1 CRÓNICAS 17 - Qullan Arunaka DC

Diosan Davidampi arust'äwir mantatapa(2 S 7.1-29)

1Kunapachatix Davidax reyi utapankxän ukkhaxa, Natán profetaruw säna:

—Uñjita, nayax cedro lawat lurat reyi utan utjasta, ukampis Tatitun arust'äwi arcapasti mä chhujllar uchatakiwa —sasa.

2Natán profetasti sänwa:

—Ukhamax kuntix amtkta uk luraskakim, Diosaw jumarux yanapaskätam —sasa.

3Ukampis uka arumpachaw Tatitux Natán profetarux säna:

4“Saram, ukatsti David luqtirixamp parlanim, naya, Tatituw sista: ‘Janiw jumäktati nayan jakasiñaxatak uta luririxa.

5Kunürutix nayax Israel markar Egiptot apsunkta ukkhat jichhakamax janiw nayax utanakan jakkti, jan ukasti ukkhan akkhan mä chhujllanak jakasta.

6Jupanakamp sarnaqkäyät ukkhasti, janipuniw jilïrinakamar maykti, kawkïr irpirinakarutix markaxar apaqañapatak uchkäyät jupanakarux cedro lawat mä uta lurarapit sasaxa.’

7Ukhamasti, David luqtirixarux akham yatiyam, naya taqi ch'aman Tatituw sista: ‘Nayaw jumarux oveja uyut irpsunsma, oveja taman qhipap sarnaqkirit katsma, ukhamat Israel markaxan irpiripäñamataki;

8kawkhantix jumax sarnaqkäyät ukkhanxa, nayaw jumampïskäyäta, uñisirinakamar tukjasa, jach'ar aptasa, kunjämatix aka uraqin aytat jaqinakax aptatäki ukhama.

9Ukhamarus Israel markaxatakix mä chiq wakichta, ukawjaruw utt'ayta uraqipan jakasiñapataki, jupanakarux jan khitis kun kamsañapataki, janiraki jan wali jaqinakas nayrjam t'aqhisiyañapataki,

10kunapachatix Israel markaxar irpirinak uchkäyät ukkhaxa. Nayaw uñisirinakamarux jisk'ar tukuyä. Ukatsti walja wawanakanïñam yatiyaraksma,

11kunapachatix jumax jiwxäta ukkhasti, nayax mayni jumat saraqir wawamaruw marka apnaqañapatak utt'ayä.

12Jupaw nayatakix mä uta lurayarapitani, marka apnaqañapsti wiñayatakiw sayt'ayä.

13Nayaw jupan awkipäyä, jupasti nayan wawaxäniwa. Nayan khuyapayasiñaxax janiw jupat jithiqtkaniti, kunjämatix jumat nayra marka apnaqirimpi lurkta ukhamxa,

14jan ukasti wiñayatakiw sayt'ayä utaxansa, markaxan apnaqäwipansa. Jupan qunuñapasti wiñayatak utt'ayatäniwa’ ” sasa.

15Natán profetasti Davidarux kuntix uñjkatayna, ist'karakitayna uk yatiyäna.

16Ukhamasti David reyix Tatitun nayraqataparuw parlañatak mantäna, ukatsti sänwa: “Dios Tatay, ¿khitirakït nayasti, kuna askirak wila masixasti nayar ukham uñjañamatakisti?

17¡Dios Tatay, jumatakix akax janiw kunäkisa, ukampis luqtiriman wawanakapan jutir urunakan marka apnaqañapatakiw arstaxa, nayarusti aytat jaqïkirista ukham uñjistaxa!

18¿Naya luqtirimar jach'ar aptatamatsti kamsarakirismasti? Jumax luqtirimarux sum uñt'taxa.

19Tatay, luqtirimar munasaw aka jach'a muspharkañanak lurtaxa, ukhamarak jupar uñacht'ayañataki.

20Tatay, janiw khitis jumjamax utjkiti, janirakiw yaqha diosax jumat juk'ampix utjkiti, kunjämatix nanakax ist'apkta ukhama.

21Israel markamjamasti, ¡janiw yaqha markax utjkiti, aka uraqinsti uka markakiwa! Jumax Tatay, markamäñapatakiw qhispiytaxa, ukatsti muspharkañanak lurasaw taqinimp uñt'ayastaxa. Egipto markat irpsunkta uka markaman nayraqatapat jumaw yaqha markanakar jaqunuktaxa, jumax markamarux Egipto markatsa kutsuyastawa, ukhamarak maynïr markanakatsa,

22Israel markar wiñay markamäñapatak katxarta uka layku, Tatay, jumarakiw markaman Diosapäyätaxa.

23“Ukhamasti Tatay, kuntix luqtirimaru, wawanakaparus arskta ukax wiñayatak phuqhaspan.

24¡Juman arsutamax phuqhasipunpan, sutimasti wiñayatak jach'añchatäpan, ukatsti Israel markan Tatitu Diosapax taqi ch'amaniw satarakïpan, chiqpachansa jupaw Israel markan Diosapaxa! ¡David luqtiriman wawanakapan marka apnaqañapax juman yanapamampix sum sayt'pan!

25Diosaxay, jumaw jutir wawanakaxan marka apnaqañap yatiyista; ukat nayax luqtirimäkasas jumar achikt'asïma.

26Jumaw Tatitu Diosätaxa, ukatsti luqtirimarux wali munasiñampiw arstaxa,

27jumaw naya luqtiriman wila masinakaxar jach'añchtaxa, juman yanapamampi wiñayatak sayt'añapataki. Juma Tatituw jach'ar tukuytaxa, ukatsti wiñayatak jach'añchatäniwa” sasa.