FILIPENSES QALLTA ARUNAKA - Qullan Arunaka DC
QALLTA ARUNAKAPablox Europa markan qallta iglesia utt'aykäna ukax, Filipos markankänwa, uka markasti Macedonia suyun jikxatasïna. Pablox carcelatpach suma munasiñ arunakampi qillqäna. Nayraqatax pist'añan jikxataskän ukapach yanapt'apxatapat Filipos markankir iyawsirinakar yuspagaräna. K'ari yatichirinakan uka iglesiar mantatapat wali llakt'ataw jikxatasïna, ukatsti Tatitur chiqa chuymampi, ch'amampi, iyawsañampi, arkapxañapatakiw iwxt'äna.Aka qillqatan qalltapatpach Pablox kusisiñapa, munasiñapa, yuspagarañ chuymap Filipos markankir iyawsirinakar uñacht'ayi (1.1-11). Pablox jupanak jak'ankkaspas ukham amuyasïna, ukat jan walt'añapat yatiyäna; ukampis janiw chuyma usuyaskänti, jan ukasti Cristompïskatapat ch'amampiw arsusïna, jiwañatakis jank'akïskatapat arsurakïna: “Nayatakix jakañax Cristowa, jiwañasti sumanak katuqañawa” sasa. (1.12-21). Ukatsti Filipos markankir iyawsirinakarux ch'amañchasiñapatakiw iwxäna, qhispiyasiñ arunakarjam jakapxañapataki, ukhamarak kunjäm chuymanïkäntix Cristox uka pachpa chuyma uñacht'ayapxañapataki (1.27—2.18). Ukatsti, kuna amtäwinakapatix Timoteo, Epafrodito yanapt'irinakapatak utjkän ukanak amtayarakïna (2.19-30).Qhiparusti, Pablox kusisiñap mayampis arsuskakïnwa, ukatsti kamachi phuqhir jaqïkasinxa, Tatit Criston chiqpach jakañ jikxatkän ukanakat jupax arsusïna. Jupan jakäwiparux atipt'irinakampi, jalirinakampiw uñtasiyäna (cap. 3).Tukuyañatakisti, iyawsirinakan kusisitäpxañapa, yaqha iwxanakampi, aruntanakampiw qillqatap tukt'ayäna (cap. 4).
