JUECES 20 - Qullan Arunaka DC

Israelitanakax Guibeá markan levitan uñt'atapar jiwayapxatapat sayt'asipxi

1Ukhamasti israelitanakax taqpachaniw Dan, Beerseba, Galaad chiqankirinakax mayar tukt'asin Tatit nayraqatan tantacht'asipxäna.

2Israel markan ayllunakapan jilïrinakapax taqiniw ukankapxäna, Diosan markapax pusi pataka waranqa soldadonakaw tantacht'asïna.

3Benjamín ayllunkirinakax maynïr israelitanakan Mispá markan tantacht'asipxatap yatipxäna. Israelitanakasti levitarux kunjämatsa uñt'atapax jiwatayna uk jiskt'apxäna.

4Jiwat warmin levita chachapasti sänwa:

—Nayax uñt'ataxampiw Benjamín ayllunkir Guibeá markapar purta, ukana uka arumax ikt'awayañataki.

5Ukampis uka arumpachaw markankir jaqinakax, qurpachatäpkta uka utar muyuntapxitu, nayar jiwayañataki, ukatsti uñt'ataxaruw jan wali lurasin jiwayapxi.

6Nayasti jiwat janchip jisk'a jisk'a kharinuqasinxa, Israel markpacharuw apayta, ukhamat israelitanakan uka axtkañ luräwit yatipxañapataki.

7Jichhasti jumanakaruw amuyt'añax wakt'apxtam, israelitanakjamax kamsapxätasa, kun lurañasa wakisispa —sasa.

8Israelitanakasti mä sapa chachäkaspas ukhamaw taqin sayt'asipxäna, ukatsti sapxarakïnwa:

—Jiwasanakat janiw maynis utasarux kutt'kañäniti.

9Jichhasti suertenak jaqtañäni, ukat khititix Guibeá markampi nuwasiri sarkani uk yatiñäni.

10Israelan taqpach ayllunakapata, sapa tunka chachanakat mayniw ejercitotaki manq'añ thaqhapxani; mayninakasti Guibeá markankirinakar tukjiriw sarañäni, uka axtkañ luräwi Israel marka taypin lurapxatapata.

11Israelitanakasti Guibeá markar katuntañatakix taqpachaniw mayacht'asipxäna.

12Ukatsti Benjamín ayllun uraqinakaparux yatiyirinak khithapxäna, jupanakar akham sapxañapataki: “¿Kunatsa jumanakat mä yaqhipanakax ukham jan walinak lurasin jiwayapxta?

13Jank'aki Guibeá markankki uka jan wali jaqinakar katuyapxita, nanakan jupanakar jiwarayañataki, ukhamat Israel markax uka jan wali luratat q'umachatäñapataki” sasa.

Ukampis Benjamín ayllunkirinakax janiw Israelita jilanakaparux yäqapkänti,

14jan ukasti, taqi markanakapat benjaminitanakax Guibeá chiqan tantacht'asipxäna, maynïr israelitanakampi nuwasiñataki.

15Benjamín ayllunkir markanakapatxa, pä tunka suxtan waranqa soldadonakaw wakicht'asipxäna, Guibeá markankirinakat paqallq patak ajllita jaqinakax janiw jakhutäkänti.

16Taqi uka jaqinak taypinsti, ch'iqa amparampi q'urawt'iri paqallq pataka jaqinakaw utjäna, jupanakax mä ñik'utarus jan pantjas qalampi q'urawt'irinakänwa.

17Mä tuqitsti, maynïr israelitanakax pusi patak waranqa nuwasirinakaruw tantacht'apxäna.

Israelitanakax Benjamín ayllunkirimpiw nuwasiñankapxi

18Israelitanakasti Betel markaruw sarapxäna, ukawjan Diosarux jiskt'asipxäna, kawkïr ayllusa Benjamín ayllunkirinakar nayraqat katuntaspa uk yatiñataki. Tatitusti Judá ayllunkiri nayraqat sarañapa yatiyäna.

19Ukhamasti israelitanakax willjtat sartasipxäna, ukatsti Guibeá marka uñkatasiruw utjnuqtapxäna.

20Benjamín ayllunkirinakamp nuwasiñatakisti, Guibeá marka uñkatasin wakicht'asipxäna.

21Benjamín ayllunkirinakasti markat mistunipxäna, uka urusti pä tunka payan waranqa israelitanak jiwarayapxäna.

22-24Ukat israelitanakax Betel markaru kuttapxäna, Tatitun nayraqatapan arumkamaw jachapxarakïna, ukan jupar jiskt'apxäna, akham sasa: “Nanakan Diosaxay, ¿Benjamín ayllunkir jilanakaxarux wasitat katuntapxiristti?” sasa.

Tatitusti sänwa: “Jïsa, sarasipkakim” sasa.

Ukhamasti israelitanakax Tatitun arsutaparjamaw ch'amañchasipxäna, ukatsti wasitat nuwasiñatakiw wakicht'asipxäna, kawkhantix nayrïr urux nuwasipkatayna ukawjan nuwasiñataki.

25Ukampis Benjamín ayllunkirinakax, wasitatampi Guibeá markat mistusin, kimsaqallq waranqa israelita soldadonak jiwarayapxäna.

26Ukhamasti Israelan taqpach soldadonakapampi, taqpach markampix Belenaruw wasitat sarapxäna, Tatit nayraqatan jachiri. Uka urux jan manq'ataw Tatiturux sumankthapiñ nakt'at waxt'äwinakampi, wilañchanakampi luqtapxäna.

27-28Khä urunakansti Diosan arust'äwi arcapax Betel markankaskänwa, sacerdotepasti Finees sat Eleazar chachan yuqapänwa, Aaronan allchhiparaki. Israelitanakasti Tatituruw jiskt'apxäna: “¿Benjamín ayllunkir jilanakaxar katuntañax wakisispati, jan ukax atipjatäxapxakïcha?” sasa. Tatitusti sänwa: “Katuntir sarasipkakim, qharüruw jupanakar atipt'ayapxäma” sasa.

29Ukhamasti yaqhip israelita soldadonakax Guibeá marka thiyanakaruw imantasipxäna,

30ukchañkamasti mayninakax uka kimsïr urun Benjamín ayllunkirinakamp nuwasiriw sarantasipkäna, ukatsti payïr kutinjam Guibeá marka nayraqatar nuwasiñatak siqicht'asipxäna.

31Benjamín ayllunkirinakasti wasitatampiw markat mistunipxäna, israelitanakampi nuwasiñataki, jupanakasti Betel, Guibeá markanakar sarki uka thakhinakana, ukhamaraki pampanak tuqinakansa, kimsa tunka israelitanak jiwarayapxäna,

32Benjamín ayllunkirinakax israelitanakan nayrïr pä kutinjam jupanakat jaltxatap amuyapxäna. Ukampis israelitanakax janiw jaltapkänti, jan ukasti, uñisirinakan jupanakar arktapxañapatakiw markat jayarst'asipkäna.

33Akatjamat israelitanakax kawkhankapkäntix ukkhat mistunipxäna Baal-tamar chiqan nuwasiñataki; mä tuqitsti, khitinakatix Guibeá marka thiya pampanakan imantasitäpkän ukanakaxa, mistunisin

34markar katuntapxäna. Tunka waranqa suma nuwasir israelitanakaw Guibeá marka katuntapxäna. Uka nuwasiñansti q'al tukjasipxäna, Benjamín ayllunkirinakasti janiw niya aynacht'atäpxatanakap amuyasipkänti.

35Tatituw israelitanakarux Benjamín ayllunkirinakar atipt'ayäna, ukürusti israelitanakax pä tunka phisqan waranqa patakan jaqinak Benjamín ayllunkirinakarux jiwarayapxäna.

36Ukapachaw Benjamín ayllunkirinakax atipjatäxäpxatap amuyasipxäna.

Israelitanakasti Benjamín ayllunkirinakan jupanakar nuwantatapatsti, qhiparuw kuttapxäna, jupanakan Guibeá marka thiyanakan imantasitäpkän uka jaqinakan atipjañap suyapxatap layku.

37Uka jaqinakasti akatjamat Guibeá markarux katuntapxäna, espadampkamaw taqi uka markankirinakar jiwarayapxäna.

38Markar katuntañatak imantasitäpkän ukanakasti, mayni israelitanakampiw mä amtäwir mantapxatayna, kunapachatix marka katuntapkani ukapachax mä jach'a nina jiwq'i tuqi yatiyañataki.

39Ukatsti jaltapkaspa ukhama tukur israelitanakax nina jiwq'ir uñjasin, Benjamín ayllunkirinakampi nuwasir kuttanipxañapataki.

Benjaminitanakasti niya kimsa tunka israelitanak jiwarayapxäna, jupanakax nayrïr nuwasïwinjam atipjapkaspa ukham amuyapxäna;

40ukampis ukapachaw jiwq'ix marka taypit mistunïna, benjaminitanakasti qhipa tuqir uñtasinxa, markata jiwq'impi nina lawranakampi alaxpachkam makhatiri uñjapxäna.

41Ukat israelitanakax jupanakar saykatapxäna, benjaminitanakasti jan walt'añankatap amuyasisin axsarthapipxänwa.

42Jupanakax israelitanakan nayraqatapat wasar thakhinjamaw jaltxapxäna, ukampis janiw jaltirjamäpkänti, markat mistsunirinakaw jark'antasin jiwarayapxäna.

43Benjaminitanakax israelitanakampi muyuntataw uñjasipxäna, israelitanakasti arktasin q'al tukjapxäna, Menuhá chiqata Guibeá markat inti jalsu tuqikama.

44Benjamín ayllunkirinakat tunka kimsaqallqun waranqa soldadonakaw jiwarapxäna.

45Maynïrinakasti kuttanisin wasar tuqiruw jaltxapxäna, Rimón chiqan utjiri qala jankhara tuqiru, ukampis jupanakat phisqa waranqa jaqinakaw thakhin jiwarayata uñjasïna. Israelitanakasti arktasipkakïnwa, ukatsti pä waranqa jaqinak jiwarayapxäna.

46Uka urusti, Benjamín ayllunkirinakat taqpachax pä tunka phisqan waranqa suma nuwasir soldadonakaw jiwarapxäna.

47Ukampis suxta patak benjaminitanakaw kuttanisin wasar tuqir jaltxapxäna, ukatsti pusi phaxsiw Rimón chiqankir qala jankharan qhiparapxäna.

48Israelitanakasti uka qhipat maynïr benjaminitanakaruw katuntapxarakïna, cuchillompkamaw sapa markankir jaqinakarux jiwarayapxäna, uywanaksa, sarkasin jikxatapki ukanaksa taqi jiwarayapxäna, markanaksa ninampiw phichhantapxarakïna.