mayitanakapar ist'apunïyätwa.

14Jan ukasti,

¿kunjämatsa nayax Diosan nayraqatapar uñstiristxa?

Jupatix lurataxat jiskt'itaspa ukapachasti, ¿kamsasarak arsusiriststi?

15Pachpa Diosakiw taykasan purakapan irnuqasistu,

jupanakarusa, nayarus jupakiw jakañ churarakistu.

16Jan kunan jaqirux pist'ayasiñapan yanapt'apunïyätwa,

janirakiw ijma warminakan manq'at awtjat sarnaqañapsa munkäyätti.

17Janipuniw naya sapaki manq'ataxax utjkiti

wajchar manq'a jan waxt'asa.

18Awkipäkiristsa ukhampun wajcharux uñjäyäta,

ijma warminakan arxatiripapunïyätwa.

19Kunapachatix maynix jan isin uñjasïnxa,

jan ukax, jan kunan jaqix kunampi janxatasiñapas jan utjkän ukapachasti,

20ovejanakaxan t'awrapat isi lurasin churirïyäta,

jupasti walpun nayar yuspagart'irïna.

21Janipuniw kunapachas

taripirinakamp sumankataxat

wajcharux axsarayirïkti.

22Uka arunakatix jan chiqäkchi ukaxa,

amparanakaxax p'akirtitpan,

kallachitsa jalaqtarakitpan.

23Nayax Diosan mutuyäwip axsarayätwa;

¡Janiw ch'aman kankañaparus ch'urkhiskiriskäyätti!

24Janipuniw qamir kankañar alkatasis sarnaqkäyätti.

25Janipuniw walja qamir yänakäniñax kusisiñaxäkänti,

jan ukax walja qullqi jikxatañasa.

26Intin k'ajatap uñjta,

phaxsin suma qhanapamp saraskir uñjarakta,

27ukampis janipuniw ukanakarux

jamasansa qhanansa yupaychkti.

28Uka lurañax mutuñ katuqañatakïsapänwa,

¡alaxpachankir Diosar jan uñt'ir tukuñäsapänwa!

29Janipuniw uñisirixan aynacht'atapat kusiskäyätti,

jan walt'añ jupar puritapatsa kusiskäyätti.

30Janipuniw uñisirixarux ñanqhachkäyätti,

janirakiw jiwañapsa munkäyätti.

31Nayamp chika utjirinakatix jaya markat jutirinakar

jan walinak lurañ munapxäna ukapachasti,

32nayax janipuniw uka jaqirux

anqar ikiyirïkti.

Thakhi saririnakarux utaxarupuniw katuqirïyäta.

33Janipuniw mayninakjamax jucha luratanakax imantkäyätti,

janirakiw chuymaxarus imt'askäyätti,

34jaqinakar axsaratax layku.

Janipuniw wila masinakaxamp jan jisk'achayasiñ laykux

kunapachas ukanakxa jamasar imxäskäyätti.

35¡Khitikis nayar ist'itaspa!

Arsutaxsti, sutixamp qillqantasaw “Ukhamaw” sarakta;

jichhasti, ¡taqi ch'amani Diosax sitpan!

Nayar juchañchañanaksti qillqasin arsunipxpan,

36ukanaksti taqi chuymaw katuqä,

mä pillükaspas ukham uchasirakï.

37Nayax taqi lurataxat Diosar katuyä,

jan kuna axsarasaw jupa nayraqatarux jak'achasï.

38Uraqinakaxax janiw nayatak arnaqasis alaxpachar mayipkiti,

janirakiw sukanakapas llakisiñat jachapkiti.

39Ukampis maynirutix achunakap nayax lunthatsta,

jan ukax, irnaqirinakar t'aqhisiysta ukaxa,

40¡uraqinakaxan trigo lantix ch'aphinak achpan,

cebada lantis quranakarak jilantpan!

Uka arunakampiw Job chachax arsusiñap tukuyäna.