DANIEL 1 - Qullan Arunaka DC

I. NAYRÏR JALJA(1—6)Qallta

1Kunapachatix Joacín reyix Judá uraqi kimsa mara apnaqaskäna, ukapachaw Babiloniankir Nabucodonosor reyix Jerusalén markar purinisin ejercitopamp muyuntäna.

2Tatituw Joacín reyirux Nabucodonosor reyimp katuntayäna, kuna yänakatix Tatitun utapan utjkäna ukanaksa Nabucodonosor reyiruw katuyarakïna. Nabucodonosor reyisti Babilonia markaruw jaqinak katuntat apasxäna, Tatitun utapat apsuta qullan yänaksa diosanakapan yänakapamp chik uskurakïna;

3ukhamarusa, jach'a utapan luqtirinakan Aspenaz sata jilïriparux sänwa, reyin wila masipa taypinkir israelitanakata, ukatsti kawkïrinakatix aytat wila masinakat jilïrïki uka israelitanak taypit irpsuniñapataki,

4wali suma uñnaqt'ani waynanaka, jan kunansa kamacht'ata, ch'ikhinaka, suma yatichatanaka, taqi kunsa yatirinaka, reyin jach'a utapan luqtañatakis wakicht'atanaka. Jupanakar caldeonakan arupampi, qillqatanakapamp yatichayañataki.

5Ukhamarusa Nabucodonosor reyix uka waynanakar sapüru jupan pachpa manq'añanakapa, vinonakapa churapxañapatakiw arsüna, ukhamaraki kimsa mara yatichapxañapataki, uka qhipat jupar luqtiritak qhiparxapxañapataki.

Danielampi, jilat masinakapampix reyin utapankapxiwa

6Reyin utapar irpat waynanak taypinsti, Daniel, Ananías, Misael, Azarías sutini pusi waynaw ukankäna, jupanakax Judá ayllunkirïpxänwa.

7Reyin utapan luqtirinakan jilïripax jupanakarux yaqha suti uchäna: Danielarux, Beltsasar; Ananiasarux, Sadrac; Misaelarux Mesac; Azariasarusti, Abed-nego suti ucharakïna.

8Danielasti chuymapan amtasirakïna jan uka reyin manq'apampisa, vinopampisa q'añuchasiskaña, jupatakix uka manq'a manq'añax juchänwa. Ukat Aspenaz chachar achikt'asïna, juparusa, masinakaparus jan wayt'añapataki, uka manq'ampi jan q'añuchasiskañataki.

9Tatituw luräna Aspenaz chachan Daniel waynar sum uñjañapataki.

10Ukampis sarakïnwa:

—Nayax reyixar axsartwa. Kuntix jumanakax manq'apxañamäki, umapxañamäkaraki uk nayar mayitu, reyitix jumanakar uñkatasin, mayni waynanakat sipan t'ukha jikxatapxiristam ukapachax, nayan jiwañaxatakiw juchañchitaspa —sasa.

11Ukhamasti, Danielax reyi uta apnaqirimpiw parläna, juparuw jilïr jaqix Daniel, Ananías, Misael, Azarías uka waynanakar uñjañapatak katuyatayna, juparusti sarakïnwa:

12—Nayax achikt'assmawa, aka luqtirinakamar tunka uru yant'añama: Uka urunakasti ch'uxña alinakaki manq'añatak nanakar churapxitpan, umt'añatakisti umak churapxitpan.

13Tunka uru qhipatsti, kawkïri waynanakatix reyin manq'apa, reyin vinopsa umapki ukanakamp irpthapisin ajanunakax uñkatapxitäta. Ukatsti jumaw nanakarux kunjämarus uñjasipkitäta —sasa.

14Ukatsti reyi uta apnaqirix: “Walikiw” sänwa, ukatsti uka waynanakampi tunka uruw yant'äna.

15Tunka uru qhipatsti, uka waynanakan uñnaqapax reyin manq'añapata, reyin vinopat umapkänsa uka waynanakat sipan juk'amp k'umara, ch'amanirakiw jikxatasïna.

16Ukhamawa reyi uta apnaqirix, uka pusi waynanakan manq'apxañapäkäna, umapxañapäkäna uk apasiskäna, jupanakarux ch'uxña alinakampi, umampik manq'añatakix churarakïna.

17Tatitusti aka pusi waynanakarux ch'ikhi chuyma, amuyt'a chuyma churäna, kunayman qillqatanak amuyt'apxañapataki, ukhamarak taqi yatiñanaksa. Ukhamarusa, Danielax samkanaka, unañchäwinak qhanañchañ yatirakïna.

18Kunürutix reyin arsuta urux phuqhaskäna ukürusti, Aspenaz chachax uka waynanakar Nabucodonosor reyin nayraqataparuw irpäna.

19Reyisti taqpach waynanakampiw parläna, taqpachanit janiw maynirusa Daniel, Ananías, Misael, Azarías waynanakjam wali ch'ikhi jikxatkänti, ukhamïpan jupanakax reyir luqtañatak qhiparxapxäna.

20Kuna luräwinakatix wali amuyt'ampi lurañ wakiskäna ukanakatakisti, reyix uka waynanakaruw jiskt'äna, reyitakisti uka waynanakaw wali ch'ikhïpxänxa, markapan utjir tunka yatiñani jaqinakat sipansa.

21Ukhamaw Danielax Babilonia markan qhiparxäna, Ciro reyin mä mara uka marka apnaqkäna ukkhakama.