PROVERBIOS 21 - Qullan Arunaka DC

1Reyin amtatanakapax Tatitun amparapan jawirar uñtatawa;

kawkharutix jupax munki ukaruw irpi.

2Jaqitakix taqi luratanakapax walikjamakiwa,

ukampis Tatituw chuymanakan amtäwinakap yati.

3Wilañchanaka, waxt'äwinak katuqañat sipana,

Tatitutakix chiqa kankañamp uñjaña,

axsartañ chuymamp sarnaqañaw juk'amp askixa.

4Jach'a jach'a tukuñasa, wali yatiñan tukuñasa,

jan walinak lup'iñas juchawa.

5Suma amuyt'ampi lurat amtäwinakax sumakiw phuqhasi,

mäki wakichat amtäwinakasti aynacht'añaruw puriyi.

6K'arimpi jikxatat yänakax,

jiwq'ir uñtataw chhaqtawayxi;

jiwar puriyir sipitarakiwa.

7Ñanqha lurir jaqinakarux pachpa ñanqha luratapaw tukjani,

chiqa kankañan jan sarnaqañ munirïtap layku.

8Jan wali lurir jaqin sarnaqäwipax q'iwinukuta jan waliwa,

aski jaqin luratanakapasti q'umawa.

9Uta anqa k'uchun jakasiskañax juk'amp askiwa,

suma jach'a utan ch'axwir warmimp jakañat sipana.

10Jan wali lurir jaqix ñanqha lurañak lup'iski;

janipuniw jaqi masiparux khuyapayasiñ chuymamp uñjañ munkiti.

11Ñanqha lurir jaqin mututap uñjasaw, jan amuyt'an jaqix yatiqi;

yatiñan jaqisti mä kuti yatichatakiw yatiqi.

12Chiqapar uñjir Diosax, ñanqha jaqin utap uñch'uki;

ñanqha lurir jaqinakarusti, tukjatäñatakiw katuyi.

13Jan kunan jaqin achikt'asitapar jan ist'ir jaqixa,

jupax yanap maykani ukkhax, janirakiw ist'atäkaniti.

14Q'apisit jaqir mä suma churäwi waxt'añaxa,

q'apisiñapsa sumaptayiwa.

15Aski jaqix chiqa kankañamp uñjat taripäwitxa, kusisiwa,

jan wali lurir jaqinakatakisti tukjatäñapaw purini.

16Ch'ikhi kankañamp jan sarnaqir jaqixa,

jiwatanak taypiruw purini.

17Kusist'äwinakar munir jaqix, jan kunaniruw tukuni,

machañanakampiru, suma q'apkir qullanak uchasiñanakampir munir jaqix,

jan kunaniw tukusini.

18K'ari ñanqha lurir jaqix,

aski jaqin t'aqhisiñap t'aqhisini.

19Sapak jakaskañaw juk'amp askixa,

ch'axwiri, tuqisiri thithi warmimp jakañat sipana.

20Yatiñan jaqin utapanxa qamir yänakampi, suma q'apkir qullanakampiw utji,

jan amuyt'asir jaqin utapansti t'unanakakiw utji.

21Chiqana, askin sarnaqañ thaqhir jaqixa,

jakañampi, jach'ar aytatäñamp jikxati.

22Yatiñan mä sapa jaqikiw munasi,

mä jach'a marka katuntañataki.

23Suma amuyt'amp kunsa parlir jaqix,

janipuniw jan walt'añanakar mantkiti.

24Jach'achasiñampi lurir jaqix,

jan watxtasiri, jach'a jach'a tukuri, jan amuyt'asiri sutiniwa.

25Jayra jaqix taqi kunsa wal muni,

irnaqañsti janiw munkiti;

26willjtat jayp'ukamaw taqi kuns munapayaski.

Aski jaqisti, jan mich'asisaw churañ yati.

27Tatitux ñanqha jaqinakan waxt'äwinakap uñisi,

jan wali amtäwinakamp luqtapxatap layku.

28K'arisis irkatir jaqix tukjatäniwa,

ist'asir jaqisti, kunjäm arsuñsa yatipuniniwa.

29Ñanqha lurir jaqix janis axsarayaskaspa ukhamaw tuku,

aski jaqisti jakäwip chiqachasi.

30Tatit nayraqatanxa janiw yatiñ kankañax kunäkxiti,

janirakiw ch'ikhi kankañasa, suma amuyt'asiñas kunäkxiti.

31Jaqix nuwasïwir sarantañatakiw caballo wakichasi,

ukampis atipjäwix Tatitunkiwa.