ISAÍAS 53 - Qullan Arunaka DC

1Isaías profetasti siwa:

¡Janipuniw khitis yatiyäwinakasar ist'apkiti!

¡Janirakiw khitis Tatitun ch'amap uñjkiti!

2Tatituw jupan luqtiripan

mä machaq alir uñtat jilañap muni,

waña uraqirus saphintañap munaraki.

Janiw jupax jiwakïkänti,

janiw jach'äkarakïnsa,

uñnaqapasti janiw munañjamäkänti;

3taqiniw juparux jisk'achjapxäna, apanukupxarakïna.

Usuyasiñapampis wal t'aqhisïna,

ukham t'aqhisiñatakis wakicht'atarakïnwa.

Taqinis jupar ukham uñjañ janiw munapktanti;

jisk'achapxtanwa, janirakiw juparux yäqapktanti.

4Ukampis jupax jiwasan t'aqhisiñanakas q'ipt'atäskänwa,

jiwasan ayquñanakasan t'aqhisiskarakïna.

Tatitus juparux usuchjkaspa ukham amuyäyätan,

Tatitus juparux t'aqhisiykaspa,

jan ukax jisk'achkaspas ukham amuyarakïyätan.

5Ukampis jupax, jiwasan Tatitur saykatatas laykuw chhuxriñchjatänxa,

jiwasan ñanqha luratanakas laykuw wali t'aqhisiyatänxa;

jupan t'aqhisitapasti jiwasatakix sumankañ apani,

chhuxrinakap laykuw qullat uñjasiraktanxa.

6Taqi jiwasanakaw ovejanakar uñtat chhaqtan,

sapa maynis pachpa amtataparjam lurasa,

ukampis Diosax jupxaruw jiwasan mutuyatäñanakas apxaruyi.

7Chhuxriñchjata, jisk'achjataw uñjasïna,

ukampis janiw arsuskänti.

Janiw lakapsa arsuñatak jist'arkänti,

kunjämatix mä ovejax t'arwa yawiratax jan jachkix ukhama;

khariñ ovejar uñtat jiwayañatak apapxäna,

jupasti janipuniw kunatakis lakap jist'arkänti.

8Jan chiqa uñjäwimpiw apapxäna,

janirakiw khitis jupar arxatt'irix utjkänti;

janiw khitis jupat llakt'askänti.

Markaxan juchanakap laykuw

juparux jiwayapxäna.

9Ñanqha lurir jaqinakamp chikaw jiwäna,

jan wali jaqinakamp chikaw imapxäna,

jupax janiw kuna ñanqha lurirïkänsa,

janirakiw khitirus k'ari arunakamp sallqjirïkänti.

10Tatituw juparux ukham t'aqhisiyäna.

Niyakixay jupax juchanakas layku luqtasiwaychixa,

jichhax wali jaya maranakaw jakani;

wawanakaparus uñjarakiniwa,

kuntix Tatitux munki uk phuqhani.

11Ukham sinti t'aqhisitapatsti,

ukapachaw Tatitur jaysañan askïtap yatini;

Tatitun chiqa luqtiripasti waljaniruw qhispiyani,

jupanakan juchanakapsti juparakiw apxani.

12Ukat Tatitux jach'a jilïrinak taypir utt'ayani,

jach'a jilïri munañaninakampiw atipjäwin kusisini,

jiwañar katuyasitapata,

mä juchan jaqïkaspas ukham uñt'ayasitap layku,

jaqinakan juchanakap laykuw jakañap apt'asiwayi,

juchararanakatsa arxatasirakïnwa.