NAHÚM 3 - Qullan Arunaka DC

1¡Jaqi jiwayir Nínive marka, kunakïkan jumatxa,

k'arisiñampi, nuwasiñampi phuqhantatätawa;

jan tukuskir lunthatasiñampi phuqhantata!

2¡Chicoten jawq'asitapa,

ruedanakan chhulluqitapa!

¡Caballonakan jalnaqatapa,

carronakan jalatapa!

3¡Caballerian sartatapa!

¡Espadanakan llijtatapa,

lanzanakan llijutapa!

¡Usuchjatanakax waranqanaka,

jaqi jiwaratanakas jan jakt'kayaraki!

¡Uka jiwatanakar lanktasaw jaqinakax liwisipxi!

4Asiria marka, taqi ukanakasti yaqha markanakar sallqjatamat lurasiski,

uka markanakasti juman diosanakamaru, layqasiñanakamaruw munapayapxäna,

ukat jan walinak lurañatak jumampix sumar mantapxäna.

5Taqi ch'aman Tatitux siwa:

“Akanktwa jumar saykatañataki;

isimxa ajanumkamaw lluch'täma,

ukhamat markanakan jumar q'alal uñjañapataki,

marka apnaqäwinakasa p'inqam uñjapxañapataki.

6Jumarusti q'añunakampiw warxatäma;

taqi jaqinsa uñtkañaw p'inqachjat uñjasïta.

7Jumar uñjirinakasti

jumat jaltxapxaniwa, akham sasa:

‘¡Nínive markax t'unjatawa!

¿Khitirak khuyapt'ayasispasti?

¿Kawkinarak utjaspa jupar chuymachiristi?’

8¿Jumasti Tebas markat sipan juk'ampi sumätati?,

kawkïri markatix Nilo jawir jak'ankki

walja umanakamp muyuntata,

jawiran muyuntayata umanakampi pirqaniraki.

9Etiopía, Egipto markanakax jupan jan tukuskir ch'amapänwa;

Fut, Libia markanakasti jupan yanapirinakapänwa.

10Ukampis Tebas markankirinakax yaqha markar apayatänwa;

wawanakapas marka thakhinakan

uraqirkam jisktas jiwarayatänwa;

jach'a aytat jilïrinakaparusti suertet jaqtasarakiw

yaqha markanakar ñach'antat apayapxäna.

11Jumasti Asiria marka, machat jaqjamaw uksar aksar liwinaqtarakïta;

uñisirinakamat imantasiñ munäta,

ukampis janiw imantasiñ jikxatkätati.

12Markaman pirqanakapasti;

kunjämatix puqt'at higo achux,

khitin unxtayatas uraqirkam willirtixa,

ukatsti jaqiw manq'antaraki,

ukhamaw uka pirqanakax liwirtani.

13Ninaw jach'a punkunakam nakhanti,

uñisirinakamasti mantañampïskiwa;

ukham uñjasin soldadonakamax llaythasipxi.

14Uñisirinakamar saykatañatak

walja uma imasiskäta ukasa;

janiw kunatakis askïkaniti.

Pirqanakam jach'aptayañatak

walja ñiq'i tikanak luraskäta ukasa,

15ninamp nakhantataw jiwäta,

nuwasiñan tukjataw uñjasïta;

uñisirinakamax t'iju t'ijunakjamaw jumar tukjätam.

Jach'a ch'aman walja soldadonakamas inamayäskaniwa.

16Alakip lurir jaqinakamaxa,

warawaranakat sipansa juk'amp waljaniwa.

17Marka apnaqirinakamax, t'iju t'ijunakar uñtatäpxiwa;

soldadonak apnaqirinakax laq'u tamanakar uñtatawa:

thayäki ukkhax pirqa patanakaruw junt'urt'asiñatak puripxi,

inti lupt'anipansti sarawayxapxiwa,

janiw kawkir saratapas yatiskiti.

18“¡Asiria markankir rey,

awatirinakamax ikiraskiwa!

Jilïrinakamas samarasipkiwa,

jaqinakamasti qullunakan ananukutaw sarnaqasipki,

janirakiw khitis jupanakar anthapirix utjkiti.

19¡Usuchjasitamatakisti janiw qullax utjkiti,

chhuxrimasti jan qullkayawa!

Aynacht'atam ist'irinakax

kusisiñat amparanakap t'axllisipxi,

jumax walja markanakaruw ñanqhanak lurtaxa.”