1Tatitusti Jeremías profetaruw markanakxat parläna.
2Egipto markatsti aka arunak säna, qhanpachanxa Egipton reyipa Necao sat faraonan ejercitopat säna. Uka ejercitosti Carquemis sata chiqan jikxatasïna, Éufrates sat jawir jak'ana. Uka ejercitorusti Nabucodonosor reyiw nuwantasin atipjatayna, kunapachatix Josías jaqin Joacín yuqapax pusi mara Judá marka apnaqkäna uka mara:
3“¡Jark'aqasiñanakam wakichasipxam!
¡Nuwasir sarantapxam!
4¡Caballonak karunt'apxam!
¡Caballonakar lat'xatapxam!
¡Casconakam asxatasipxam,
mä siqik uskt'asipxam!
¡Lanzanak ariptayapxam!
¡Qhawanakampi uchasipxarakim!
5“Ukampisa, ¿kunsa uñjtxa?
¡Egipcio soldadonakax qhiparuw jittapxi!
Atipjata, axsarañampi phuqhantata,
jan qhipar uñtasaw jaltxapxi.
¡Taqi chiqansa axsarañaw phuqhanti!
Naya, Tatituw uk arsta.
6¡Janiw wali jaltirinakasa jaltxañatakix ch'amanïpkiti,
janirakiw jan axsariri jaqinakas jaltxañatakix ch'amanïpkiti!
Amsta tuqina, Éufrates jawir jak'an lanktasisaw liwisipxi.
7¿Khitirak khayasti, Nilo jawirar uñtata makhataski,
walja umanakani jawiräkaspas ukhama?
8Egiptowa, Nilo jawirjam makhataski,
walja umanakani jawiräkaspas ukhama.
Egiptosti siwa: ‘Nayax wali jach'aruw tukü,
taqi aka uraqpach umampix chhaqtayä,
markanaksa q'al t'unjä,
jaqinaksti q'al jiwarayarakï’ sasa.
9“¡Caballeriax sarantpan!
¡Nuwasiñ carronakas sarantarakpan!
¡Soldadonakasti sarantapxpan;
Etiopía, Libia tuqinkir soldadonakasti
jark'aqasiñanakap apt'at sarantapxpan;
Lidiankir soldadonakasti,
mich'inak antutt'añanakap sum jiyantapxpan!
10Aka urusti taqi ch'aman Tatitun urupawa,
uñisirinakapat phuqsusiñ uruwa.
Espadasti sist'asiñkamaw chhuxriñchjani,
wilampis machjaskaspa ukhama.
Tatitusti amsta tuqina,
Éufrates jawira jak'an jaqinak jiwarayani.
11“¡Egipto marka,
Galaad uraqir qullanak thaqhir saram!
¡Ukampis qawqha qullampisay qullasiskam,
janiw ukanakax kunatakis askïkaniti,
qullasti janiw jumatakix utjkxiti!
12Markanakasti
atipjatätam niyaw yatxapxi,
ayquñat arnaqasitamax taqi chiqan ist'asi;
nuwasirinakasti jupanakkamaw thuqthapipxi,
ukatsti uraqirkamaw liwirtapxaraki.”
Nabucodonosor reyin Egiptor nuwantatapa13Kunapachatix Babiloniankir Nabucodonosor reyix Egiptor nuwantañatak jutkäna, ukapachaw Tatitux Jeremías profetar parläna:
14“Akasti Egipton yatiyatäñapawa,
Migdol, Menfis, Tafnes
uka markanakan yatiyatäñapawa:
¡Soldadonaka, nuwantasiñatak wakicht'asipxam!
¡T'unjirimax niyaw jutantaski!
15¿Kunatsa soldadonakamax q'ala liwirtata?
¿Kunatsa jan sayt'atakïpxi?
Naya, Tatituw jupanakarux liwinuktxa.
16Soldadonakamasti lanktasisin liwirtapxi,
maynit maynikamaw sasipxaraki:
‘¡Akat sarxañäni, markasar kuttxañäni,
yurïwi uraqisar sarxañäni!
¡Aka nuwasiñat jaltxañäni!’ sasa.
17“Egipton reyipa faraonarusti aka sutimpi apxatapxam:
‘Inamay parliriki, parlataparus jan phuqhiriraki’ sasa.
18Nayaw reyïtxa,
taqi ch'aman Tatitu satarakïtwa,
sutix laykuw juramentompi arsta:
Qullunak taypinkir Tabor qullur uñtata,
jach'a quta thiyankir Carmelo qullur uñtata,
ukhamaw uñisirimax jutantani.
19Egiptonkir jaqinaka,
jaya markar apatäñatak wakichasipxam,
Menfis markax ch'usa wasarar tukuyatäniwa,
jan khitinsa utjkaña tukjatarakïniwa.
20Egipto markan sumätapax q'ala tukjatäniwa,
Babilonia markaw amsta tuqit jutantasin nuwantani.
21Qullqi layku nuwasir soldadonakapasti,
lik'i vaca qallunakjamäpxiwa,
jupanakasti jalakamakiw mistuwayxapxani,
janirakiw sayt'asiñatakix ch'amanïpkaniti,
t'unjatäñap urusti puriniwa,
mutuyatäñ pachapas purinirakiwa.
22Egiptosti asirur uñtata khuyt'asisaw jaltxani,
uñisiripan wali ch'amampi jutantatapata,
hachanakampiw jupar nuwantañatak jutantapxi,
quqanakäpkaspas ukham phat'anukuñataki.
23¡Uka jach'a ch'uminakapsti phat'arpayapxaniwa!
Naya, Tatituw uk arsta.
T'iju t'ijunakjam waljanipunïpxänwa,
jan khitinsa jakt'kañjamaraki.
24Egiptox jisk'achjatäniwa,
Babilonian amparapar katuyatäniwa.”
25Israelan taqi ch'amani Tatitupasti sarakiwa: “Tebas chiqankir Amón sat diosaparux mutuyarakïwa, Egiptorusa, diosanakaparusa, reyinakaparusa, faraonarusa, khitinakatix jupar alkatasipki taqi ukanakarus mutuyarakïwa.
26Jupanakarusti Babiloniankir Nabucodonosor reyin amparaparu, jaqinakapan amparapampiruw jiwarayañapatak katuyarakï. Ukampis ukat qhiparuxa, Egipto markax wasitat jaqinakanïxaniwa, kunjämäkäntix nayrax ukhama. Naya, Tatituw uk arsta.
Tatitux markaparux qhispiyaniwa(Jer 30.10-11)27“Jacobun markapa, jan axsaramti;
Israel marka, jan axsaramti.
Jumampiru, wawanakamampirux
nayaw qhispiyapxäma,
apayatäpkta uka Babilonia markata.
Wasitat sumaki jakasxäta,
k'uchiki, jan khitinsa mulljataw jakasxarakïta.
28Naya, Tatituw uk arsta.
Jacobun markapa, nayan uywataxa,
jan axsaramti, nayaw jumampïskta.
Kawkhanakarutix ananuksma uka markanaksti nayaw q'ala t'unjarakï.
Ukampis jumarux janiw t'unjkämati;
luratamarjamaw chiqachäma,
ukatsti mutuyapunirakïmawa.”
Who We AreWhat We EelieveWhat We Do
2025 by iamachristian.org,Inc All rights reserved.
