OSEAS 8 - Qullan Arunaka DC

Israel markax yaqha diosanakar yupaychatapat juchañchatawa

1“¡Uñch'ukiri, Tatitun markapxarux trompetam phust'am!

Markaxar t'unjirix mä pakar uñtataw jutaski.

Markaxax jan ist'asiriwa;

janiw arust'äwixarus phuqhkiti,

janirakiw kamachinakaxarjamas arkkituti.

2Nayan ukarusti arnaqt'asisax jutasipkarakiwa:

‘Jumarux Israelan Diosapat uñt'asipxsma’ sasa.

3Ukampis Israel markankirinakax janiw kunatix askïki uk lurapkiti,

ukat uñisirinakapax jupanakarux arknaqani.

4“Nayar jan yäqasaw reyinak utt'ayasipxi,

jilïrinakapsti nayar jan yatiyasaw chhijllasipxi.

Jupanakpachaw qullqipata, quripata

yaqha diosanak lurasisax

jan walt'añanakaru, tukjatäñanakar purisipki.

5-6¡Samaria, uka vaca qallur yupaychatamax axtasiyituwa!

Phiñasiñaxasti uka diosatakiw sarti.

Israelitanaka, ¿kunapacharak wasitat q'umäxapxätasti?

Samariankir uka vaca qallux janiw chiqpach Diosäkiti,

jaqin luratakiwa,

ukat jichhax t'unjatarakïni.

7Jupanakax thaysa yapuchapkaspa ukhamawa,

jach'a tutukanaksa apthapipkaspa ukhamawa;

janiw kuna yapunakapas yawthapiñatakix utjkaniti,

janirakiw trigo puyanakat jak'ux apsutäkaniti;

apsupkan ukasa,

yaqha markankir jaqinakakiw manq'apxani.

8¡Israelasti jichhax manq'antatawa!

Yaqha markanakasti

jan kunatak askïkaspas ukham uñjapxi,

9jan amuyun uri asnökaspas

ukhamaw Asiria markarux yanap mayirix sarapxi.

Israelasti munirinakap alasiñatakix waxt'äwinak churi.

10Ukampis qawqha churäwinaksay

uka markanakar churaskpan,

naya kipkaw yaqha markanakar ananukü,

ukatsti mä qawqha pachanakax janiw reyinakasa,

kuna jilïrinakas utjkaniti.

11“Israelitanakax walja altaranak lurarasiraki,

uka altaranakasti jucha lurañatakikiwa.

12Nayax jupatak walja yatichäwinak qillqsurapkta ukasa,

ukanak jan yatiriw tuku.

13Jupanakatakisti wilañchanak luqtañaw askixa,

ukatsti, uka luqtat aychanak manq'apxaraki;

ukampis naya Tatitux janiw ukanakampix kusisitäkti,

kuna jan walinaktix lurapki ukanak amtaskakipunïwa,

uka juchanakapatsti,

Egipto markar kuttayasaw mutuyarakï.

14Israelita jaqinakasti reyin jach'a utanakap utachapxi,

ukampis jupanakar irnuqirit armasipxiwa.

Judá markax walja jach'a markanakwa

pirqanakampi muyuntayas sum sayt'ayi,

ukampis nayax ukanak ninampiw nakhantayä,

reyin jach'a utanakapas q'alaw nakhantani.”