NÚMEROS 7 - Qullan Arunaka DC

Qullan chiqawja luqtañatak waxt'anaka

1Kunürutix Moisesax qullan chiqawja sayt'ayañ tukuykän ukürux, aceitemp jawintasaw qullan chiqawjan yänakapampi, altaran yänakapamp qullanañchäna.

2Ukatsti ayllunakan jilïrinakapax, khitinakatix jaqinak jakthapiñ yanapt'apkatayna jupanakax, sarasin,

3Tatituruw waxt'a luqtapxäna, sapaqat pä jilïrinakat mä carreta, taqpachax suxta carretanaka, ukatsti sapaqat maynit mä urqu vaca, taqpachax tunka payan urqu vacanaka. Taqi ukanaksti qullan chiqawjaruw uchapxäna.

4Ukatsti Tatitux Moisesar akham sarakïna:

5“Uka carretanakampi, uka urqu vacanakamp katuqam, ukatsti levitanakar churxam, Tatitump Jikisiñ Carpan kuna lurañatix sapa maynir wakt'ki ukhamarjam apnaqapxañapataki” sasa.

6Moisesasti carretanakampi, urqu vacanakamp katuqasin, levitanakaruw lakintäna.

7Guersón chachan wawanakaparux pä carretampi, pusi urqu vacampi churäna, jupanakan ukanakamp irnaqapxañapataki.

8Merarí chachan wawanakaparusti pusi carretampi, kimsaqallq urqu vacampi churäna, jupanakan ukanakamp irnaqapxañapataki, jupanakarux Aarón sacerdoten Itamar yuqapaw ukham sarayäna.

9Ukampis Quehat chachan wawanakaparux janiw kuna carretanaksa, urqu vacanaksa churkänti, jupanakan luräwinakapasti qullan yänaka kallachipxar apapxañapänwa uka layku.

10Kunürutix altarax qullanañchatäxän ukürusti, ayllunakan jilïr irpirinakapax waxt'anak apanipxäna, ukatsti altar nayräxaruw uskupxäna.

11Ukat Tatitux Moisesar säna: “Sapaqat ayllut mä jilïrix, altar katuyañatak waxt'ap sapür apanpan” sasa.

12Nayrïr urux, Judá ayllunkir Aminadab chachan Nahasón yuqapaw waxt'ap apäna.

13Jupan waxt'apasti akänwa: qullqit lurat mä llataku, ukasti waranqa pusi patak kimsa tunkan gramonïnwa, ukatsti qullqit lurat qiru, ukasti paqallq patak paqallq tunkan gramonirakïnwa qullan utjäwin tupuparjama, paypach churäwisti suma jak'ump phuqhantatänwa, aceitemp chaputa, grano achunak waxt'ataki;

14ukxarusti qurit lurat mä wislla, ukasti patak tunkan gramonïnwa, inciensompi phuqt'ata,

15nakt'ayat waxt'a luqtañatakisti, mä vaca qallu, mä urqu oveja, mä maran urqu oveja,

16jucha luratat wilañcha luqtañatakix, mä chivo,

17sumankañ luqta wilañchatakisti, pä urqu vacanaka, phisqa urqu ovejanaka, phisqa chivonaka, mä maran phisqa ovejanaka. Ukanak Aminadab chachan Nahasón yuqapax waxt'atak apäna.

18Payïr urusti, Isacar ayllunkir Suar chachan Natanael chachaw waxt'ap apäna, Suar chachan yuqapa,

19-23jupasti Nahasón chachan waxt'ap kipkak pachpa waxt'anak luqtarakïna.

24Kimsïr urusti, Zabulón ayllun jilïripa Eliab chachaw waxt'ap apäna, Helón chachan yuqapa,

25-29jupasti mayninakjamaw pachpa waxt'anak luqtarakïna.

30Pusïri urusti, Rubén ayllun jilïripa Elisur chachaw waxt'ap apäna, Sedeúr chachan yuqapa,

31-35jupasti maynïr jilïrinakjamaw pachpa waxt'anak luqtarakïna.

36Phisqïri urusti, Simeón ayllun jilïripa Selumiel chachaw waxt'ap apäna, Surisadai chachan yuqapa,

37-41jupasti maynïr jilïrinakjamaw pachpa waxt'anak luqtarakïna.

42Suxtïri urusti, Gad ayllun jilïripa Eliasaf chachaw waxt'ap apäna, Reuel chachan yuqapa,

43-47jupasti maynïr jilïrinakjamaw pachpa waxt'anak luqtäna.

48Paqallqür urusti, Efraín ayllun jilïripa Elisamá chachaw waxt'ap apäna, Amihud chachan yuqapa,

49-53jupasti maynïr jilïrinakjamaw pachpa waxt'anak luqtäna.

54Kimsaqallqür urusti, Manasés ayllun jilïripa Gamaliel chachaw waxt'ap apäna, Pedasur chachan yuqapa,

55-59jupasti maynïr jilïrinakjamaw pachpa waxt'anak luqtäna.

60Llätunkïr urusti, Benjamín ayllun jilïripa Abidán chachaw waxt'ap apäna, Guidoní chachan yuqapa,

61-65jupasti maynïr jilïrinakjamaw pachpa waxt'anak luqtäna.

66Tunkïr urusti, Dan ayllun jilïripa Ahiézer chachaw waxt'ap apäna, Adai chachan yuqapa,

67-71jupasti maynïr jilïrinakjamaw pachpa waxt'anak luqtäna.

72Tunka mayan ururusti, Aser ayllun jilïripa Paguiel chachaw waxt'ap apäna, Ocrán chachan yuqapa,

73-77jupasti maynïr jilïrinakjamaw pachpa waxt'anak luqtäna.

78Tunka payan ururusti, Neftalí ayllun jilïripa Ahirá chachaw waxt'ap luqtäna, Enán chachan yuqapa,

79-83jupasti maynïr jilïrinakjamaw pachpa waxt'anak luqtäna.

84Ukhamaw kunapachatix altarax katuyatäxän ukkhax, israelitanakan ayllunakapan jilïrinakapax tunka payan qullqi llatakunak churapxäna, tunka payan qullqi qirunaka, tunka payan quri wisllanaka.

85Sapa qullqi llatakusti pusi patak kimsa tunkan gramonïnwa, sapa qirusti paqallqu patak paqallqu tunkan gramonirakïnwa. Taqpachasti, llatakunakana, qirunakan qullqipax pä tunka suxtan waranqa pusi patakan gramonakanïnwa, qullan utjäwin tupuparjama.

86Tunka payan quri wisllanakaw incienson phuqt'at utjarakïna, sapa mayax patak tunkan gramonïnwa, qullan utjäwin tupuparjama. Taqpach wisllanakan quripax waranqa kimsa patak pä tunkan gramonakaw tupt'asïna.

87Nakt'ayat luqtäwitak uywanakax, tunka payan urqu vacanaka, tunka payan urqu ovejanaka, tunka payan mä maran urqu ovejanaka, ukanakänwa, sapaqat maynis grano waxt'ampi, jucha luratat wilañcha luqtañatakisti tunka payan chivonakampi.

88Sumankxañ wilañcha luqtañataki uywanakax, taqpachasti pä tunk pusin vaca qallunaka, suxta tunk urqu ovejanaka, suxta tunk chivonaka, suxta tunka mä maran ovejanaka, ukanakänwa. Taqi uka waxt'anakaw altar katuyxañatak luqtasïna, kunapachatix katuyatäkän ukapacha.

89Moisesax Tatitump parlañatak Jikisiñ Carpar mantkän ukapachasti, Tatitun jupar parlaskatap ist'äna, arust'äwi arcan qhuphiñ patapankir pä querubines sat chhiqhaninak taypita.