NÚMEROS 34 - Qullan Arunaka DC

Canaán uraqin qurpanakapa

1Tatitux Moisesaruw säna:

2“Israelitanakar parlam jupanakarusti sarakim: Jumanakax Canaán uraqir mantañampïpxtawa. Aka uraqinakaw jumanakankani, qurpanakapasti akanakäniwa:

3“Aynach tuqirux Sin wasarampi, Edom uraqimpi qurpäniwa. Inti jalsu tuqit sartasinsti, Mar Muerto quta aynachat qurpax qalltani,

4ukatsti aynach tuqirux Acrabim sat amsta chiqakamaw sarani, Sin chiqanjam sarakipani, ukatsti Cadés-barnea chiqakamaw purini. Ukatsti Hasar-adar chiqatxa, Asmón chiqakamaw sarani,

5Asmón chiqatsti Egiptompi qurpaski uka jisk'a jawirkamaw sararakini, ukatsti Mediterráneo jach'a qutaruw tukuyani.

6“Inti jalanta tuqirusti, Mediterráneo jach'a qutampi qurpäniwa.

7“Amsta tuqi qurpax, Mediterráneo jach'a qutat Hor sat qullukamaw sarani,

8Hor qullutsti Hamat uraqin mantañapkama, ukawjatsti Sedad chiqakama.

9Sedad chiqatsti, Zifrón sat chiqakamaw sarani, ukatsti Hasar-enán chiqaruw tukuyani, ukäniw amsta tuqinkir qurpaxa.

10“Inti jalsu tuqitakix, qurpax Hasar-enán chiqat qalltasina Sefam chiqakamaw sarani,

11ukawjat Riblá sat chiqakamaw sarani, ukasti Ain sat inti jalsu tuqinkiwa; uka chiqatsti qurpax Quinéret qutat inti jalsu tuqinjam sarani,

12ukatsti Jordán jawiranjam sararakini, Mar Muerto qutakama.

“Jumanakan uraqiman qurpanakapax ukanakäniwa.”

Uraqinak lakinuqasiñxata

13Moisesax israelitanakar sarakïnwa:

—Aka uraqinak jumanakax suertetkam lakintasipxäta; Tatituw uka uraqinak churasiñapatak arsüna, llätunk chikatani qhiparir ayllunakaru.

14-15Rubén ayllunkirinakampi, Gad ayllunkirinakampi, Manasesan ayllupankir chikat jaqinakampix, wakt'ki uka uraqip katuqasxapxiwa, Jordán jawirat inti jalsu tuqiru, Jericó marka uñkatasina —sasa.

16Tatitusti Moisesar sarakïnwa:

17“Jumanak taypin uraqinak lakintapkani ukanakax, Eleazar sacerdotempi, Nun chachan Josué yuqapampiwa.

18Uraq lakintañatakisti, sapa ayllutkam mä jilïriparuw jumanakar yanapt'ir jawsapxäta.

19Jawsapxañamäki uka chachanakan sutinakapax akanakawa:

“Judá ayllutxa: Caleb sat Jefuné chachan yuqapa.

20“Simeón ayllutxa: Samuel, Amihud chachan yuqapa.

21“Benjamín ayllutxa: Elidad sat Quislón chachan yuqapa.

22“Dan ayllutxa: Buquí jilïri, Joglí chachan yuqapa.

23“Manasesan ayllunakapatxa: Haniel, Efod chachan yuqapa.

24Efraín ayllutxa: Quemuel sat Siftán chachan yuqapa.

25“Zabulón ayllutxa: Elisafán sat Parnac chachan yuqapa.

26“Isacar ayllutxa: Palatiel sat Azán chachan yuqapa.

27“Aser ayllutxa: Ahihud sat Selomí chachan yuqapa.

28“Neftalí ayllutxa: Pedahel sat Amiud chachan yuqapa.”

29Tatitux uka chachanakaruw Canaán uraqi israelitanakar lakintapxañapatak jaytäna.