LEVÍTICO 5 - Qullan Arunaka DC

Yaqha luqtanakampi juchanak pampachatäñataki

1“Kuntix maynix uñjki, jan ukax ist'ki uk qhanañchañapatak jawsatäni, ukat jan qhanañchañ munkani ukaxa, uka jaqix juch luri, uka jucha luratapatsti mutuñapawa.

2“Maynitix kuna q'añsa llamkt'ani, mä jiwat q'añu uywa, uywañ uywäpasa, jan ukax jan uywañ uywäpasa, jan ukax q'añu asirüpasa, ukham llamkt'atapampix q'añuchataw uñjasini, janisay amuyaskpan, ukampis juchañchatäniwa.

3“Maynitix jan amuyaskasin jaqin kuna q'añuchatapsa llamkt'anixa, uka qhipat amuyasxani ukapachax juchañchataw uñjasini.

4“Maynitix jan sum amuyt'askasin chiq lurañatakisa, jan ukax jan wal lurañatakis juramento luranixa, ukattix uka jan wali luratapat amuyasxani ukax juchañchatäniwa.

5“Khititix aka luräwinakat kawkïritsa juchañchat uñjasinixa, uka jucha luratap arsxañapawa,

6ukatsti jucha luratapat mä qachu oveja Tatitur wilañcha luqtani, jan ukax mä qachu cabräpasa, uka wilañcha luqtäwimpiw sacerdotex uka jaqin juchapat pampachatäñ jikxatani.

7“Janitix mä jisk'a oveja alañatak qullqix utjkani ukapachasti, Tatitun ukarux pä qhurukutu, jan ukax pä paloman chhiwchhipa uka jucha luratapat apani; ukanakat maysti jucha luräwit wilañcha luqtani, maynïrsti nakhantayatäñatakiw luqtarakini.

8Uksti sacerdoteruw katuyani, sacerdotesti juchat luqtäwïkisa uk nayraqatax luqtani, kunkat q'iwinukusa, p'iqipsti janiw apaqkaniti;

9ukatsti kawkïritix juchat luqtatäki ukan mä juk'a wilapampiw uka altar thiyar ch'allt'ani, jilt'äki uka wilsti altar kayuruw ch'umsuyxani jucha luräwit wilañcha luqtatätap layku.

10Payïrimpisti nakt'at waxt'a luqtxarakini, kunjämarutix satäki ukhamarjama; ukhamat jucha lurir jaqin juchanakapax pampachatäxani.

11“Ukat janipun qullqix utjarapkani pä qhurukutu, jan ukax pä paloman chhiwchhipa alt'asiñatakixa, uka jucha luratapat waxt'a luqtañatakix pä kilo wali suma jak'u apani. Uka jak'urusti janiw aceitempisa, inciensompis warxatañapäkiti jucha luratat mä waxt'a luqtatätap layku.

12Uka jak'usti sacerdoten ukaruw apatäni, sacerdotesti mä amtasïwïñapatakix mä jach'i jach'tasaw altarxan uk nakhantayani, Tatitur jach'achañatak maya waxt'anakamp chika. Ukasti jucha luratat luqtäwi waxt'awa,

13ukhamat sacerdoten uka jaqin juchanakap pampachatäñ jikxatañapataki, uka juchapasti pampachatäxaniwa. Uka waxt'at jilt'ir granonakasti, sacerdotetakïniwa.”

Jucha luratat wilañcha luqtäwinaka

14Tatitusti Moisesaruw akham säna:

15“Maynitix jan amuyaskasin juch lurani, Tatitur luqtat yänakat sallqjatapas uñstkani ukapachax, oveja tamapat jan kuna kamacht'at mä urqu oveja Tatitun ukar wilañcha luqtañatak apaniñapawa. Uka urqu ovejan alapasti qawqhäkitix qullan utjäwin qullqipax ukarjam chaniñcht'atäñapawa, kunjämatix jucha luräwit waxt'a luqtañax wakiski ukhamarjama.

16Ukatsti uka jaqix kunatix Tatitur luqtat qullana yänakat sallqjkäna ukanakat yapxatat phuqxañapawa. Chikatan chikatapäki uksti, sacerdoteruw katuyxañapa. Ukatsti kuna urqu ovejatix wilañchat luqtaski ukampix sacerdoten juchat pampachatäñ uka jaqitakix jikxatañapa, ukat juchanakapax pampachatäxani.

17“Maynitix jan amuyaskasin Tatitun kamachi arunakap p'akintani ukax juchañchatäniwa, jucha luratapatsti phuqxañapäniwa.

18Ukhamasti oveja tamanakapat mä jan kamacht'at urqu oveja apanini, uka ovejan alapsti jumaw qawqhänisa uk säta, ukatsti sacerdoten ukaruw uka jucha luratapat luqtañatak apatarakïni, ukhamat kuntix uka jaqix jan amuyaskasin jucha lurkatayna ukat pampachatäñataki.

19Uka wilañchasti jucha luratanakat luqtatawa, uka jaqin Tatit nayraqatan juchanïtap layku.”