1David reyix jach'a utapan suma utt'asxäna, Tatitusti jupar uñisirinakapat jark'aqasin sumankañ jakañ churxatayna, ukapachasti,
2Davidax Natán profetaruw akham säna:
—Amuyam, nayax cedro lawat lurat mä suma jach'a utan utjasta, Tatitun arcapasti cortinanak manqhanak jikxatasi —sasa.
3Natán profetasti ukxaruw sarakïna:
—Chuymaman amtataparjam luraskakim, Tatitux jumampïskiwa —sasa.
4Ukampisa, uka arumpachaw Tatitux Natán profetar parläna, akham sarakïna:
5“Saram, David luqtirixar yatiyanim, naya Tatitun arsutaxa: ‘Janiw jumat nayatakix mä uta utacharapkitäta, ukan jakañaxataki.
6Israelitanakar Egipto markat irpsunkta uka urut jichhakamax, janipuniw nayax templonakan utjaskti, jan ukasti mä jan yäqkay chhujllanakpun utjastxa.
7Taqi uka maranak jupanakamp sarnaqasasti, janipuniw nayax jupanakat khiti jilïr irpirinakaparusa, Israel markaxar apnaqañapatak utt'aykta ukanakarux maykti, cedro lawat mä uta nayatak utachañapataki.’
8Ukhamasti, David luqtirixarux saskakim, naya, taqi ch'aman Tatituw jupar sista: ‘Nayaw jumarux uywa awatkirit irpsunsma, oveja taman qhipap sarañatsa irpaqaraksma, Israel markaxan jilïripäñamataki;
9kawkirutix jumax sarkta ukansa, juma chikaw nayax sarta, jumar katuntir uñisirinakamarus taqiniruw tukjta, ukatsti jach'aruw aptaraksma, kamisatix aka uraqin utjir jach'a jilïri jaqinakax jach'ar aptatäpki ukhama.
10Ukhamarus Israel markaxatakix mä chiqawja wakicharakta, ukaruw jupanakar uchta pachpa uraqipan jakasipxañapataki, jan khitis kun jupanakar saskañapataki, janiraki jan wali jaqinakas t'aqhisiyaskañapataki, kunjämtix qalltan lurapkän ukhama,
11kunapachatix nayax Israel markaxar apnaqañapatak jilïrinak utt'aykäyäta ukapacha. Nayaw taqi uñisirinakamat qhispiyat uñjasiyäma. Yatiyaraksmawa, walja wawanakamaw utjani,
12ukatsti jakañamax tukusxani, ukat jiwxarakïta ukapachasti, nayaw mayni wawamar markaxan reyipäñapatak utt'ayä.
13Jupaw nayatakix mä uta utacharapitani, nayasti marka apnaqäwip wiñayatakipuniw utt'ayarakï.
14Nayaw jupan awkipäyä, jupasti nayan wawaxäniwa. Jupatix kuna jan walsa lurkani ukapachasti, juparux jawq'antäwa, kamisatix awkix wawapar jawq'antki ukhama,
15ukampis khuyapayasiñaxax janiw jupat apaqatäkaniti, kunjämtix Saúl reyit apaqaskäyät ukhama, juparusti nayaw apaqxarakta, jupa lanti jumar utt'ayxañataki.
16Ukhamarusa, nayaw wawanakaman marka apnaqäwip ch'amaniptayä, reyi qunuñamasti wiñayatak utt'atapunirakïniwa’ ” sasa.
17Natán profetasti taqi akanak Davidarux yatiyäna, kunjämtix uñjkatayna, ist'karakitayna ukhampacha.
18Ukat David reyix Tatitump parlir jupan nayraqatapar mantawayäna, juparusti sänwa: “Dios Tatitu, ¿khitirakït nayasti, kuna askirak wila masinakaxasa, akakam nayar puriyaniñamatakisti?
19¡Dios Tatay, taqi ukanakax jumatak juk'akïkaspa ukham aka luqtirimarux wawanakaxan apnaqäwipax akat qhipar kunjamäkanitix uka tuqinakat qhanañcharaktaxa! ¡Dios Tatay, ukhamaw juman amtäwimax taqi jaqitaki!
20¿Kunat juk'ampirak sirisma? Tatituxay, jumaw aka luqtirimar sum uñt'taxa.
21Taqi aka muspharkañanaksti jumaw arsutamarjama, munatamarjam nayan uñt'añaxatak lurtaxa.
22¡Kunja jach'ätas jumax Tatituxay! Nanak pachpaw yatiqapxta, janiw khitis jumjamax utjkiti, janiw yaqha diosas jumat sipan utjkiti.
23¡Janirakiw Israel markamjamas yaqha markax aka uraqin utjkiti! Jumaw Tatay, juman markamäñatak qhispiytaxa, ukatsti wali aytat markaruw tukuyaraktaxa, jach'a muspharkañ luräwinak jupanakatak lurasa. Egiptot qhispiyanit markam nayraqatatsti jumaw yaqha markanakarusa, diosanakaparus jaqunuktaxa.
24Jumaw amtarakta Israelan wiñayatak juman markamäñapataki, jumasti Tatit Diosapäñamatakiraki.
25“Ukhamasti, Dios Tatay, luqtirimataki, wawanakapatak arsutanakam wiñayatak amxäsikimaya, uka arsutam phuqhapunimaya.
26¡Sutimax jach'ar aptatapunïpan, ukatsti sapxarakpan, taqi ch'aman Tatitux Israelan Diosapawa! sasa. ¡David luqtiriman wawanakapasti, juman yanapamampix wiñayatakipun sayt'aspan!
27Taqi ch'aman Tatituxay, jumaw wawanakaxan marka apnaqañap tuqit nayar yatiyista; ukat nayax juman luqtirimäkasinsa, aka mayisïwimpi achikt'assma.
28Jumätaw Tatitu Diosaxa, arsutanakamax chiqpachawa, aka luqtirimarusti ukkha suma munasiñampiw arsuraktaxa;
29luqtiriman wawanakaparux askinakampi phuqt'akimaya, juman khuyapayasiñaman wiñayas sarnaqapxañapataki. Jumaw Tatitu Diosay arstaxa, aski waxt'äwinakamampisti luqtiriman wawanakapax wiñayatakipunïniwa” sasa.
Who We AreWhat We EelieveWhat We Do
2025 by iamachristian.org,Inc All rights reserved.
