ÉXODO 8 - Qullan Arunaka DC

1 1 (26) Tatitusti Moisesarux sänwa:

—Faraonan ukar saram, juparusti sätawa: “Tatitux akham siwa: ‘Markaxar mistuyxam nayar yupaychir sarxañapataki.

2 2 (27) Jumatix jan mistuykäta ukaxa, nayax markamar k'ayra jamp'atunakampiw mutuyä.

3 1 (28) Nilo jawiransti k'ayra jamp'atunakaw ullxtani, mistsunisinsti, utamaru, ikiñ utamaru, ikiñam patxaruw mantantani, yanapirinakaman utanakaparu, taqi jaqinakaman utanakaparuw mantantarakini, ¡t'ant'a lurarapipktam uka chiqanakarusa!

4 4 (29) Uka k'ayra jamp'atunakasti juma patxan thuqnaqani, uywatanakam patxana, taqi jaqinakam patxan thuqnaqarakini’ ” —sasa.

5 5 (1) Tatitusti Moisesarux saskakïnwa:

—Aaronar akham sam: “Thujrupxa jawiranakxaru, qutanakxar aytpan, ukat k'ayra jamp'atunakax uka chiqanakat misturanisin Egipto uraqir phuqhantani” —sasa.

6 6 (2) Aaronasti Egipto uraqin utjir umanakxaruw thujrup aytäna, ukatsti k'ayra jamp'atunakax uka umanakat mistsunisax Egipto markpacharuw phuqhantäna.

7 7 (3) Yatiri jaqinakasti yatiñanakapampix kipkakirak lurapxäna, jupanakasti Egipto uraqir k'ayra jamp'atunak jutayapxarakïna.

8 8 (4) Ukat faraonax Moisesampiru, Aaronampir jawsayanisin jupanakar säna:

—Tatitumar mayipxam k'ayra jamp'atunak nayat apanukuñapataki, ukhamarak jaqinakaxatsa, nayasti jaqinakamar mistuyxäwa Tatitur wilañcha luqtir sarañapataki —sasa.

9 9 (5) Ukat Moisesax faraonar sarakïna:

—Sitaya, ¿kunapachas jumax munta Diosar nayan mayiñaxa jumatakisa, yanapirinakamatakisa, markamatakisa, k'ayra jamp'atunak Tatitun apanukuñapataki, reyi utamatsa, juma jak'atsa; k'ayra jamp'atunakan jawirar mantxañapataki? —sasa.

10 10 (6) Faraonasti sänwa:

—Qharürpacha —sasa.

Moisesasti sarakïnwa:

—Mayitamarjamaw phuqhasini, ukhamat yatïta Israelan Tatit Diosapjamax yaqha diosan jan utjatapa.

11 11 (7) K'ayra jamp'atunakax reyi utamat jawiraruw sarxapxani. Janiw jumarusa, yanapirinakamarusa, jaqinakamarus q'apisiykxapxätamti —sasa.

12 12 (8) Moisesampi, Aaronampisti faraonan ukat mistunxapxäna. Ukatsti Moisesax Tatituruw mayïna, kuna k'ayra jamp'atunaktix jupax faraonxar apayankatayna uk apaqañapataki.

13 13 (9) Tatitusti Moisesan mayitaparjamaw luräna, ukatsti utanakana, uta anqanakana, pampanakan utjkän uka jamp'atunakax jiwarxänwa.

14 14 (10) Egipcionakasti jiwat jamp'atunakxa qut qutu apthapipxäna, uraqisti walpun thujsäna.

15 15 (11) Ukampisa, faraonax taqi ukanak jan utjxipansti, chuymap qalarayasïna janiw Moisesampiru, Aaronampir ist'añ munkxänti, kunjämtix Tatitux siskatayna ukarjama.

Diosan Egipto markar jisk'a chhichhillankhanakamp mutuyatapa

16 16 (12) Tatitusti Moisesarux sarakïnwa:

—Aaronar sam: Thujrupampi uraq laq'ar jisktpan, ukat taqpach Egipto uraqin chhichhillankhanakar tukuñapataki —sasa.

17 17 (13) Jupanakasti Tatitun arsutaparjamaw lurapxäna. Aaronax thujrup aytasin uraq laq'aruw jisktäna. Ukspachaw Egipto markan laq'apax jisk'a chhichhillankhanakar tuküna, ukanakasti jaqinakaru, uywanakaruw mich'intäna.

18 18 (14) Egiptonkir yatiri jaqinakasti yatiñanakapampix kipkakirak jisk'a chhichhillankhanak utjayañ munapxäna, ukampis janiw lurirjamäpkänti. Ukchañkamasti jisk'a chhichhillankhanakax jaqinakaru, uywanakaruw t'aqhisiyaskäna.

19 19 (15) Ukat yatir jaqinakax faraonar sapxäna:

—¡Diosaw taqi akanak luraski! —sasa.

Ukampis faraonax chuymap qalarayasisax janiw ist'añ munkänti, kunjämtix Tatitux siskatayna ukarjama.

Diosan Egipto markar tábano sat chhichhillankhanakamp mutuyatapa

20 20 (16) Tatitusti Moisesarux sänwa:

—Qharürux willjtat faraonax jawirar sarani, ukhamasti jumax wali willjtat sartasin jupar sanim: “Tatitux akham siwa: ‘Markaxar khithanukxam nayar yupaychir sarxañapataki.

21 21 (17) Jumatix markaxar jan antutkäta ukaxa, nayax kunayman chhichhillankhanak jumxar apayanï, ukhamarak yanapirinakamxaru, taqi jaqinakamxaru, utanakamxaru. Egipcionakan utanakapasa, pachpa uraqis uka chhichhillankhanakan phuqhantataw uñjasini.

22 22 (18) Ukampisa, Gosen uraqin janiw ukax utjkaniti, markaxan ukan jakatap layku. Ukhamat yatïta naya, Tatitun aka uraqinkataxa.

23 23 (19) Markaxampiru, markamampirux yaqha yaqha uñjä. Aksti qharürpachaw lurä’ ” sasa.

24 24 (20) Ukatsti Tatitux arsutaparjamaw luräna, mä qinayar uñtataw kunayman jach'a chhichhillankhanakax jutasin faraonan reyi utapar walpun phuqhantäna, ukhamarak yanapirinakapan utanakaparu, Egipto uraqpacharusa. Uka jach'a chhichhillankhanakasti markpach tukjawayäna.

25 25 (21) Ukatsti faraonax Moisesampiru, Aaronampiruw jawsayanïna, jupanakarusti sänwa:

—Diosamar wilañcha luqtir sarapxam, ukampis janiw aka markat mistupxañamäkiti —sasa.

26 26 (22) Moisesasti sarakïnwa:

—Janiw ukham lurañax nanakatak walïkaspati. Kawkïr animalanaktix Tatit Diosaxar wilañcha luqtapkä ukanakaxa, egipcionakatakix qullanawa. Egipcionakatix nanakar jupanakan yupaychañ animalanakar wilañcha luqtir uñjapxitaspa ukaxa, qalamp k'upjasaw jiwayapxitaspa.

27 27 (23) Nanakax wasarar sarapxañaxawa, kimsür sararu, ukan nanakan Tatit Diosaxarux wilañcha luqtanipxä, kunjämtix jupax nanakar sapkitu ukhamarjama.

28 28 (24) Ukat faraonax sarakïna:

—Nayax wasarar sarapxañamatakix antutapxämawa, Tatit Diosamar ukan wilañcha luqtapxañamataki, ukampis janiw wali jayar sarapxätati, nayatakis mayipxarakïtawa —sasa.

29 29 (25) Moisesasti sarakïnwa:

—Nayax akat mistusin Tatituruw mayï, juma jak'ata, yanapirinakam jak'ata, taqi jaqinakam jak'at arumanthix jach'a chhichhillankhanakax sarxañapataki, jumatix nanakar jan sallqjasipkakitäta, janirak israelitanakan Tatitur wilañcha luqtir sarañapsa jark'käta ukapacha —sasa.

30 30 (26) Moisesasti, faraonan reyi utapat mistusin Tatiturux mayïna.

31 31 (27) Tatitusti Moisesan mayitaparjamaw luräna, faraonan jak'apat jach'a chhichhillankhanak apaqxäna, luqtirinakapatsa, taqi jaqinakapatsa apaqxarakïnwa.

32 32 (28) Ukampis faraonax wasitat chuymap qalarayasïna, ukatsti janiw israelitanakar khithanukuñ munkxarakikïnti.