LEVÍTICO 26 - Qullan Arunaka DC

Ist'asir jaqinakatak aski waxt'äwinak utjatapa(Dt 7.12-24; 28.1-14)

1“Janipun yaqha diosanak lurasipxamti; janirak ukanakarus yupaychapxamti. Nayätwa jumanakan Tatit Diosamaxa.

2Nayan qullan utaxsti sumpun yäqapxam, sábado urusti samarapxarakim. Nayätwa Tatit Diosaxa.

3“Jumanakatix nayan kamachinakaxarjam sarnaqapxäta, arunakaxsa phuqhapxarakïta ukasti,

4nayax jallunakxa pachaparuw apayanipxäma, uraqisa, quqanakasa suma achunak churapxani;

5trigosti jumanakatakix uvanak apthapiñkamaw utjani, uvanakas yapuchañ urukamaw utjarakini; sist'asiñkamaw t'ant'sa manq'apxäta, markamansti wali sumanarak utjasipxäta.

6Jumanakarux uka uraqin samarañ churapxäma, ukatsti jan kuna llakinikiw ikt'apxäta, nayaw jumanakan markamat monte animalanaksa, nuwasiñanakatsa jark'askä.

7Jumanakasti uñisirinakamarux jaltayapxätawa, espadampi jiwarayataw jumanak nayraqatan uñjasipxani;

8jumanakat phisqanikiw patakanir chhuktayañatak munasini, jumanakat patakanisti tunka waranqa uñisirinakaruw chhuktayapxani; uka uñisirinakamasti jumanak nayraqatan jiwarapxani.

9Jumanakarusti sum uñjapxäma, waljaniruw tukuyapxarakïma; jumanakampi arust'äwi lurataxsti phuqhapunïwa.

10Nayra mara imasit trigo manq'asipxäta, jichha mara apthapit trigo imañatakisti, nayra mara imat trigo apanukxañamaw wakisini.

11“Nayaw jumanak taypin jakä, janirakiw jumanakarux apanukupkämati;

12jumanak taypinpun sarnaqasï, nayax jumanakan Diosamäyäwa, jumanakasti nayan markaxäpxätawa.

13Nayätwa jumanakan Tatit Diosamaxa, nayaw jumanakarux Egiptot irpsunipxsma ukan jan juk'amp t'aqhisiyat sarnaqasipkañamataki; kuna t'aqhisiñatix jumanakxankkäna uksa nayaw apaqapxsma, ukatsti p'iqis waytat sarnaqayapxsma.

Jan ist'asirinakatak mutuyäwi utjatapa(Dt 28.15-68)

14“Ukampis jumanakatix nayar jan ist'apkitäta, kamachi arunakaxsa janirak phuqhapkätati,

15jan ukasti, nayan kamachinakaxsa, arsutanakaxsa jisk'achapxarakïta, ukhamat nayan jumanakampi arust'asitaxsa jan phuqhapkätati ukapachasti,

16nayax jumanakampix akanak lurarakï: axsarañanaka, jiwayir usunaka, junt'u usunaka, nayra usunaka, janchin aynacht'añanaka, taqi uka usunak apayanï; inamayaw yapuchasipkäta, uka yapuchasitanakamsti uñisirinakamaw manq'antapxani.

17Nayasti jumanakar jan walt'ayañatakiw sayt'ä, uñisirinakamas atipjapxätamwa; khitinakatix jumanakar wal uñisipktam ukanakampi t'unjataw uñjasipxäta, jan khitin arktataw jaltxapxarakïta.

18“Taqi akanak katuqasas janipun nayar jaysapkitäta ukapachasti, nayax jumanakarux paqallqu kutimpiw juchanakamat t'aqhisiyapxäma.

19Jumanakarux q'al jisk'achjapxäma, jallsa janirakiw jumanakxarux apayankxäti, alaxpachax hierror uñtataw tukuni, aka uraqisti cobrer uñtataw tukurakini.

20Inamayakiw ch'amsa tukusipkäta, uraqisti jumanakatakix janiw kuns achuykxaniti, janirakiw quqanakas achunakap churapkätamti.

21“Jumanakatix nayar janipun ist'apkitäta ukasti, nayax jumanakarux paqallqu kutimp jucha luratanakamat mutuyapxäma.

22Jumanakxarusti qullunkir qhuru animalanak antutanï, ukanakasti wawanakamsa, uywanakamsa q'al manq'antapxani, ukat jilt'irinakasti juk'akïxapxaniwa, thakhinakamas ch'usa wasarar tukutäniwa.

23“Taqi ukanak katuqkasinsa, janipun nayar jaysapkitäta ukasti,

24nayax jumanakar jan walt'ayañatakiw sartä, ukatsti jucha luratanakamatxa paqallqu ukkhamp mutuyapxäma.

25Jumanakxarux mä nuwasiñ jutayä, ukaw juchanakam uñt'asiyapxätam nayan arust'äwi arunakax p'akintapxatamata, jumanakasti markanakamar imantasiriw jaltxapxäta; ukampis nayax usunak apayanipxäma, jumanakasti uñisiriman amparaparuw jalt'apxarakïta.

26“Kunapachatix jumanakan trigo yapunakam q'al tukjkä ukapachasti, tunka warminakaw mä sapa hornon jumanakatak t'ant'a qhatiyapxani, ukatsti jisk'a jisk'a lakinuqapxätam, qawqsa uka t'ant'xa manq'asipkätawa, ukampis janiw sist'asipkätati.

27“Taqi ukanak katuqkasinsa janipun nayar ist'apkitäta, jan ukasti nayatak sayt'asisipkakïta ukasti,

28nayax jumanakar jan walt'ayañatakiw sartä, ukatsti jucha luratanakamatxa paqallqu ukkhamp mutuyapxäma.

29Ukapachaw jumanakax imill wawanakamsa, yuqall wawanakamsa manq'arasxapxäta.

30Nayaw jumanakan yaqha diosanakar yupaychañ altaranakam t'unthapï, incienso luqtañ altaranakamsa payaruw jaljtayä, jumanakan jiwat janchinakamsti diosanakam patxaruw liwxatä, ukatsti nayan jumanakar axtasitax uñacht'ayapxarakïma,

31jumanakan markanakama, yaqha diosanakar yupaychañ utanakamsa t'unjarakïwa; kuntix jumanakax nayar luqtanipkitäta ukanakan q'aphinakapsa janiw katuqapkämati.

32“Jumanakan markanakamsti q'al t'unjä, uñisirinakamatix ukar jakir jutapxani ukkhasti, ukham t'unjat uñjasax wal musphasipxani.

33Jumanakarux markanak taypiruw ananukupxäma, espadampi jiwayañatakiw arknaqapxäma; uraqimasti ch'usa wasarar tukutaw uñjasini, markanakamas axsarkañ q'ala t'unjataw uñjasini.

34Ukhamasti uraqix ch'usa wasarar tukuta uñjasitäñapkamax samaraniwa, ukkañkamasti jumanakax uñisirinakaman markapan jakapxäta, uka uraqix nayrax janiw samarkataynati ukat jichhax samarani.

35Kunapachkamatix uka uraqix ch'usa wasar uñjasini ukapachkamaw uka uraqix samarani, jumanakax uka uraqin jakkasax janiw samarayapkäyätati.

36“Khitinakatix jumanakat uka uñisirin uraqipan jakasipkakini ukanakarusti, walpun axsarayä, mä quqa laphin jalaqtatapatsa khathatipxätawa; mä jaqis jumanakarux espada ayt'at arknaqkaspa ukham jaltxapxäta, ukatsti jan khitin arknaqkataw liwirtapxäta;

37nuwasiñatsa jaltxapkasma ukhamaw jan khitin arknaqat jumanakkam liwirtapxäta; ¡jumanakatsti janipuniw khitis uñisirinakapar saykatirjamäkaniti!

38Jumanakax yaqha markanak taypin jiwarayataw uñjasipxäta; uñisirinakaman jiwarayataw uñjasipxäta;

39khitinakatix uñisirinakaman uraqipan qhiparapkani ukanakasti, juchanakap laykuw jiwarapxani, ¡awkinakamamp chikaw jupanakan jucha lurapxatapat jiwarapxäta!

40“Jumanakax jucha luratanakamsa, awkinakaman jucha luratanakapsa, nayar saykatasisin jan taqi chuymampi arkapxatamsa uñt'asisipkam,

41nayasti jumanakar jan walt'ayañatakiw uñisirinakaman markapar apayapxäma; ukan Diosar jan uñt'ir amuyumax jisk'achat uñjasini, juchanakamatsa mutuyatäpxarakïtawa.

42Ukapachaw nayax kuna arust'äwtix Jacobumpi, Isaacampi, Abrahamampi lurkäyät ukanakat amtasï, uraqitsa amtasirakïwa,

43kawkïr uraqtix jumanakax jaytaniwayapkäta ukkañkamasti uka uraqix samart'aniwa; ukampis jumanakax juchanakamat t'aqhisipxäta, nayan arsutanakaxampi, kamachinakaxampi jisk'achapxatam layku.

44“Ukhamäkipansa, jumanakax uñisiriman markapan jakapkäta ukasa, janiw nayax jumanakarux apanukupkämati, jisk'achapkämasa; t'unjapkarakïmasa, janirakiw kuna amtäwirutix nayra awkinakamamp lurkäyät ukanakatsa armt'askäti, nayan jumanakan Tatit Diosamätax layku.

45Jan ukasti, kuna arust'äwtix jupanakampi lurkäyätxa, kunapachatix taqi markanakan uñjkaya, jupanakan Diosapäñatak Egiptot jupanakar irpsunkta ukapachaxa, taqi ukanakat amtasipunïwa. Nayätwa Tatit Diosaxa.”

46Akanakawa kamachinakaxa, arsüwinakasa, yatichäwinakasa, kuntix Tatitux Moisés tuqi Sinaí qullu patan churkäna ukanakaxa, uka kamachinakasti Tatitumpi, israelitanakampi luratänwa.