1 1 (2) Diosaxay, qhispiyasikitaya,
umampi axskatirjamätwa;
2 2 (3) ñiq'i phuch'uruw jalantaskta,
janiw kawkhar takt'asiñas utjkiti.
Uma manqharuw purta,
uka walja umaw apxitu.
3 3 (4) Arnaqaskäwix q'ala chhajantatätwa,
mallq'as walipuniw usxitu;
¡Diosaxar uñch'ukkäwix
nayraxas juykhuptatäxiwa!
4 4 (5) Ina ch'usat uñisirinakaxax
ñik'utanakaxat sipansa juk'amp jilawa;
ina ch'usat nayar uñisipxitu,
jiwayañpun munapxitu;
jan lunthataskta ukanak kutiyañatakiw wayt'apxitu.
5 5 (6) Diosaxay,
jumaw jan amuyt'asirïtax uñt'ista;
janiw juchanakax jumat imt'kiristti.
6 6 (7) Taqi ch'aman Dios Tatay,
¡jumar iyawsirinakax
janikiy juchax laykux p'inqa tukupxpati!
Israel markan Diosapa,
¡jumar thaqhirinakax
janikiy juchax laykux aynacht'añar puripxpati!
7 7 (8) Juma laykuw jisk'achat uñjasta;
p'inqatsa ajanuxax ninapuniw nakhi;
8 8 (9) jilanakaxatakix yaqha markankir
jan uñt'at jaqjamätwa.
9 9 (10) Utamar munañax ninjamaw nakhitu;
jumar tuqirinakan arunakapax,
nayxarkamaw wakt'itu.
10 10 (11) Llakisiñat jan manq'kta ukkhaxa,
nayat larusipxitu;
11 11 (12) llaki isimp uchasta ukapachasti,
nayat taqinipuniw sawkasipxitu.
12 12 (13) Taqi jaqin parlasitaw sarnaqta,
machatanakas nayxat jayllipxi.
13 13 (14) Tatay, nayasti jumaruw art'asinsma.
Diosaxay, ¡jichhax yanapt'akitaya!
Jach'a munasiñam laykux ¡ist'akitaya!
Yanapt'asir kankañam laykuy qhispiyita.
14 14 (15) ¡Janikiy nayan ñiq'ir jalantañax munamti!
¡Nayar uñisirinakat qhispiyakitaya,
walja uma manqhanakat wayst'asikitaya!
15 15 (16) ¡Janikiy ch'aman umax apitpati!
¡Janikiy mik'ay chinkänax manq'antitpati,
janirak nayxarus jist'antaspati!
16 16 (17) Tatay, ist'akitaya;
¡jumax suma jaqïtawa, khuyapayirirakïtawa!
Jach'a munasiñanïtam laykux, uñjt'akitaya;
17 17 (18) ¡janikiy aka uywatamatakix ajanum imantasimti!
¡Jan walinpun uñjasta, jank'akiy jaysita!
18 18 (19) Nayaruy jak'achasinim, qhispiyarakitaya;
¡nayampi timasirinakat jark'aqita!
19 19 (20) Jumaw llakinkatax uñjaskistaxa,
jumaw p'inqa tukutaxsa, jisk'achatsa uñjistaxa;
jumaw uñisirinakaxarux uñt'araktaxa.
20 20 (21) Jaqin tuqitanakapax chuymaxaruw t'unanti;
jan ch'amanipuniw uñjasta.
Inamayakiw nayar khuyapt'ayiri,
nayar chuymacht'iri thaqta.
21 21 (22) Manq'axarusti jiwayañ qulla warantapxi,
umat pharjayaskta ukkhasti, vinagre churapxitu.
22 22 (23) ¡Jach'a manq'äwinakapasti,
jupanakatakix sipitapar tukpan!
23 23 (24) ¡Juykhu tukupxpan,
kayunakapas aliqapun khathatpan!
24 24 (25) Q'apisiñam jupanakxar samarasim;
aqkir q'apisiñamax jupanakar katjpan.
25 25 (26) Utjäwinakapax ch'usa wasarar tukpan,
janirak khitis chhujllanakapan jakpati;
26 26 (27) jupanakax juman usuchjat jaqiruw arknaqapxi;
juman chhuxriñchat jaqiruw sawkxayapxi.
27 27 (28) Ñanqhat ñanqha jupanakar kutt'ayam;
janipun khuyapayasiñam jikxatapxpati.
28 28 (29) ¡Jakañ qillqat taypit sutip apsum!
¡Janipun aski jaqinakampi chik qillqantamti!
29 29 (30) Naya usuntata, llakit jaqirusti,
Diosaxay, waytakitaya, qhispiyarakita.
30 30 (31) Q'uchunakampiw Diosan sutiparux jach'añchä;
yuspagarasaw juparux yupaychä,
31 31 (32) Tatitusti ukampix juk'ampi kusisini,
mä toro wilañcha luqtäwit sipana,
waxranakani, sillunakani vaca qallu luqtäwit sipana.
32 32 (33) Uk uñjasax llakitanakax kusisipxaniwa,
Diosar thaqhirinakan chuymanakapasti ch'amañchasiniwa;
33 33 (34) Tatitux jan kunan jaqinakarux ist'iwa,
jupankir katuntat jaqinakarux janiw jisk'achkiti.
34 34 (35) ¡Diosar jach'añchapxam,
alaxpachas akapachasa,
lamar qutasa, taqi ukan jakirinakasa!
35-36 35-36 (36-37) Diosaw Jerusalén markarux qhispiyani,
Judá uraqinkir markanak wasitat sayt'ayani.
Uywatanakapan wawanakapaw
uka marka katuqasxapxani;
uka markan jakapxani;
¡sutipar munirinakaw ukan jakasxapxani!
Who We AreWhat We EelieveWhat We Do
2025 by iamachristian.org,Inc All rights reserved.
