ÉXODO 40 - Qullan Arunaka DC

Tatitump Jikisiñ Carpa luqtäwi

1Tatitux Moisesaruw parläna, akham sasa:

2“Nayrïr phaxsita qallta uru saraqataruw Tatitumpi Jikisiñ Carpa sayt'ayäta.

3Uka manqhirusti arust'äwi lurat arca uchäta, ukatsti cortinampiw jist'aqarakïta.

4Manqhïxarux mesampi, candelerompi ucharakïta. Mesxar uchañäki uka yänak suma askicht'äta, ukatsti lamparanak candeleror ucharakïta.

5Ukatsti, incienso q'aphichañatak quri altar uchäta, arust'äwi lurat arca uñkatasiru, ukatsti qullan chiqawja mantañar cortina uchäta.

6Ukxarusti wilañchanak nakt'ayas luqtañ altarxa, Carpar mantañäkis uka uñkatasiruw uchäta.

7Ukatsti ampar jariqasiñ lamanxa, Jikisiñ Carpampïki, luqtañ altarampïki uka chika taypiruw uchäta, ukatsti ukarux umampiw phuqhantäta.

8Ukatxa carpa anqäxa muyuntayañap sayt'ayäta, ukatsti carpa anqäxapan mantañaparux cortinampiw uchäta.

9“Ukxarusti luqtañ aceite aptasin uka carpar ch'allsüta, kunanakatix uka manqhankki taqi uka yänakampiru. Ukhamat taqi yänakapamppachar luqtäta, uka chiqasti qullanäniwa.

10Nakt'at wilañchanak luqtañ altarxarux luqtañ aceitempiw ch'allsurakïta, taqi yänakapamppacharu. Ukhamat suma luqtata, qullanansa qullana altaräñapataki.

11Ukatsti, uma uchañ lamanampiru, qunt'añapampiruw aceitemp warxatarakïta, ukhamat ukar qullanañchäta.

12“Ukxarusti Aaronampiru, wawanakapampiruw Tatitumpi Jikisiñ Carpa punku jak'ar irpäta, ukatsti jupanakarux jariqasiyätawa.

13Aaronasti sacerdote isimpi uchaspan. Ukatsti aceitempiw jupar warxatäta, ukhamat nayan luqtirixatak yaqhachäta.

14Ukxarusti wawanakaparuw jawsäta, túnica isinakampiw jupanakar isthapiyäta,

15ukatsti aceitempiw jupanakar warxatarakïta, kunjämtix Aarón awkipar warxatktas ukhama, ukat nayan sacerdotexar tukupxani. Aceitempi jupanakxar warxatatasti, wawanakapan wawanakapatak wiñayatak sacerdotëpxañapatakiwa.”

16Moisesax taqi kun luräna kunjämtix Tatitux jupar siskatayna ukhamarjama.

17Ukhamaw Egipto markat mistunxatata, payïr mara qalltana, qallta phaxsita nayrïr uru saraqatar Tatitumpi Jikisiñ Carpax sayt'ayatäxäna.

18Moisesax qullan chiqawja sayt'ayäna, nayraqatax sayir lawanakan takxäsirinakap uchäna, ukxarusti tablanaka, patxar ayxatañ lawanak uchäna, lawanak sayarayäna,

19qullan chiqawjarux carpa janatatäna, ukatsti patxarux janxatañampiw utachxatarakïna kunjämtix Tatitux siskatayna ukhamarjama.

20-21Ukatsti Moisesax kamachi arunakan qillqat tablanakxa, arust'äwi lurat arca manqharuw uchäna; ukxarusti kallañ muruq'u lawanak arcar uchäna, uka patxarusti arcan qhuphiñap ucharakïna, ukatsti qullan chiqawja manqharuw uk apäna; ukat cortina warkt'äna arca imt'arakïna, kunjämtix Tatitux Moisesar siskatayna ukhamarjama.

22Ukxarusti mesa ucharakïna Tatitumpi Jikisiña Carpa manqharu, qullan chiqawjat amsta tuqiru, velo cortinat anqäxaru.

23Uka patxarusti, t'ant'anak sum ucht'äna, Tatitun nayraqatapana, kunjämtix Tatitux siskatayna ukhamarjama.

24Ukxarusti candelero ucharakïna, Tatitumpi Jikisiñ Carpa manqharu, mesa uñkatasiru, qullan chiqawjat aynach tuqiru,

25ukatsti lamparanak qhantayäna Tatitun nayraqatapana, kunjämtix Tatitux Moisesar siskatayna ukhamarjama.

26Qurit lurat altarsti Tatitumpi Jikisiñ Carpa manqhiruw uchäna, cortina nayräxaru,

27uka altarxarusti Moisesax suma q'apkir incienso nakt'ayäna, kunjämtix Tatitux siskatayna ukhamarjama.

28Ukxarusti Moisesax carpa punku mantañatak cortina warkt'äna;

29ukatsti nakt'ayat wilañchanak luqtañ altar ucharakïna Tatitumpi Jikisiñ Carpa mantañ punku nayraqataru, uka altarxarusti uywanaka, grano achu waxt'anaka nakt'ayäna, kunjämtix Tatitux siskatayna ukhamarjama.

30Ukxarusti lamanxa, Tatitumpi Jikisiñ Carpäki ukata, wilañcha luqtañ altaräki uka taypiruw uchäna, ukarusti uma phuqhantarakïna, ampar jariqasiñataki.

31Uka lamanat uma apsusin Moisesampi, Aaronampi, wawanakapampix jariqasipxäna amparanakapsa, kayunakapsa.

32Jupanakasti Tatitumpi Jikisiñ Carpar mantañatakiw jariqasipxäna, altarar jak'achasiñatakis jariqasipxarakïnwa; kunjämtix Tatitux Moisesar siskatayna ukhamarjama.

33Tukuyañatakisti, Moisesax utänqa sayt'ayäna, qullan chiqawjampiru, altarampir cortinanakamp muyuntayasa; anqäx punku mantañarusti cortina ucharakïna.

Mä qinayaw Tatitump Jikisiñ Carpa patxanki(Nm 9.15-23)

Moisesax luräwinakap tukt'ayxäna ukkhasti,

34mä qinayaw Tatitumpi Jikisiñ Carpa patxar urpxatäna, ukatsti Tatitun jach'a kankañapaw qullan chiqawja phuqhantarakïna.

35Moisesasti tantachasiñ chiqawjar janiw mantirjamäkänti, qinayan uka patxar urpxatatap layku, Tatitun jach'a kankañapan qullan chiqawjar phuqhantatap laykuraki.

36Ukhamasti sapa kuti uka qinayax carpa patxat sartkän ukapachaw israelitanakax carpanakap apthapisiwayasin thakhip sarasipkakïna,

37ukampis qinayatix jan sartkänxa, janirakiw jupanakax carpanakap apthapisipkänti, jan ukasti, qinayan sartañapkamaw suyt'apxäna.

38Israelitanakan taqi saräwipansti, jupanakan uñjkataw Tatitun qinayapax uru tuqirux Tatitumpi Jikisiñ Carpa patxankäna, arum tuqirusti mä ninaw uka patxankarakïna.