DEUTERONOMIO 15 - Qullan Arunaka DC

Manunakat pampachasiñ mara

1Moisesasti saskakïnwa: “Sapa paqallqu marat manumäkani ukarux pampachäta.

2“Uka pampachañasti akhamäniwa: Khiti jaqitix israelita masipar kunsa mayt'kani, mayt'ki ukxa janiw mayiskxaniti. Janiw jaqi masiparusa, marka masiparus kuttayxit sasax wayt'añapäkiti, uka marax, Diosar jach'añchasin manunakat pampachasiñ marätap layku.

3Markaman jakki, yaqha markat jutir jaqirusti kuntix mayt'kta ukxa mayisxätawa, ukampis kuntix israelita jilamax mayt'asktam ukxa pampachätawa.

4Ukhamat jumanak taypin pist'añan jakasir jaqinakax jan utjkaniti, Tatit Diosamax churkätam uka uraqinxa, aski waxt'äwinakap churätam,

5jumanakatix jupan arunakap ist'apxäta, jichha urun iwxawayksma uka kamachi arunakarjam phuqhas sarnaqapxarakïta ukapacha.

6Tatit Diosamax arsuwayktam ukhamarjamaw aski waxt'äwinakap churätam, yaqha markanakar mayt'añatakis utjarakïtamwa, ukampis jumax janiw kunsa mayt'askätati. Walja markanak apnaqarakïta, jupanakasti janiw jumar apnaqapkätamti.

7“Jumanak taypintix pist'añan jakasir mayni jaqix utjani, Tatitux churkätam uka markanak taypinsa, janiw pist'añan jakasir masimatakix chuymam qalarayasïtati, janirakiw janiw sätasa uka masimar yanapt'añatakixa,

8jan ukasti, juparux khuyapt'ayätawa, ukatsti kuntix munki ukanak mayt'äta.

9Janirak chuymaman aka jan wali amtäwix utjkpanti: ‘Niyaw paqallqüri marax jak'äxi, manunakat pampachañ maraxa’ sasa, ukat jan wali ajanump pist'añan jikxatasir marka masimar uñkatxasma, janirak kunsa mayt'kxasmati; jupasti ukapachax Diosaruw jumar ñanqhachas mayisini, uka luratamasti jucharakïniwa.

10Jumax suma munasiñ chuymampipun yanapt'am, Tatit Diosamasti uka luratamat aski waxt'äwinak churätam taqi luräwinakamana.

11Aka uraqinxa pist'añan jakasir jaqinakax utjapuniniwa, ukat nayax jumar aka iwxa arunak chursma, pist'añan jakasir marka masimataki, t'aqhisiñan sarnaqirinakatak khuyapayasir chuymanïñamataki.Uywat jaqinakxat kamachinaka(Ex 21.1-11)

12“Hebreo marka masimatix chachäpansa, warmïpansa; uywatamäñapatak jumar aljasïtam ukaxa, jupasti suxta marakiw luqtätam; paqallqüri mararusti janiw uywatamäkxaniti, utamat khithanukxätawa.

13Ukampis khithanukxät ukkhaxa, janiw jan kunan khithanukütati,

14jan ukasti uywa tamanakamat uywanak churäta, walja trigompi, vinomp churarakïta. Kuntix Tatit Diosamax churktam ukanakat jupampiw jaljasïta.

15Janiw jumax Egipto markan t'aqhisiyat sarnaqatam armasïtati, Tatit Diosamaw qhispiyantam. Ukat nayax jumar aka iwxanak chursma.

16“Ukampis uywatamatix jumampiru, utamankirinakampir munatapata, juman jupar sum uywatamat jumat jan saraqañ munkätam ukasti,

17mä p'iyañ aytasaw uta punkumar saykatayasin jupan jinchup p'iysüta; ukhamat jupax wiñayatak uywatamar tukuni. Uka pachparak juman uywat warmimpix luräta.

18Jan jumax chuymaman mayjt'asimti uywatanakamar antutxasaxa. Jupanakan suxta mara jumar luqtatapaxa, mä irnaqir jaqir chikat qullqik churkasma ukhamakiwa, ukhamarusa, Tatit Diosamax taqi luräwinakaman aski waxt'äwinakap churätam.

Nayrïr wawachat urqu uywanak Diosar luqtañxata

19“Vacanakama, ovejanakamatix nayrïr qallup urqu wawachani ukanakxa, Tatit Diosamatakiw yaqhachäta.

“Janiw vacaman nayrïr wawachat qalluparux irnaqayätati, janirakiw ovejaman nayrïr qallupatsa t'awra yawirätati.

20Sapa maraw uka uywanak utamankirinakamamp chik manqäta, Tatit Diosaman nayraqatapana, jupax ajlliskani uka chiqana.

21Ukampisa uka nayrïr wawachat qallunakatix jan k'umaräkani, kayu wixchünisa, juykhünisa, janiw ukham uywanak Tatit Diosamatak wilañcha luqtätati.

22Kawkha markantix jakaskät uka markan uka uywanak manq'äta, uksti taqiniw manq'apxarakini, q'umachatäpxamsa, janisa, kamisatix gacelana, tarujan aychapax manq'atäki ukhama.

23Ukampis janiw uka uywanakan wilap manq'ätati, uraqiruw waranuküta, umäkaspas ukhama.