LEVÍTICO 19 - Qullan Arunaka DC

Q'uma kankañxata, chiqapar sarnaqañxat kamachinaka

1Tatitux Moisesar sarakïnwa:

2“Israelitanakarux akham sarakim:

“Jumanakasti qullanäpxam, naya Tatit Diosamax qullanätwa.

3“Sapa maynisa awkiparu taykaparu yäqas sarnaqpan.

“Nayan sábado urunakaxsa imapxarakim. Nayätwa jumanakan Tatit Diosamaxa.

4“Janipun yaqha diosanakarux yupaychapxamti, janirak kuna kasta metalanak umatatayasas diosanak lurasipxamti. Nayätwa jumanakan Tatit Diosamaxa.

5“Kunapachatix Tatitur sumankthapiñ wilañchanak luqtapkäta ukapachasti, kunjämtix Diosax siski ukhamarjamaw jupan katuqañapatak luqtapxäta.

6Luqtatäkani uka uywan aychapsti uka urpachaw manq'antatäxañapa, jan ukax qhipürusa; ukampisa kunatix kimsïri urutak jilt'kani ukasti nakhantayatäxañapawa.

7Uka luqtat aychatix kimsa urkama manq'atakïskani ukasti, uka wilañchax janiw askïkxaniti, Diosasti janirakiw uka luqtäwi katuqkaniti;

8khititix manq'kani ukasti juchap laykuw mutuyat uñjasini, markap taypitsa jaqunukutäniwa, kunatix Tatitur luqtatäki ukar jan yäqatap layku.

9“Kunapachatix trigo yapuman achunakap apthapkäta ukkhasti, janiw taqpach yawthapïtati, jalaqtki uka puyanaksa janirakiw pallthapisïtati.

10Uva yapumatsti janiw taqpach apthapïtati, willirtki uka uvanaksa janirakiw pallthapisïtati; ukanakax t'aqhin jakirinakatakiwa, ukhamarak jaya markat jutirinakataki. Nayätwa jumanakan Tatit Diosamaxa.

11“Jan lunthatasipxamti. Jan k'arisipxamsa, jumanakkamas janirak sallqjasipxamti.

12“K'ari arsüwinak nayan sutixar jan luramti, ukham lurasax Tatit Diosaman sutip ñanqhachtaxa. Nayätwa Tatituxa.

13“Jan jaqi masimarux ch'amampiki saykatamti, kunatix jupankki uksa janirak aparamti.

“Irnaqirin irnaqatapat qawqhatix churañäki uk janirak qhipürkam apxäsimti.

14“Uqar jaqitsti jan phiskasimti.

“Juykhun sarnaqañapäwjarusti janirak kuna jan walt'añanaksa liwisiñapatak uskumti. Tatit Diosamar axsartam. Nayätwa Tatituxa.

15“Kunapachatix mä jan walt'añ taripañas wakisini ukkhasti, kunatix chiqäki ukhamarjamapun luram; janirak pisi ch'amanirukisa, jan ukax qamirirukisa arxatamti. Juchañchañ wakisipanxa, kunatix chiqapäki ukhamarupun uñjam.

16“Jaqinak taypinsti janipun arunak apnaqas sarnaqamti.

“Jaqi jiwayañanakansa janirak chikachasimti. Nayätwa jumanakan Tatit Diosamaxa.

17“Jilamar uñisiñanakxa chuymamar jan imxäsimti.

“Kunapachatix jaqi masimar tuqinuqañax wakischi ukkhasti, tuqinuqam, janirak jupamp chikas juchar purimti.

18“Jaqi masimarux janipun kun luratas phuqsusimti, janirak jupa tuqi phiñasitamsa chuymamar imxäsimti. Jaqi masimarusti juma kipkarjam munasim. Nayätwa Tatituxa.

19“Nayan kamachinakaxsti phuqhapunim.

“Uywanakamsti janipun yaqha uywanakampix katusiyamti.

“Uraqimarus janipun yaqha jathanakamp ch'arqhuntasax yapuchamti.

“Janirak kunayman telanakat lurat isinakampis isisimti.

20“Yaqha chachampi jaqichasiñatak churatäki uka uywatarutix maynix warmisini, ukampis uka uywatax janïra antutatäki ukkhaxa, uka chachan jan wal luratapatxa, wakisiw qullqi churas phuqhañapa, ukampis janiw jiwayatäñatak juchañchatäpkaniti uywatax janïra antutatätap layku.

21Uka jaqisti Tatiturux mä urqu oveja jucha luratat churani mä wilañchäkaspas ukhama, uka ovejsti Tatitump Jikisiñ Carpa nayraqataruw irpani.

22Uka ovejsti wilañchat luqtasaw sacerdotex Tatitun juchat pampachañapatak mayini, ukatsti uka jaqin juchapax pampachatäxaniwa.

23“Kunapachatix jumanakax uka uraqiru puripxäta, ukatsti achunak churir quqanak yapuchapxarakïta ukapachasti, janiw uka achunak apaqapxätati, janirakiw manq'apxätasa kimsa mara phuqhasiñapkama.

24Pusi mara purinxipansti taqi uka achunakax mä phunchhäwi urun Tatitur luqtatäxani,

25phisqa mara purinxipan jumanakax uka achunak manq'xapxäta. Ukhamat uka quqax juk'ampi achunakanïni. Nayätwa jumanakan Tatit Diosamaxa.

26“Janipun kunsa wilanpach manq'apxamti.

“Janipun yatirïñ munapxamti, kunatix akat qhiparux luraskani ukanak yatiñarus janipun uskusipxamti.

27“Jan ñik'utanakam muypach mururasipxamti, janirak sunkhanakamsa taqpach mururasipxamti.

28“Mä jaqin jiwatapatxa, jan janchinakam q'allunuqasipxamti. Janipun kunayman qillqanaksa janchinakamar qillqantasipxamti. Nayätwa Tatituxa.

29“Phuchhamarus janipun chachanakampi sarnaqir tukuyamti, ukham lurasax phuchhamxarusa, markxarus ñanqha apanispa.

30“Sábado urunak imapxapunim. Nayan utaxatakisti wali axsartañax utjarakpan. Nayätwa Tatituxa.

31“Janipun layqanakan ukarusa, yatirinakan ukarus sarapxamti. Jupanakar jiskhisisax jan ñanqhachasipxamti. Nayätwa jumanakan Tatit Diosamaxa.

32“Kayut sayt'asisin chuyman jaqinakar mä suma yäqañampi uñjam. Tatit Diosamar axsartatamsa uñacht'ayarakim. Nayätwa Tatituxa.

33“Yaqha markat jutir jaqinakaru, khitinakatix jumanak taypin jakki ukanakarusti janipun t'aqhisiyapxamti.

34Jumanakat maynïrïkaspas ukham uñjapxam; jupanakarux jumanakjam jaqïtapat munasipxam. Ukhamarus jumanakax Egiptonxa, jaya markat jutir jaqinakjamäpxayätawa. Nayätwa jumanakan Tatit Diosamaxa.

35“Kuna tupt'añanakansa, janipun sallqjapxamti.

36Balanzanakamasa, taqi tupunakamas phuqhatäñapapuniwa. Nayätwa jumanakan Tatit Diosamaxa, khititix Egipto markat irpsunipktam ukaxa.

37“Ukhamasti taqi kamachinakax phuqhapxapunim. Nayätwa Tatituxa.”