1Ukatsti Salomonax sänwa:
“Tatay, jumax ch'amakanakan
jakta sistawa.
2Ukampis nayax mä uta
jumatakix lurarapsma,
ukan wiñay utjasiñamataki” sasa.
3Ukatsti reyix israelita jaqinak tuqir uñakipstasinxa, jupanakaruw jach'añchäna,
4sarakïnwa: “Israelan Tatitu Diosapax qullanäpan, jupax David awkixar arskäna ukampix phuqhiwa, juparusti sänwa:
5‘Kuna urutix markaxaru Egipto markat irpsunkta ukat jichhakamax janiw Israelan ayllunakapat yaqha markar ajlliskti, ukan nayan utaxax luratäñapataki, sutixas ukankañapataki, janirakiw khiti chacharus Israel markaxaru irpañapatakix ajlliskti,
6ukampis nayax Jerusalén markaruw ajllista ukan jakasiñaxataki, Israel markaxar apnaqañapatakisti Davidaruw ajllisirakta’ sasa.
7David awkixax mä uta lurayañ munäna, Israelan Tatitu Diosaparu jach'añchañataki.
8Ukampis Tatitux juparux sänwa: ‘Jumax nayatak mä uta lurañ walik amtasktaxa;
9ukampis janiw jumax lurkätati, jan ukasti kawkïr wawamatix utjkätam ukaw nayatakix mä uta lurarapitani’ sasa.
10“Ukhamasti Tatitux arsutaparux phuqhiwa. Jupan arsutaparjamax nayaw David awkix lanti Israelan qunuñapar qunt'asta, ukatsti Israelan Diosapatakix mä uta lurarakta.
11Ukhamarus ukaruw Tatitumpi, israelitanakampi arust'äwir mantat arca ucharakta” sasa.
12Ukatsti Salomonax Tatitun altarap nayraqatana, israelitanakan nayraqatapan sayt'asisax amparanakap luqtäna.
13Jupasti broncet lurat tarima patxankänwa, ukasti sayt'urux pä metro pä tunka phisqani centimetronïnwa, iramarusti mä ukkharaki, amstarux mä metro kimsa tunka phisqani centimetronïnwa, uksti chika chika uta anqaruw uchayäna. Ukatsti jupax taqi israelita jaqinak nayraqatan killt'asïna, amparanakapa alaxpach tuqiru luqtasin
14jach'at säna: “Israelan Tatit Diosapa, janiw jumjamax alaxpachansa, akapachansa utjkiti, jumax arsutamarux phuqtawa, jumar taqi chuymampi luqtirirux khuyapt'ayastawa;
15David awkixar arsutamampix phuqtawa, ukhamaw jichhürux luratampi, arsutampix phuqhasi.
16Ukhamasti, Israelan Tatit Diosapay, kuntix juman luqtirima David awkixaru arskta ukampix phuqhamaya: jupat saraqir wawanakapat Israel reyin qunuñapar makhatirix khuyapayasiñam layku utjañapapuni, jupanakatix sum sarnaqapxani, kamachinakapsa phuqhapxarakini ukkhaxa” sasa.
17Ukhamasti Israelan Tatit Diosapay, David luqtirimar arsut arunakam phuqhaskakimaya.
18“Ukampisa, ¿chiqapuniti Diosasti aka uraqin jaqinakamp chik jakaspasti? Alaxpachasa wali jach'äsin janiw katxäskiristamti, ¡ukatsa juk'ampiwa aka uta jumataki luraykta ukax jumar jan katxäskiristamti!
19Ukampisa, Dios Tatay, nayan art'asitaxaru, achikt'asitaxarus ist'itaya, aka luqtiriman mayisitaparus jaysakimaya.
20Urus arumas jan maysa uñtasay aka uta uñjarakim, jumaw uka chiqan jakasiñataki ajllistaxa, aka luqtiriman mayisitap ist'akimaya.
21Nayan aka uta tuqir uñtat mayisitaxsa, Israel markaman mayisitapsa, alaxpachatpach ist'apxakitaya, juchanakaxsa pampachapxakitaya.
22“Kunapachatix maynix masipar jan wali lurkani, ukatsti munkir jan munkir Tatitun utapan utjki uka altar nayraqatan jupar juramento lurayapkani ukkhaxa,
23jumax alaxpachatpachay ist'anim, ukatsti luqtirinakamar taripasay chiqapar uñjam. Juchanirusti ñanqha luratapatjam mutuyam, jan juchanirusti chiqapar uñjam, wakiski ukarjama.
24“Kunapachatix uñisirix Israel markamaru jucha luratapat atipjani, ukatsti jumar kutikipstasin sutimar yupaychätam, aka utamansa art'asirakïtam ukkhaxa,
25jumax alaxpachatpach ist'am, juchanakapsa pampacham, ukatsti jupanakarux nayra awkinakamar churkta uka uraqir kuttayanxarakim.
26“Kunapachatix waña maräni, jallus janirak purkaniti markaman juma nayraqatan jucha luratap layku, ukat jupanakatix aka chiqan mayisipxani, sutimsa jach'achapxani, ukat juman mutuyäwim layku juchanakapat kutikipstanxapxani ukkhaxa,
27jumax alaxpachatpach ist'am, ukatsti Israel markaman juchanakap pampacham, aski thakhinjam sarapxañapatak yaticharakim. Ukatsti markamar juman churata tuti uraqirux jallsa purxatayarakim.
28“Kunapachatix aka uraqin mach'asa, usunakas utjani, alinakas lupimpi wañsxani, alinakar tukjir yaqha usunakasa, t'iju t'ijunakasa, pulgón sat jisk'a laq'unakas utjani; kunapachatix uñisiris markanakaxar katuntañatak muyuntani, yaqha jan walt'añanakasa, usunakasa jutkani ukkhaxa,
29-30jumax taqi jaqinakana, Israel markpachan mayisitapa, achikt'asitap ist'am, uka jan walt'añapa, t'aqhisitap uñjasatix amparanakapsa utam tuqir luqtasa mayisipxätam ukkhaxa, jumax alaxpachan kawkhanktatix ukkhatpach ist'am, juchanakapsa pampacham; ukatsti sapa maynirus luratapatjam churarakim, jumakiw jaqin amtatanakapsa, chuymapsa uñt'taxa.
31Ukhamat jumarux jach'ar aptapxätam, nayra awkinakaxar churkta uka uraqin jakañanakapkamax jaysapxarakïtamwa.
32“Yaqha markankir mä jaqisa, jan markamankir jaqis juman jach'a sutima, jach'a ch'amam layku jutani, ukat aka qullan utaman mayisini ukkhaxa,
33jumax alaxpachan kawkhanktatix ukkhatpach ist'am, ukatsti kuntix maykätam uk churam, ukhamat aka uraqin taqi markanakax Israel markamjam jumar uñt'apxañapataki, jach'achapxañapataki, ukatsti sutimax utaman yupaychatätap amuyapxani.
34“Markamatix uñisirinakapampi nuwasir sarani, jumax kawkharutix khitkäta ukkharu, ukat ajlliskta uka markam tuqi, jumatak nayax luraykta uka utam tuqi uñtata mayiskätam ukkhaxa,
35jumasti mayisitapsa, achikt'asitapsa alaxpachatpach ist'am, ukatsti juparux arxatarakim.
36“Kunapachatix jumatak juchachasipxani, janis maynisa jan jucha lurir utjkchi ukasa, ukat jumax jupanakatak phiñasisax uñisirir katuyäta, ukat jupanakax jaya markarusa, jan ukax jak'a markarus irpatäkani ukkhaxa,
37uka jaya markar apanukutäsatix jumar kutt'anisin achikt'asipxätam, ukhamarak jucha luratapatsa, jan wali luratanakapsa uñt'asipxani,
38ukat taqi chuymapampi, taqpach amtañapampitix kutikipstapxätam, kawkha uraqintix katuntat uñjasipki ukkhana, ukatsti nayra awkinakapar churata uraqi tuqir uñtanisa, jumatak nayax luraykta uka utar uñtanisatix mayipxätam ukkhaxa,
39jumax alaxpachatpach mayisitanakap ist'am, kawkhantix jumax utjkta ukkhatpach jupanakarux arxatam, markaman jucha luratanakapsa pampacharakim.
40“Dios Tatay, aka chiqan mayisitanakar ist'apxita.
41“Dios Tatay,
jumampi arust'äwiru mantata ch'aman arcamampi sartasim,
kawkharutix samarkäta ukkharux jutarakim.
Dios Tatay,
sacerdotenakamas qhispiyasiñ arunakam yatiyapxpan,
jumar arkirinakamas askinakaman kusisipxpan,
42Dios Tatay, ajlliskta uka reyirux jan apanukumti.
David luqtirimar munatam laykux amtasikimaya” sasa.
Who We AreWhat We EelieveWhat We Do
2025 by iamachristian.org,Inc All rights reserved.
